ବଇଣ୍ଡା,୧୦ା୫(ଡି.ଏନ.ଏ.) ଅନୁଗୋଳ ଜିଲା କିଶୋରନଗର ବ୍ଲକ ଅଞ୍ଚଳରେ କରୋନା ସଂକ୍ରମିତଙ୍କ ସଂଖ୍ୟା ବଢ଼ିବାରେ ଲାଗିଛି। କିଛିଦିନ ହେଲା ଦୈନିକ ଆକ୍ରାନ୍ତଙ୍କ ସଂଖ୍ୟାରେ ଦ୍ରୁତ ବୃଦ୍ଧି ପରିଲକ୍ଷିତ ହେଉଛି। ଗତ ୬ ତାରିଖରେ ବ୍ଲକ ଅଞ୍ଚଳରୁ ୪୪ଜଣ ନୂଆ ପଜିଟିଭ୍ ଚିହ୍ନଟ ହୋଇଥିବାବେଳେ ୭ ତାରିଖରେ ୫୨ ଓ ୮ ତାରିଖରେ ଏହି ସଂଖ୍ୟା ୫୯ରେ ପହଞ୍ଚତ୍ଛି। ମାସକ ମଧ୍ୟରେ ବ୍ଲକ ଅଞ୍ଚଳରୁ ୫୫୭ ଜଣ ସଂକ୍ରମିତ ଚିହ୍ନଟ ହୋଇଥିଲେ ମଧ୍ୟ ପ୍ରଶାସନ ଏହାକୁ ଗୁରୁତ୍ୱର ସହ ନେଉ ନ ଥିବା ଅଭିଯୋଗ ହୋଇଛି। ଏପରିକି ଆକ୍ରାନ୍ତଙ୍କ ପରିବାର ସଦସ୍ୟ ଓ ସଂସ୍ପର୍ଶରେ ଆସିଥିବା ଲୋକେ ଟେଷ୍ଟ ପାଇଁ ଆଗ୍ରହ ପ୍ରକାଶ କରୁଥିଲେ ବି ମେଡିକାଲରେ କିଟ୍ ଅଭାବରୁ ତାହା ହୋଇପାରୁ ନାହିଁ। ଏହା ପଜିଟିଭ୍ଙ୍କ ସଂଖ୍ୟା ବୃଦ୍ଧିର କାରଣ ହୋଇଥିବା କୁହାଯାଉଛି।
କିଶୋରନଗର ବ୍ଲକର ବିଭିନ୍ନ ଗ୍ରାମରୁ କରୋନ ସଂକ୍ରମିତ ଚିହ୍ନଟ ହେଉଥିବାରୁ ଏହାକୁ ନେଇ ଭୟର ବାତାବରଣ ସୃଷ୍ଟି ହୋଇଛି। ବଇଣ୍ଡା ମେଡିକାଲ ଅଧୀନରେ ଥିବା ୮ଟି ପଞ୍ଚାୟତରୁ ମାସକରେ ୩୬୯ ଜଣ ପଜିଟିଭ୍ ବାହାରିଥିବା ବେଳେ ୪ ଜଣଙ୍କ ମୃତ୍ୟୁ ହୋଇଛି। ସେହିପରି କିଶୋରନଗର ମେଡିକାଲ ଅଧୀନରେ ଥିବା ୧୫ଟି ପଞ୍ଚାୟତରୁ ୧୮୮ ଆକ୍ରାନ୍ତ ଚିହ୍ନଟ ହୋଇଛନ୍ତି। ଜଣଙ୍କ ମୃତ୍ୟୁ ହୋଇଛି। ବଇଣ୍ଡା ଏକ ଜନଗହଳିପୂର୍ଣ୍ଣ ଅଞ୍ଚଳ ହୋଇଥିବାବେଳେ ଅମାନିଆଙ୍କୁ ରୋକାଯାଇ ପାରୁନାହିଁ। ଅନ୍ୟ ପଞ୍ଚାୟତର ସଂକ୍ରମିତ ବ୍ୟକ୍ତିମାନେ ବଇଣ୍ଡା ଅଞ୍ଚଳକୁ ଆସି ବିଭିନ୍ନ ସାମଗ୍ରୀ କିଣୁଥିବା ବଇଣ୍ଡା ଗ୍ରାମବାସୀ ଅଭିଯୋଗ କରୁଛନ୍ତି। ପୋଲିସ ପ୍ରଶାସନ ପକ୍ଷରୁ ଯାଞ୍ଚ ବେଳେ ହଣ୍ଡପା ପୋଲିସ ଏକ ମାସରେ ୩୦ ହଜାର ଟଙ୍କା ଜରିମାନା କାଟିଛି। ତଥାପି ଅମାନିଆମାନେ ମାନୁ ନ ଥିବା ପୋଲିସ କହିଛି। ଅନ୍ୟପକ୍ଷରେ ବ୍ଲକରେ କରୋନା ଟେଷ୍ଟ ପାଇଁ ଆବଶ୍ୟକ କିଟ୍ ନାହିଁ। ଏଥିଯୋଗୁ ବିଭିନ୍ନ ମେଡିକାଲକୁ ଟେଷ୍ଟ ପାଇଁ ଆସୁଥିବା ବ୍ୟକ୍ତିମାନେ ଫେରିଯାଉଛନ୍ତି। ବିଶେଷକରି ପଜିଟିଭ୍ଙ୍କ ପରିବାର ସଦସ୍ୟ ଓ ସଂସ୍ପର୍ଶରେ ଆସିଥିବା ବ୍ୟକ୍ତିମାନେ ଟେଷ୍ଟ କରିପାରୁନାହାନ୍ତି। ସେହିପରି ୧୩ ନମ୍ବର ଜୋନ୍ର ୮ଟି ପଞ୍ଚାୟତରେ କୋରୋନା ପଜିଟିଭ୍ ସଂଖ୍ୟା ବଢୁଥିବା ବେଳେ ଜିଲା ସ୍ବାସ୍ଥ୍ୟ ବିଭାଗ ପକ୍ଷରୁ ସ୍ବତନ୍ତ୍ର ଟିମ୍ କରି ବିଭିନ୍ନ ଗ୍ରାମରେ ଟେଷ୍ଟ କରିବା ପାଇଁ ବାରମ୍ବାର ଦାବି ହେଉଥିଲେ ମଧ୍ୟ ସ୍ବାସ୍ଥ୍ୟ ବିଭାଗ ପକ୍ଷରୁ ପଦକ୍ଷେପ ନିଆଯାଉ ନାହିଁ। ଉରୁକୁଳା ଗ୍ରାମର ବହୁ ଲୋକ କିଛିଦିନ ହେବ ଜ୍ୱରରେ ପୀଡ଼ିତ ଥିବାବେଳେ ସେମାନଙ୍କ ଟେଷ୍ଟ କରିବା ପାଇଁ ଏକ ସ୍ବତନ୍ତ୍ର ଟିମ୍ ଆବଶ୍ୟକ ରହିଛି। କିନ୍ତୁ ମେଡିକାଲ ଟିମ୍ ଆସୁ ନ ଥିବା ଉରୁକୁଳା ଗ୍ରାମବାସୀ ଅଭିଯୋଗ କରିଛନ୍ତି। ଏ ନେଇ ଜିଲା ମୁଖ୍ୟ ଚିକିତ୍ସା ଅଧିକାରୀ ଡା. ଅଭୟ କୁମାର ଦାସ କହିଛନ୍ତି, କିଟ୍ ଅଭାବ ଯୋଗୁ ଟେଷ୍ଟରେ ବିଳମ୍ବ ହେଉଛି। ଏ ନେଇ ପଦକ୍ଷେପ ନିଆଯିବ।
ସମସ୍ତଙ୍କୁ ଚିକିତ୍ସା ମିଳୁନି
କୋଭିଡ୍ ଆକ୍ରାନ୍ତମାନଙ୍କ ମଧ୍ୟରୁ କେତେଜଣଙ୍କୁ ଠିକ୍ ଭାବେ ଚିକିତ୍ସାସେବା ଯୋଗାଇ ଦିଆଯାଉ ନାହିଁ । ସଙ୍ଗରୋଧରେ ଥିବା ବ୍ୟକ୍ତିମାନଙ୍କ ନିକଟରେ ଔଷଧ କିଟ୍ ପହଞ୍ଚାଯାଉ ନାହିଁ। ଅର୍ଥ ଅଭାବ ଯୋଗୁ ଅନେକେ ମେଡିକାଲ ଯାଇପାରୁ ନାହାନ୍ତି।
