ଚାନ୍ଦବାଲି,୧୦।୧୨(ଡି.ଏନ୍.ଏ.): ଚାଷୀଙ୍କଠାରୁ ସରକାରୀ ଧାର୍ଯ୍ୟ ଦର କୁଇଣ୍ଟାଲ ପ୍ରତି ୨୦୪୦ ଟଙ୍କାରେ ଧାନ କ୍ରୟ ନିମନ୍ତେ ସମବାୟ ସମିତି ଓ ମହିଳା ଗୋଷ୍ଠୀ ମାଧ୍ୟମରେ ଅନ୍ଲାଇନ ପଞ୍ଜୀକରଣ କରାଯାଇଛି। ହେଲେ ଚଳିତବର୍ଷ ଖରିଫ ଧାନ ଅମଳ ଆରମ୍ଭରୁ ଭଦ୍ରକ ଜିଲା ଚାନ୍ଦବାଲିରେ ଅଭାବୀ ବିକ୍ରି ଆରମ୍ଭ ହୋଇଛି। ପଶ୍ଚିମବଙ୍ଗର ଦୁଇଟି ଧାନ ବୋଝେଇ ଟ୍ରକ୍କୁ ଗୁରୁବାର ରାତିରେ ମତୋ ଫାଣ୍ଡି ପୋଲିସ ଅଟକ ରଖିଥିଲା। ଚାନ୍ଦବାଲି ଅଞ୍ଚଳରୁ ବେପାରୀମାନଙ୍କ ମାଧ୍ୟମରେ ପ୍ରାୟ ୫ ଶହରୁ ଊର୍ଦ୍ଧ୍ୱ କୁଇଣ୍ଟାଲ ଧାନ ଲୋଡ୍ କରି ଭଦ୍ରକ ଅଭିମୁଖେ ଯାଉଥିବା ବେଳେ ପାଞ୍ଚପଡ଼ା ନିକଟରେ ଥିବା ଆର୍ଏମ୍ସି ଚେକ୍ଗେଟ୍ର କମର୍ଚାରୀ ଅଟକାଇବାରୁ ଟ୍ରକ୍ ଦୁଇଟି ଦ୍ରୁତଗତିରେ ପଳାଇଥିଲେ। ଖବରପାଇ ମତୋ ଫାଣ୍ଡି ପୋଲିସ ଅଟକାଇବା ପରେ ମୁଖ୍ୟରାସ୍ତା କିଛି ସମୟ ପାଇଁ ଜନଗହଳି ହେବା ସହ ଉତ୍ତେଜନା ପ୍ରକାଶ ପାଇଥିଲା। ଚାନ୍ଦବାଲି ପୋଲିସ ପହଞ୍ଚି ପରିସ୍ଥିତିକୁ ଆୟତ୍ତ କରିଥିଲା। ସରକାରୀ ଚାଲାଣ ନ ଥାଇ ଧାନ ବୋଝେଇ ହୋଇଥିବାରୁ ଟ୍ରକ୍ ଦୁଇଟିକୁ ମତୋ ଫାଣ୍ଡିକୁ ନିଆଯାଇଥିଲା। ଏତେ ପରିମାଣର ଧାନ ପଶ୍ଚିମବଙ୍ଗ ବେପାରୀମାନେ କାହା ଦ୍ୱାରା ଓ କେମିତି ନେଉଥିଲେ ବୋଲି ସାଧାରଣରେ ସନ୍ଦେହ ସୃଷ୍ଟି ହୋଇଛି।
ଦୁଇଦିନରେ ମୋଟ ୧୨ଟି ଧାନ ବୋଝେଇ ଟ୍ରକ୍ ଅଟକ ରଖାଯାଇଛି। ସେଥିମଧ୍ୟରୁ ଖେରଙ୍ଗ ଆର୍ଏମ୍ସି ଚେକ୍ଗେଟରେ ଗୁରୁବାର ରାତିରେ ୬ଟି ଓ ପାଞ୍ଚପଡ଼ା ଆର୍ଏମ୍ସି ଚେକ୍ଗେଟ୍ରେ ଶୁକ୍ରବାର ୪ଟି ଅଟକ ରଖାଯାଇଥିଲା। ଆର୍ଏମ୍ସି ପକ୍ଷରୁ ଏହି ୧୨ଟି ଗାଡ଼ିରୁ ୮୦ ହଜାର ଟଙ୍କା ଚାଲାଣ କଟାଯାଇ ଛାଡ଼ି ଦିଆଯାଇଛି। ଚାନ୍ଦବାଲି ତହସିଲଦାର ସୁଶାନ୍ତ ସୂତାର ଓ ଥାନାଧିକାରୀ କରୁଣାକର ରାଉତ ଘଟଣାସ୍ଥଳରେ ପହଞ୍ଚି ତଦନ୍ତ କରିଥିଲେ। ଜିଲାରେ ଆସନ୍ତା ୨୮ ତାରିଖରେ ମଣ୍ଡି ଖୋଲିବାକୁ ପ୍ରଶାସନିକ ସ୍ତରରେ ଧାର୍ଯ୍ୟ ହୋଇଛି। ମଣ୍ଡି ଖୋଲାଯାଇ ଧାନକିଣା ଆରମ୍ଭ ହେଲା ବେଳକୁ ଅମଳ ପ୍ରାୟ ସରିଯାଇଥିବ। ଲଘୁଚାପ ବର୍ଷାରୁ ଧାନକୁ ସୁରକ୍ଷିତ ରଖିବାର ବ୍ୟବସ୍ଥା ନ ଥିବା ଓ ଚାଷ ପାଇଁ କରିଥିବା ଧାର କରଜ ଶୁଝିବାକୁ ଚାଷୀମାନେ କମ୍ ଦରରେ ଧାନ ବିକିବାକୁ ବାଧ୍ୟ ହେଉଛନ୍ତି। ଏହାର ସୁଯୋଗ ନେଇ ପ୍ରତିବର୍ଷ ରାଜ୍ୟ ବାହାରୁ ଆସୁଥିବା ଦଲାଲମାନେ ସ୍ଥାନୀୟ ବେପାରୀ ମାଧ୍ୟମରେ କମ୍ ଦରରେ ଧାନ କିଣି ମାଲାମାଲ ହେଉଛନ୍ତି।
