ପୁରୁଷୋତ୍ତମପୁର,୨୮।୭(ସିମାଞ୍ଚଳ ମିଶ୍ର): ଗଞ୍ଜାମ ଜିଲା ପୁରୁଷୋତ୍ତମପୁର ଥାନା ଅନ୍ତର୍ଗତ ହାଣ୍ଡିଘର ଗ୍ରାମରେ ଏକ ଅଭାବନୀୟ ଘଟଣା ଘଟିଛି । ଗୋଟିଏ ପରିବାର ଉପରେ ସମ୍ପର୍କିୟ ଦାଦାଙ୍କ ପରିବାର ଜମିଜମା ବିବାଦକୁ ନେଇ ଖଣ୍ଡାରେ ହାଣିଥିବା ଅଭିଯୋଗ ହୋଇଛି। ଆହାତ ହୋଇଥିବା ବ୍ୟକ୍ତିମାନେ ହେଲେ ଭାଗିରଥି ମହାନ୍ତି(୫୫), ଗୋପାଳ ମହାନ୍ତି(୪୦) କାହ୍ନୁ ମହାନ୍ତି(୨୮) ଓ ଅମ୍ବିକା ପାଣିଗ୍ରାହୀ(୩୦) ବୋଲି ଜଣାପଡିଛି। ସେମାନଙ୍କୁ ଗୁରୁତର ଅବସ୍ଥାରେ ଗ୍ରାମବାସୀ ଉଦ୍ଧାରକରି ପ୍ରଥମେ ପୁରୁଷୋତ୍ତମପୁର ଗୋଷ୍ଠି ସ୍ବାସ୍ଥ୍ୟକେନ୍ଦ୍ରକୁ ଆଣିଥିବା ବେଳେ ସେଠାରୁ ବ୍ରହ୍ମପୁର ବଡ ମେଡିକାଲ ଓ ପରେ ବିଶାଖାପାଟଣାକୁ ସ୍ଥାନାନ୍ତର କରାଯାଇଛି। ଏହାକୁ ନେଇ ଖବରଦାତା ସମ୍ମିଳନୀରେ ପୁରୁଷୋତ୍ତମପୁର ଏସଡିପିଓ ସୁଜିତ କୁମାର ନାୟକ କହିଛନ୍ତି, ଆକ୍ରମଣର ଶିକାର ହୋଇଥିବା ଉଭୟ ପରିବାର ସମ୍ପର୍କିୟ ପରିବାର ଅଟନ୍ତି । ଆହାତଙ୍କ ପକ୍ଷରୁ ବାବୁଚରଣ ମହାନ୍ତି ପୋଲିସରେ ଅଭିଯୋଗ କରିଛନ୍ତି, ତାଙ୍କ ବାପାଙ୍କ ଶୁଦ୍ଧ କାର୍ଯ୍ୟକୁ ନେଇ ପରିବାରଲୋକେ ଘରବାରଣ୍ଡାରେ ବସି କଥା ହେଉଥିବାବେଳେ ସେହି ଗ୍ରାମର ପାଧା ଓରଫ ଶାନ୍ତନୁ ମହାନ୍ତି(୩୩), କାଳିଆ ଓରଫ ସାଧୁମହାନ୍ତି(୨୯),କର୍ଣ୍ଣ ମହାନ୍ତି (୬୫) ଓ ସୁମତି ମହାନ୍ତି ହଟାତ ଖଣ୍ଡାକାତି ଠେଙ୍ଗା ଆଦି ମାରଣାଅସ୍ତ୍ର ଧରିଆସି ହାଣି ଆକ୍ରମଣ କରିଥିଲେ। ଏହାକୁ ନେଇ ଥାନା କେସ୍ ନଂ ୫୭୯/୨୫ ପ୍ରକାରେ ଘଟଣାର ତଦନ୍ତକରି ଅଭିଯୁକ୍ତ ବାପ ପୁଅ ତିନିଜଣଙ୍କୁ ଗିରଫକରି କୋର୍ଟଚାଲାଣ କରାଯାଇଥିବା ବେଳେ ତଦନ୍ତ ଚାଲିଛି ବୋଲି ଏସଡିପିଓ କହିଛନ୍ତି।
