ଭୁବନେଶ୍ୱର,୫।୪ (ବ୍ୟୁରୋ):ଶ୍ରୀମନ୍ଦିର ରୋଷଘରେ ଚୁଲିଭଙ୍ଗା ଘଟଣାକୁ ନେଇ ଜନ ଅସନ୍ତୋଷ ତୀବ୍ର ହେଉଥିବାବେଳେ ଏହାକୁ ନେଇ ବିଭିନ୍ନ ରାଜନୈତିକ ଦଳ ମଧ୍ୟ ପ୍ରତିକ୍ରିୟା ପ୍ରକାଶ କରିଛନ୍ତି। ମୁଖ୍ୟମନ୍ତ୍ରୀଙ୍କ ହସ୍ତକ୍ଷେପ ଲୋଡ଼ିବା ସହ ହେରିଟେଜ ବୈଠକ ଡାକି ଘଟଣାର ବଡ଼ଧରଣର ତଦନ୍ତ କରିବାକୁ ସମାଜବାଦୀ ପାର୍ଟି ଦାବି କରିଛି। ଲୋକଙ୍କ ଆସ୍ଥା ଓ ବିଶ୍ୱାସର କଥା, ତୁରନ୍ତ କାର୍ଯ୍ୟାନୁଷ୍ଠାନ ସହ ଶ୍ରୀମନ୍ଦିରର ସୁରକ୍ଷା କରାଯାଉ ବୋଲି ସିପିଆଇ(ଏମ୍) ପକ୍ଷରୁ କୁହାଯାଇଛି।
ସୋମବାର ସମାଜବାଦୀ ପାର୍ଟିର ରାଜ୍ୟ ସଭାପତି ରବି ବେହେରା ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଏକ ଚିଠି ଲେଖି ଦାବି ଜଣାଇଛନ୍ତି। ସେ ତାଙ୍କ ଚିଠିରେ ଲେଖିଛନ୍ତି ଯେ, ଜଗନ୍ନାଥଙ୍କ ରୋଷେଇ ଘର ମାଲିକ ହେଉଛନ୍ତି ମହାଲକ୍ଷ୍ମୀ। ତାଙ୍କ ଚୁଲିକୁ ଭାଙ୍ଗି ଦୁର୍ବୃତ୍ତମାନେ ଓଡ଼ିଆ ଜାତି ମୁହଁରେ କେବଳ କଳା ବୋଳିନାହାନ୍ତି, ସମଗ୍ର ଜଗନ୍ନାଥ ସଂସ୍କୃତିକୁ ବିଶ୍ୱ ସମ୍ମୁଖରେ ଅପମାନିତ କରିଛନ୍ତି। ଏହା ମହାପ୍ରଭୁ ଜଗନ୍ନାଥ ଓ ମହାଲକ୍ଷ୍ମୀଙ୍କ କୋଟି କୋଟି ଭକ୍ତଙ୍କୁ ଆଘାତ ଦେଇଛି। ଜଗନ୍ନାଥଙ୍କୁ ନେଇ ବିଗତ କିଛିବର୍ଷ ଧରି ଯେଉଁ ଦୁର୍ବୃତ୍ତମାନେ ବାରମ୍ବାର ଏଭଳି ଖେଳ ଖେଳୁଛନ୍ତି, ନିଜର ବ୍ୟକ୍ତିଗତ ଲାଭ, ପ୍ରତିଷ୍ଠା ଓ ବେପାର ବଣିଜକୁ କେନ୍ଦ୍ରକରି ଜଗନ୍ନାଥ ସଂସ୍କୃତି ଓ ଜଗନ୍ନାଥ ମନ୍ଦିରକୁ ଯେଉଁଭଳି ନିନ୍ଦିତ କରାଯାଉଛି, ତାହାକୁ ସପା ଘୋର ନିନ୍ଦା କରୁଛି। ସରକାର ତୁରନ୍ତ ହେରିଟେଜ୍ କ୍ୟାବିନେଟ୍ ବୈଠକ ଡାକି ଘଟଣା ଉପରେ ପୁଙ୍ଖାନୁପୁଙ୍ଖ ତଦନ୍ତ କରନ୍ତୁ ଓ ଜଗନ୍ନାଥ ସଂସ୍କୃତିର ସୁରକ୍ଷା ପାଇଁ କଡା ପଦକ୍ଷେପ ନିଅନ୍ତୁ। ମୁଖ୍ୟମନ୍ତ୍ରୀ ବ୍ୟକ୍ତିଗତ ଭାବରେ ହସ୍ତକ୍ଷେପ କରି ସବୁଦିନ ପାଇଁ ଏଭଳି ଘଟଣାରେ ପୂର୍ଣ୍ଣଚ୍ଛେଦ ପକାଇବାକୁ ବେହେରା ଦାବି କରିଛନ୍ତି।
ଅପରପକ୍ଷେ, ସିପିଆଇ(ଏମ୍) ପକ୍ଷରୁ ରାଜ୍ୟ ସମ୍ପାଦକ ମଣ୍ଡଳୀ ସଦସ୍ୟ ଜଗନ୍ନାଥ ମିଶ୍ର କହିଛନ୍ତି, ଜଗତର ନାଥ ମହାପ୍ରଭୁ ଶ୍ରୀଜଗନ୍ନାଥଙ୍କୁ ସମସ୍ତେ ଭକ୍ତି ଜଣାଉଛନ୍ତି। ଏହା ବିଶ୍ୱବାସୀଙ୍କ ବିଶ୍ୱାସ ଓ ଆସ୍ଥାର କଥା। ମାତ୍ର ତାଙ୍କ ଚୁଲିକୁ ଭାଙ୍ଗିବା ସବୁଠୁ ଦୁଃଖଦ ଘଟଣା। ଏହାକୁ ନେଇ ଚାରିଆଡେ ପ୍ରବଳ ଅସନ୍ତୋଷ ପ୍ରକାଶ ପାଉଛି। ସରକାର ତୁରନ୍ତ ଏ ଦିଗରେ କାର୍ଯ୍ୟାନୁଷ୍ଠାନ ନେବା ଦରକାର ବୋଲି ମିଶ୍ର କହିଛନ୍ତି।
