ଡେରାବିଶ,୧୮ା୯(ବେବର୍ତା ଅଜୟ ଦାସ): ଆବାସ ଯୋଜନାରୁ ବଞ୍ଚତ୍ତ ହୋଇ ଜଣେ ବିଧବା ଅସହାୟା ମହିଳା ଭଙ୍ଗା ଛପର ଘରେ ନିଜ ପରିବାର ସହ ଜୀବନ ବିତାଉଛନ୍ତି। ଘର ଖଣ୍ଡିଏ ପାଇଁ ସରପଞ୍ଚଙ୍କଠାରୁ ଆରମ୍ଭ କରି ଜିଲାପାଳଙ୍କୁ ଗୁହାରୀ କରି ମଧ୍ୟ କୌଣସି ସୁଫଳ ପାଇ ନାହାଁନ୍ତି। ନିଜର ଭାଗ୍ୟକୁ ଆଦରି ପଡ଼ି ରହିଛନ୍ତି ଏହି ବିଧବା ମହିଳା। ଏଭଳି ଘଟଣା ଦେଖିବାକୁ ମିଳିଛି କେନ୍ଦ୍ରାପଡ଼ା ଜିଲା ଡେରାବିଶ ବ୍ଳକ ଅନ୍ତର୍ଗତ ବେଣିପୁର ପଞ୍ଚାୟତ ରାଏତୁଣ୍ଡି ଗ୍ରାମରେ। ଗ୍ରାମର ସ୍ବର୍ଗତ ନିତ୍ୟାନନ୍ଦ ଖଟୁଆଙ୍କ ବିଧବା ସ୍ତ୍ରୀ ପ୍ରମିଳା (୬୬) ଆର୍ଥିକ ଦୂରାବସ୍ଥା ମଧ୍ୟରେ ଗତି କରୁଥିବା ବେଳେ ନିଜର ଭଙ୍ଗା ଚାଳ ଛପର ଘରକୁ ମରାମତି କରିବାକୁ ଆବଶ୍ୟକ ଅର୍ଥ ମଧ୍ୟ ଯୋଗାଡ଼ କରିବାରେ ସମ୍ପୂର୍ଣ୍ଣ ଅକ୍ଷମ ହୋଇପଡ଼ିଛନ୍ତି। ପରିବାରରେ ପ୍ରମିଳାଙ୍କୁ ମିଶାଇ ୪ ଜଣ ସଦସ୍ୟ ଥିବା ବେଳେ ପୁଅ ମୂଲଲାଗି ପରିବାରକୁ ପ୍ରତିପୋଷଣ କରନ୍ତି। ରହୁଥିବା ଚାଳଛପର ଘରରେ ଦିନରେ ସୂର୍ଯ୍ୟ ଓ ରାତିରେ ତାରା ଓ ଚନ୍ଦ୍ର ଦେଖାଯାଆନ୍ତି। ଛପର ହୋଇପାରୁ ନ ଥିବା ଏହି ଚାଳଘରେ ଅସରାଏ ବର୍ଷା ହେଲେ ଘର ଭିତରେ ପାଣି ପଶି ଲହଡ଼ି ଖେଳେ। ତେବେ ଆବାସ ଗୃହ ଯୋଜନାରେ ସାମିଲ ହେବା ପାଇଁ ପଞ୍ଚାୟତର ସରପଞ୍ଚ, ବିଡ଼ିଓ ଓ ଜିଲାପାଳଙ୍କ ନିକଟରେ କେତେ ଯେ ଗୁହାରି କରିଛନ୍ତି, ମାତ୍ର ତାଙ୍କର ଦୁଃଖ କେହି ବୁଝି ନ ଥିବା ପ୍ରମିଳା କହିଛନ୍ତି। କେବଳ ଭଗବାନଙ୍କ ଉପରେ ଭରସା ରଖି ନିଜ ଭାଗ୍ୟକୁ ଆଦରି ପରିବାର ସଦସ୍ୟ ଦୁଃଖରେ ଦିନ କାଟୁଥିବା ନେଇ ପ୍ରମିଳା କହିଛନ୍ତି। ଏ ବିଷୟରେ ବିଡ଼ିଓ ଦାଶରଥୀ ଜେନାଙ୍କୁ ଯୋଗାଯୋଗ କରାଯାଇଥିଲା। ସେ କହିଲେ, ଆବାସ ଗୃହ ଯୋଜନାରେ ସାମିଲ ପାଇଁ କରାଯାଇଥିବା ସର୍ଭେରେ ବହୁ ଯୋଗ୍ୟ ହିତାଧିକାରୀ ବାଦ ପଡ଼ିଥିବା ତାଙ୍କ ନଜରକୁ ଆସିଛି। ପୁନର୍ବାର ସର୍ଭେ ସମୟରେ ବାଦ୍ପଡ଼ିଥିବା ଯୋଗ୍ୟ ହିତାଧିକାରୀଙ୍କ ସମ୍ପର୍କରେ ଅନୁସନ୍ଧାନ କରାଯାଇ ତାଙ୍କୁ ପରବର୍ତ୍ତୀ ଅବସ୍ଥାରେ ତାଲିକାଭୁକ୍ତ କରାଯିବ ବୋଲି ବିଡ଼ିଓ ଜେନା କହିଛନ୍ତି।