-ମନୋରଞ୍ଜନ ପ୍ରଧାନ, ଶରଧାମୁଣ୍ଡା
ଲୋକଙ୍କୁ ସୁରକ୍ଷା ଦେବାରେ ବିଫଳ
କରୋନା କବଳରୁ ଲୋକଙ୍କୁ ସୁରକ୍ଷିତ ରଖିବାରେ ପ୍ରଶାସନ ବିଫଳ ହେଉଛି। ସେଥିପାଇଁ ଗ୍ରାମାଞ୍ଚଳରେ ଏହି ମହାମାରୀ ପ୍ରବେଶ କରିସାରିଲାଣି। ସମସ୍ତେ ସଚେତନ ନ ରହିଲେ ଆଗାମୀ ଦିନରେ ଏହା ଅଧିକରୁ ଅଧିକ ଲୋକଙ୍କୁ ନିଜ କବଳକୁ ନେଇଯିବ।
-ରଣଜିତ ପଟ୍ଟନାୟକ, ସାମାଜିକକର୍ମୀ
ନିୟମ ପାଳନ କରୁନାହାନ୍ତି
ବଇଣ୍ଡାରେ ସଂକ୍ରମଣ ରୋକିବା ପାଇଁ ପଦକ୍ଷେପ ନିଆଯାଉଛି। କାମ ନ ଥିଲେ ଘରୁ ନ ବାହାରିବା ପାଇଁ ଲୋକମାନଙ୍କୁ ପରାମର୍ଶ ଦିଆଯାଉଛି । କିନ୍ତୁ କୋଭିଡ୍ କଟକଣା ନ ମାନିବା ଯୋଗୁ ସଂକ୍ରମଣ ବଢୁଛି । ସମସ୍ତେ ସରକାରଙ୍କ ନିର୍ଦ୍ଦେଶ ମାନନ୍ତୁ।
-ଜଳଧର ସାହୁ, ସରପଞ୍ଚ, ନୁନୁକାପଶି
ଲକ୍ଷଣ ଥିଲେ ଟେଷ୍ଟ କରନ୍ତୁ
କରୋନା ସଂକ୍ରମିତଙ୍କ ପାଇଁ ସରକାରୀସ୍ତରରେ ବହୁ ବ୍ୟବସ୍ଥା କରାଯାଇଛି। ହେଲେ ଅନେକ ଲୋକ କଟକଣା ମାନୁନାହାନ୍ତି। ଲକ୍ଷଣ ଥିଲେ ଟେଷ୍ଟ କରନ୍ତୁ । ଶିଶୁ, ଗର୍ଭବତୀ ଓ ବୟସ୍କମାନେ ଘରେ ରହିବା ସହ ମାସ୍କ ବ୍ୟବହାର ଓ ସାମାଜିକ ଦୂରତ୍ୱ ରକ୍ଷା କରନ୍ତୁ।
-ଡା. ସରୋଜ କୁମାର ନନ୍ଦ, ବଇଣ୍ଡା ମେଡିକାଲ
ଘର ଘର ବୁଲି ସ୍କାନିଂ, ଟେଷ୍ଟିଂ
ଅମାନିଆଙ୍କ ପାଇଁ ସଂକ୍ରମଣ ବଢୁଛି। ସେମାନଙ୍କୁ ସାବାଡ କରିବାକୁ ପ୍ରଶାସନ ପକ୍ଷରୁ ପଦକ୍ଷେପ ନିଆଯିବ। ଆବଶ୍ୟକ ନ ଥିଲେ ଘରୁ ବାହାରନ୍ତୁ ନାହିଁ । ଖୁବ୍ଶୀଘ୍ର ଘରଘର ବୁଲି ବୟସ୍କଙ୍କ ସ୍କାନିଂ ସହ ଲକ୍ଷଣ ପ୍ରକାଶ ପାଉଥିବା ବ୍ୟକ୍ତିଙ୍କ ଟେଷ୍ଟ କରାଯିବ।
-ଶାନ୍ତି ସ୍ବରୂପ ମିଶ୍ର, ତହସିଲଦାର
