ହାଇଦ୍ରାବାଦ,୩୧।୭: ତେଲେଙ୍ଗାନାରେ ସରକାରୀ ବିଦ୍ୟୁତ ବିତରଣ କମ୍ପାନୀର ଜଣେ ମହିଳା କର୍ମଚାରୀଙ୍କୁ ପିଛା କରିବା ଅଭିଯୋଗରେ ଜଣେ ବରିଷ୍ଠ ପୋଲିସ ଅଧିକାରୀଙ୍କ ବିରୋଧରେ ମାମଲା ରୁଜୁ ହୋଇଛି। ପୋଲିସ ଏ ସମ୍ପର୍କରେ ସୂଚନା ଦେଇଛି। ମହିଳାଙ୍କ ଅଭିଯୋଗ ଆଧାରରେ ଆଇପିସି ଧାରା ୩୫୪-ଡି ଅଧୀନରେ ଥିବା ଚୈତନ୍ୟପୁରୀ ପୋଲିସ ଷ୍ଟେଶନରେ କ୍ରାଇମବ୍ରାଞ୍ଚ ତଦନ୍ତ ବିଭାଗର ଅଧୀକ୍ଷକଙ୍କ ବିରୋଧରେ ମାମଲା ରୁଜୁ ହୋଇଛି।
ମହିଳା ଜଣକ ନିଜ ଅଭିଯୋଗରେ କହିଛନ୍ତି ଯେ, ସେ ସହରର ସରୁରନଗର ଷ୍ଟାଡିୟମରେ ଜାତୀୟ ଚାମ୍ପିୟନଶିପ ପାଇଁ ପ୍ରସ୍ତୁତି ଚଳାଇଥିଲେ। ଏହି ସମୟରେ ଅଧିକାରୀଙ୍କ ସଂସ୍ପର୍ଶରେ ସେ ଆସିଥିଲେ। ସେ ଜଣେ ବରିଷ୍ଠ ପୋଲିସ ଅଧିକାରୀ ହୋଇଥିବାରୁ ଫୋନ ନମ୍ବର ତାଙ୍କୁ ମଧ୍ୟ ନେଇଥିଲେ।
ମହିଳା ଅଭିଯୋଗରେ କହିଛନ୍ତି ଯେ ଅଧିକାରୀ ତାଙ୍କ ପୁରୁଣା ହିନ୍ଦୀ ରୋମାଣ୍ଟିକ ଗୀତ, ବିଭିନ୍ନ ପ୍ରକାରର ସାୟରୀର ଭିଡିଓ ଏବଂ ନିଜର ଫଟୋ ପଠାଇବା ଆରମ୍ଭ କରିଥିଲେ। ଏହା ବ୍ୟତୀତ ଅଧିକାରୀ ଜଣକ ମହିଳାଙ୍କୁ ତାଙ୍କ ଫଟୋଗ୍ରାଫ ପଠାଇବାକୁ କହିଥିଲେ। ସେ ଏହାର ଜବାବ ଏକ ବର୍ଷ ପର୍ଯ୍ୟନ୍ତ ଦେଇ ନ ଥିଲେ। ନିକଟରେ ଏକ ଦୁର୍ଘଟଣା ସଂପର୍କରେ ଅଧିକାରୀ ତାଙ୍କୁ ଫୋନ କରି କହିଥିଲେ ଯେ ସେ ବନ୍ଧୁତା ବଜାୟ ରଖିବାକୁ ଏବଂ ତାଙ୍କୁ ସବୁ କ୍ଷେତ୍ରରେ ସାହାଯ୍ୟ କରିବାକୁ ଚାହୁଁଛନ୍ତି। ଅଭିଯୋଗ ଆଧାରରେ ପୋଲିସ ଏକ ମାମଲା ରୁଜୁ କରିଛି। ତଦନ୍ତ ଚାଲିଛି।
