କେସିଙ୍ଗା,୨୪ା୯(ତୁମେଶ୍ୱର ସାହୁ): ସ୍ବର୍ଗତା କ୍ଷୀରବତୀ ସାହୁଙ୍କ ଶ୍ୱଶୁର, ଶାଶୁ ଓ ନଣନ୍ଦ ଙ୍କୁ ଗିରଫ ଦାବିରେ ମୃତ ପରିବାରବର୍ଗଙ୍କ ସମେତ ତୈଳିକ ବୈଶ୍ୟ ହଳଦିଆ ସାହୁ ସମାଜ କଳାହାଣ୍ଡି ପକ୍ଷରୁ ଥାନା ସମ୍ମୁଖରେ ବୁଧବାର ପ୍ରତିବାଦ ଦେଇ ଗଣଧାରଣା ଦେଇଥିଲେ। ପୂର୍ବାହ୍ନ ୧୦ଟାରୁ ମଧ୍ୟାହ୍ନ ୧୨ଟା ଯାଏ ଗଣଧାରଣା ଦେଇ କେସିଙ୍ଗା ଆଇଆଇସିଙ୍କୁ ଏକ ଦାବିପତ୍ର ସାହୁ ସମାଜ ପକ୍ଷରୁ ପ୍ରଦାନ କରାଯାଇଛି। ଆଇଆଇସି ଜିତେନ୍ଦ୍ର ବିଶ୍ବାଳ ୧୦ ଦିନ ମଧ୍ୟରେ ଅଭିଯୁକ୍ତଙ୍କୁ ଗିରଫ କରାଯିବା ପାଇଁ ସମୟ ମାଗିଛନ୍ତି।
ସୂଚନାଯୋଗ୍ୟ, କଳାହାଣ୍ଡି ଜିଲା କେସିଙ୍ଗା ଥାନା ଅନ୍ତର୍ଗତ ଭମରମାଲ ଗ୍ରାମର ରୋମାଞ୍ଚଳ ସାହୁଙ୍କ ପୁତ୍ର ଜଗନ୍ନାଥ ସାହୁ ଗତ ୨୦୨୩ରେ ମ.ରାମପୁର ଥାନା ଅଧିନସ୍ଥ ବାଞ୍ଜିପଦର(ସାପଲହରା)ଗ୍ରାମର କୌତୁକ ସାହୁଙ୍କ କନ୍ୟା କ୍ଷୀରବତୀ ସାହୁଙ୍କୁ ବୈଦିକ ରୀତିନୀତି ଅନୁସାରେ ବିବାହ କରିଥିଲେ। କିଛି ମାସ ସ୍ବାମୀ ସ୍ତ୍ରୀ ଭଲରେ ଜୀବନଯାପନ କଲା ପରେ କ୍ଷୀରବତୀଙ୍କୁ ଶାଶୁ ଘରେ ବିଭିନ୍ନ ଯୌତୁକ ଦାବି ଓ ଶାରୀରିକ ନିର୍ଯାତନା ଦେଇ ଖାଇବା ପିଇବା ପାଇଁ ଖାଦ୍ୟପେୟ ନ ଦେଇ ନିର୍ଯାତନା ଦେଇ ଆସୁଥିଲେ। ଚଳିତ ମାସ ୧୦ ତାରିଖ ରାତିରେ ଜଗନ୍ନାଥଙ୍କ ପରିବାରଙ୍କ ମିଳିତ ଉଦ୍ୟମରେ କ୍ଷୀରବତୀଙ୍କୁ ମାଡ଼ମାରି ତଣ୍ଟି ଚିପି ବିଷ ପିଆଇ ଦେଇଥିବା ଝିଅର ବାପା କୌତୁକ ସାହୁ ଗ୍ରାମ ବାଞ୍ଜିପଦର (ସାପଲହରା) ଥାନା ଏମ୍.ରାମପୁରର ଗତ ୧୧.୯.୨୫ କେସିଙ୍ଗା ଥାନାରେ ଏକ ଲିଖିତ ଅଭିଯୋଗ କରିଥିଲେ। କେସିଙ୍ଗା ପୋଲିସ ସମସ୍ତ ତଦନ୍ତ ପରେ ମୃତ କ୍ଷୀରବତୀ ସାହୁଙ୍କ ସ୍ବାମୀଙ୍କୁ ଗିରଫ କରି କୋର୍ଟ ଚାଲାଣ କରି ଥିବା ଜଣାପଡ଼ିଛି। କିନ୍ତୁ ଦୁଃଖର ବିଷୟ ଏହିକ ିଯେ ଦୀର୍ଘ ୧୪ ଦିନ ବିତି ଯାଇଥିଲେ ସୁଦ୍ଧା ଫେରାର ଥିବା ଅଭିଯୁକ୍ତଙ୍କୁ ବର୍ତ୍ତମାନ ସୁଦ୍ଧା କେସିଙ୍ଗା ପୋଲିସ ଗିରଫ କରି ନ ଥିବାରୁ ଆଜି ଥାନା ଘେରାଉ କରି ଗଣଧାରଣା ଦିଆଯାଇ ଥିଲା। ଏ ନେଇ ଗତକାଲି ମଧ୍ୟ ଥାନାରେ ଲିଖିତ ଅଭିଯୋଗ କରାଯାଇଛି। ଫେରାର ଥିବା ରୋମାଞ୍ଚଳ ସାହୁ, ରୁଦେନ ସାହୁ ଓ ନେତ୍ର ସାହୁଙ୍କୁ ଗିରଫ ଦାବିରେ ଏକ ସ୍ମାରକପତ୍ର ଆଇଆଇସିଙ୍କୁ ମୃତ କ୍ଷୀରବତୀଙ୍କ ପରିବାର ଓ ସାହୁ ସମାଜ ପକ୍ଷରୁ ପ୍ରଦାନ କରାଯାଇଛି।
ଏହି ଧାରଣାରେ ତୈଳିକ ବୈଶ୍ୟ ହଳଦିଆ ସାହୁ ସମାଜ କଳାହାଣ୍ଡିର ସଭାପତି ନୀଳମଣି ସାହୁ, ସମ୍ପାଦକ ନବୀନ ସାହୁଙ୍କ ସମେତ ସମସ୍ତ ଜିଲା ଉପସଭାପତି, ଯୁଗ୍ମ ସମ୍ପାଦକ, ବ୍ଲକ ସଭାପତି, ସମ୍ପାଦକ, ଗ୍ରାମ୍ୟ କମିଟି ସଭାପତି, ସମ୍ପାଦକଙ୍କ ସମେତ ଶତାଧିକ କର୍ମକର୍ତ୍ତା ଏହି ଧାରଣାରେ ଯୋଗଦେଇଥିଲେ। ଏ ସଂକ୍ରାନ୍ତରେ କେସିଙ୍ଗା ଆଇଆଇସି ଜିତେନ୍ଦ୍ର ବିଶ୍ବାଳଙ୍କୁ ପଚାରିବାରୁ ତଦନ୍ତ ଜାରି ରହିଛି। ଅଭିଯୁକ୍ତ ଧରାପଡ଼ିଲେ କୋର୍ଟ ଚାଲାଣ କରାଯିବ ବୋଲି ପ୍ରକାଶ କରିଥିଲେ।
