ଲକ୍ଷ୍ନୌ,୮।୨: ବିଭିନ୍ନ ଦେଶରୁ ଅଧ୍ୟୟନ କରିବା ପରେ ଉତ୍ତରପ୍ରଦେଶର ପୋଲିସ ବିଭାଗରେ ସୋସିଆଲ ମିଡିଆ ନୀତି କାର୍ଯ୍ୟକାରୀ କରାଯାଇଛି। ଏଥିରେ ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି ସରକାରୀ କାର୍ଯ୍ୟ କିମ୍ବା ଡ୍ୟୁଟି ସମୟରେ ସୋସିଆଲ ମିଡିଆର ବ୍ୟବହାର ସମ୍ପୂର୍ଣ୍ଣ ଭାବେ ନିଷିଦ୍ଧ ହେବ। କନଷ୍ଟେବଳଙ୍କ ଠାରୁ ଆଇପିଏସ ଅଧିକାରୀ ପର୍ଯ୍ୟନ୍ତ ଏହି ପ୍ରତିବନ୍ଧକ ଲାଗୁ କରାଯାଇଛି।
ଏହା ବ୍ୟତୀତ ୟୁନିଫର୍ମରେ ଡ୍ୟୁଟି କରିବା ସମୟରେ ରିଲ ତିଆରି କରିବା, ଚାଟିଂ କିମ୍ବା ଫଟୋ ପୋଷ୍ଟ କରିବା ଉପରେ ମଧ୍ୟ ନିଷେଧାଦେଶ ଦିଆଯାଇଛି। ଉତ୍ତରପ୍ରଦେଶରେ ଏହି ନୀତି କାର୍ଯ୍ୟକାରୀ କରିବା ପୂର୍ବରୁ କେବଳ ବିଭିନ୍ନ ସଂଗଠନର ମତାମତ ସର୍ଭେ କରାଯାଇ ନ ଥିଲା, ରାଜ୍ୟ ସହିତ ବିଭିନ୍ନ ଦେଶର ସୋସିଆଲ ମିଡିଆ ନିୟମ ମଧ୍ୟ ଅଧ୍ୟୟନ କରାଯାଇଥିଲା। ଡିଜିପି ଉତ୍ତରପ୍ରଦେଶ ଏ ସମ୍ପର୍କରେ ନିର୍ଦ୍ଦେଶ ଦେଇଛନ୍ତି। ବିଶେଷ କରି ଜିଲା ସ୍ତରରେ ଏହାକୁ ଗୁରୁତର ସହ ପାଳନ କରାଯିବା ଉଚିତ ବୋଲି ସେ କହିଛନ୍ତି।
