ଲୋଇସିଂହା,୧୮।୮(ସୁଶାନ୍ତ ବାରିକ): ବଲାଙ୍ଗୀର ଜିଲା ଲୋଇସିଂହା ଥାନା ଅଧୀନ ସାଲେଭଟାରୁ ଏକ ଚାଉଳ ବୋଝେଇ ଟ୍ରକକୁ(ନଂ. ଓଡି୧୫ସି-୪୦୬୨) ଲୋଇସିଂହା ପୋଲିସ ଶୁକ୍ରବାର ଜବତ କରିଛି। ହରଭଙ୍ଗା ଅଞ୍ଚଳରୁ ପଦ୍ମପୁର ଅଞ୍ଚଳକୁ ଯାଉଥିବା ଉକ୍ତ ଟ୍ରକରେ ୩୮୦ ପ୍ୟାକେଟ ଚାଉଳ ଥିବା ପୋଲିସ ଜାଣିବାକୁ ପାଇଛି।
ରିସାଇକ୍ଲିଂ ପାଇଁ ପିଡିଏସ୍ ଚାଉଳକୁ ଚୋରାଚାଲାଣ କରୁଥିବା ନେଇ ପୋଲିସ ସନ୍ଦେହ କରୁଛି। ପୋଲିସଠାରୁ ସୂଚନା ପାଇ ଲୋଇସିଂହା ଓ ଆଗଲପୁର ଦାୟିତ୍ୱରେ ଥିବା ବ୍ଲକ ଯୋଗାଣ ନିରୀକ୍ଷକ ସୌମ୍ୟରଞ୍ଜନ ମହାନନ୍ଦ ଥାନାରେ ପହଞ୍ଚି ଚାଉଳର ନମୁନା ସଂଗ୍ରହ କରିଛନ୍ତି। ସରକାରୀ ସିଲ୍ ବସ୍ତା ନୁହେଁ। ଜବତ ଟ୍ରକରେ ଜରି ବସ୍ତାରେ ଚାଉଳ ରହିଛି। ଏନେଇ ଅଧିକ ତଦନ୍ତ ଚାଲିଥିବା ବ୍ଲକ ଯୋଗାଣ ନିରୀକ୍ଷକ ମହାନନ୍ଦ କହିଛନ୍ତି।
ପୋଲିସ ସୂଚନା ଅନୁଯାୟୀ, ଆଗଲପୁର ବ୍ଲକ ହରଭଙ୍ଗା ଅଞ୍ଚଳରୁ ଏକ ଟ୍ରକରେ ପିଡିଏସ୍ ଚାଉଳ ଚାଲାଣ କରାଯାଉଥିବା ନେଇ ଲୋଇସିଂହା ପୋଲିସକୁ ବିଶେଷ ସୂତ୍ରରୁ ଖବର ମିଳିଥିଲା। ଏନେଇ ଆଇଆଇସି ଯାଜ୍ଞସିନୀ ନାୟକ, ଏସ୍ଆଇ ଅବିନାଶ ନାୟକ ଓ କର୍ମଚାରୀ ସାଲେଭଟାରେ ଛକି ରହିଥିଲେ। ଉକ୍ତ ଟ୍ରକକୁ ଅଟକାଇ ଯାଞ୍ଚ କରିବାରୁ ଜରି ବସ୍ତାରେ ପିଡିଏସ୍ ଚାଉଳ ଥିବା ଜଣାପଡିଥିଲା। ଅନ୍ୟପକ୍ଷେ ଟ୍ରକ କର୍ମଚାରୀ ଆବଶ୍ୟକ କାଗଜାତ ଦେଖାଇ ପାରି ନ ଥିଲେ। ଅପରପକ୍ଷେ ପୋଲିସ ଟ୍ରକ କର୍ମଚାରୀଙ୍କୁ ଅଟକ ରଖି ଅଧିକ ତଦନ୍ତ ଚଲାଇଛି।
