ପାଟନା, ୩।୭ : ପାଟନାରେ ଅତିକ୍ରମଣ ହଟାଇବା ସମୟରେ ପୋଲିସ ଉପରେ ଆକ୍ରମଣ କରାଯାଇଛି। ଏଥିରେ ବହୁ ପୋଲିସ କର୍ମଚାରୀ ଗୁରୁତର ଆହତ ହୋଇଛନ୍ତି। ଏହି ଆକ୍ରମଣରେ ସିଟି ଏସପି ଅମ୍ରିଶ ରାହୁଲ ମଧ୍ୟ ଆହତ ହୋଇଛନ୍ତି। ପୋଲିସ ଅତିକ୍ରମଣ ହଟାଇବା ପାଇଁ ରାଜୀବ ନାଗରରେ ପହଞ୍ଚିଥିଲା। ଏଥିପାଇଁ ୧୭ ଟି ଜେସିବି ନିୟୋଜିତ କରାଯାଇଥିଲା। ୨୦୦୦ରୁ ଅଧିକ ପୋଲିସ ଫୋର୍ସ ମଧ୍ୟ ମୁତୟନ ହୋଇଥିଲେ। ସ୍ଥାନୀୟ ଲୋକଙ୍କ ବିରୋଧ ପରେ ମଧ୍ୟ ପୋଲିସର କାର୍ଯ୍ୟାନୁଷ୍ଠାନ ବନ୍ଦ ହୋଇନାହିଁ।
ପୋଲିସ ଘର ଭାଙ୍ଗୁଛି। ଲୋକମାନେ ନିଜ ଘରର ଛାତରୁ ଅନ୍ୟ ଘରଗୁଡ଼ିକ ଭଙ୍ଗାଯାଉଥିବାର ଦେଖୁଛନ୍ତି। ପାଟନା ଡିଏମ ମଧ୍ୟ ଘଟଣାସ୍ଥଳରେ ପହଞ୍ଚିଛନ୍ତି। ରାଜୀବ ନାଗର ପୋଲିସ ଷ୍ଟେଶନ ଅଧୀନରେ ଥିବା ନେପାଳୀ ନଗରର ୭୦ ଘର ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଛି। ଏ ବିଷୟରେ ସ୍ଥାନୀୟ ଲୋକଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ପୋଲିସ କହଛି ଯେ ଯେତେବେଳେ ଆମେ ଅତିକ୍ରମଣ ହଟାଇବାକୁ ଆସିଲୁ ସେତେବେଳେ ସ୍ଥାନୀୟ ଲୋକେ ଆମକୁ ଆକ୍ରମଣ କରିଥିଲେ। ଲୋକମାନେ ନିଜ ଘରର ଛାତ ଉପରୁ ଆମ ଉପରେ ପଥର ଫିଙ୍ଗିବାକୁ ଆରମ୍ଭ କରିଥିଲେ। ଫଳରେ ବହୁ ପୋଲିସ ଆହତ ହୋଇଥିଲେ।
ପରିସ୍ଥିତିକୁ ନିୟନ୍ତ୍ରଣକୁ ଆଣିବା ପାଇଁ ପୋଲିସକୁ ଲୁହବୁହା ଗ୍ୟାସ ସେଲ ବ୍ୟବହାର କରିବାକୁ ପଡ଼ିଛି। ନେପାଳୀ ନଗରରେ ପରିସ୍ଥିତି ଉତ୍ତେଜନାପୂର୍ଣ୍ଣ ଥିବାରୁ ଏଠାରେ ବହୁ ସଂଖ୍ୟକ ପୋଲିସ ମୁତୟନ ହୋଇଛନ୍ତି। ପାଟନା ଡିଏମ ଚନ୍ଦ୍ରଶେଖର ସିଂ କହିଛନ୍ତି ଯେ କାର୍ଯ୍ୟାନୁଷ୍ଠାନ ଜାରି ରହିବ। ଆମେ ଯେକୌଣସି ମୂଲ୍ୟରେ ଜମିକୁ ସରକାରଙ୍କ ଅଧୀନକୁ ଅଣାଯିବ। ଲୋକଙ୍କ ଆକ୍ରମଣରେ ଦୁଇ ଜଣ ଯବାନ ଏବଂ ସିଟି ଏସପି ଆହତ ହୋଇଛନ୍ତି ବୋଲି ଡିଏମ କହିଛନ୍ତି। ୧୨ ଜଣଙ୍କୁ ଗିରଫ କରାଯାଇଛି। ବାକି ଲୋକଙ୍କୁ ଭିଡିଓ ଏବଂ ସିସିଟିଭି ଫୁଟେଜରୁ ଚିହ୍ନଟ କରାଯାଉଛି। ଡିଏମ କହିଛନ୍ତି ଯେ ବର୍ତ୍ତମାନ ପରିସ୍ଥିତି ସମ୍ପୂର୍ଣ୍ଣ ନିୟନ୍ତ୍ରଣରେ ଅଛି। ଅତିକ୍ରମଣ ହଟାଇବା କାମ ଶାନ୍ତିରେ ଚାଲିଛି । ଡିଏମ କହିଛନ୍ତି ଯେ ଲୋକଙ୍କୁ ପୂର୍ବରୁ ସୂଚନା ଦିଆଯାଇଥିଲା, କିନ୍ତୁ ଲୋକମାନେ ଶୁଣିଲେ ନାହିଁ।
ପୋଲିସ କହିଛି ଯେ ଏହି ୭୦ ଟି ଘର ବେଆଇନ ଭାବେ ହାଉସିଂ ବୋର୍ଡ ଜମିରେ ନିର୍ମିତ ହୋଇଛି। ଆମେ ସମସ୍ତଙ୍କୁ ନୋଟିସ ପଠାଇ ସାରିଛୁ। ସେମାନଙ୍କୁ ଘର ଖାଲି କରିବାକୁ ନିର୍ଦ୍ଦେଶ ଦିଆଯାଇଥିଲା।
ଏନେଇ ସ୍ଥାନୀୟ ଲୋକ କୁହନ୍ତି ଯେ ଆମେ ପ୍ରତି ମାସରେ ମ୍ୟୁନିସିପାଲିଟି କର୍ପୋରେଶନକୁ ଟ୍ୟାକ୍ସ ଦେଉଛୁ। ତେବେ ଆମ ଘର କିପରି ବେଆଇନ ହେଲା? ବିଦ୍ୟୁତ୍, ଜଳ ସଂଯୋଗ ଆଦି ସମସ୍ତ ସରକାରୀ ସୁବିଧା ଆମକୁ ଯୋଗାଇ ଦିଆଯାଇଛି। ଏପରିସ୍ଥଳେ ଆମ ଘର କିପରି ବେଆଇନ ହେଲା ବୋଲି ସେମାନେ ପ୍ରଶ୍ନ କରିଛନ୍ତି। ପ୍ରଶାସନ ଆମ ସହ କଥାବାର୍ତ୍ତା କରୁନାହିଁ ଏବଂ ଏହାକୁ ବେଆଇନ ବୋଲି କହି ଆମ ଘରକୁ ଭାଙ୍ଗୁଛି ବୋଲି ସେମାନେ ଅଭିଯୋଗ କରିଛନ୍ତିି। ଆମେ ଆମ ଘରେ ଜୀବନ ଯାକର ପୁଞ୍ଜି ବିନିଯୋଗ କରିଥିଲୁ। ଏଭଳି କରି ପ୍ରଶାସନ ଆମକୁ ବେସାହାରା ଭାବେ ରାସ୍ତାରେ ଛାଡି ଦେଇଥିବା ସେମାନେ କହିଛନ୍ତି।
