ଅନୁଗୋଳ ଅଫିସ, ୧୩ା୭ ବ୍ରାଣ୍ଡେଡ୍ ପୋଷାକକୁ ଏକ ଆଭିଜାତ୍ୟର ପରିଚୟ ଦିଆଗଲାଣି। ବ୍ୟକ୍ତିତ୍ୱ ଯେମିତି ହେଉ ନା କାହିଁକି, ଆଜିକାଲିର ଯୁବପିଢ଼ିଙ୍କ ଏହା ପ୍ରଥମ ପସନ୍ଦ ପାଲଟିଲାଣି। ସେମାନଙ୍କ ମଧ୍ୟରେ ବ୍ରାଣ୍ଡ ଏକ ଫ୍ୟାଶନ ହୋଇଗଲାଣି। ତେଣୁ ଯୁବତୀଯୁବକଙ୍କ ଆଗ୍ରହକୁ ଦୃଷ୍ଟିରେ ରଖି ବହୁ ନାମୀଦାମୀ କମ୍ପାନୀ ପୋଷାକ ବଜାରକୁ କବ୍ଜା କରିନେଲେଣି। ଉଚ୍ଚ ଦାମ୍ ସତ୍ତ୍ୱେ ଚାହିଦା ବଢ଼ୁଥିବାରୁ ଏଥିରୁ ଲାଭ ଉଠାଇବାକୁ କେତୋଟି ଶସ୍ତା କପଡ଼ା କମ୍ପାନୀ ଏଥିରେ ଜାଲିଆତି ଚଳାଇଛନ୍ତି। ସେମାନଙ୍କ ପୋଷାକରେ ବ୍ରାଣ୍ଡେଡ୍ କମ୍ପାନୀର ନାମ ଓ ଲୋଗୋ ବ୍ୟବହାର କରି ତାହାକୁ ବଜାରକୁ ପଠାଇ ପ୍ରବଳ ଅର୍ଥ ରୋଜଗାର କରୁଛନ୍ତି। କେତେଜଣ ଦୋକାନୀ ମଧ୍ୟ ନକଲିକୁ ଅସଲି କହି ବ୍ରାଣ୍ଡେଡ୍ କପଡ଼ା କିଣୁଥିବା ଗ୍ରାହକଙ୍କ ବିଶ୍ୱାସରେ ବିଷ ଭରିଦେଉଛନ୍ତି। ଏପରି ନକଲି ସାମଗ୍ରୀ ବିକ୍ରି କରୁଥିବା ଅଭିଯୋଗରେ ଅନୁଗୋଳ ବଜାରର ଜଣେ ପୋଷାକ ବ୍ୟବସାୟୀ ଗିରଫ ହେବା ପରେ ଏହା ଜିଲାବାସୀଙ୍କ ମଧ୍ୟରେ ଚିନ୍ତାର କାରଣ ହୋଇଛି।
ଅନୁଗୋଳ ସହରରେ ଅନେକ ପୋଷାକ ଦୋକାନ ରହିଛି। ସେଥିରୁ କେତୋଟିରେ କେବଳ ବ୍ରାଣ୍ଡେଡ୍ ସାମଗ୍ରୀ ବିକ୍ରି ହେଉଥିବାବେଳେ କେତେଜଣ ବ୍ୟବସାୟୀ ନାମୀଦାମୀ କମ୍ପାନୀର ପୋଷାକ ସହ ଶସ୍ତା କପଡ଼ା ମଧ୍ୟ ବିକ୍ରି କରନ୍ତି। ହେଲେ ବିଭିନ୍ନ ବ୍ରାଣ୍ଡ୍ ନାମରେ ଗ୍ରାହକଙ୍କୁ ଯେ ଶସ୍ତା ତଥା ନକଲି ପୋଷାକ ବିକ୍ରି କରାଯାଉଛି, ଏହା ସେମାନଙ୍କ ବିଶ୍ୱାସ ବାହାରେ। ପୂର୍ବରୁ ଖାଉଟି ସାମଗ୍ରୀରେ ନକଲି କାରବାର ହେଉଥିଲା। ତେଲ, ଚିନି, ହଳଦୀଗୁଣ୍ଡ, ଲଙ୍କାଗୁଣ୍ଡଠାରୁ ଆରମ୍ଭ କରି ପିଲାଙ୍କ ପ୍ୟାକେଟ୍ ଖାଦ୍ୟରେ ଅନୁଗୋଳରେ ଅପମିଶ୍ରଣ ଧରାପଡ଼ିଥିଲା। ଏହାକୁ ନେଇ ଚଢ଼ାଉ, ଗିରଫଦାରି ହେଲା। କିନ୍ତୁ ଶସ୍ତା ପୋଷାକରେ ଦାମୀ କମ୍ପାନୀ ନାମ ବ୍ୟବହାର କରାଯାଇ ଗ୍ରାହକଙ୍କୁ ଆକଷର୍ର୍ିତ କରିବାକୁ ଅଫ୍ର ଦିଆଯାଉଥିବା ଘଟଣାର ଏବେ ପର୍ଦ୍ଦାଫାଶ ହୋଇଛି। ଏହା ଯୁବପିଢ଼ିଙ୍କୁ ଯେତିକି ବ୍ୟଥିତ କରିଛି, ବ୍ରାଣ୍ଡେଡ୍ ପୋଷାକ କମ୍ପାନୀ ଓ ଅନୁଗୋଳରେ ଥିବା ଡିଲରମାନଙ୍କୁ ସେତିକି କ୍ଷତିରେ ପକାଇଛି। ଏହି ଜାଲିଆତି ଯୋଗୁ ଡିଲରମାନଙ୍କ ନିକଟରେ ଦୀର୍ଘଦିନ ଧରି ମାଲ୍ ପଡ଼ିରହୁଛି। ପୋଷାକରେ ଏପରି ଜାଲିଆତି ଜାଣି ନ ପାରି ଠକାମିର ଶିକାର ହେଉଥିବା ଗ୍ରାହକଙ୍କ ନିକଟରେ ଓ ବଜାରରେ କମ୍ପାନୀର ନାମ ଖରାପ ହେଉଛି। ତେଣୁ ଅନୁଗୋଳ ପୋଲିସ ଏହାର ଜୋରଦାର ଖୋଳତାଡ଼ କରିବାକୁ ପୋଷାକ ଡିଲରମାନଙ୍କ ପକ୍ଷରୁ ଦାବି ହେଉଛି।
ଅଭିଯୋଗ ଆସିଲେ ତୁରନ୍ତ କାର୍ଯ୍ୟାନୁଷ୍ଠାନ
ନାମୀଦାମୀ କମ୍ପାନୀର ଷ୍ଟିକର ଲଗାଇ ନକଲି ପୋଷାକ ବିକ୍ରି ନେଇ ଅଭିଯୋଗ ଆସିଲେ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ। ଏକ କମ୍ପାନୀର କ୍ୱାଲିଟି ମ୍ୟାନେଜର ଏପରି ଅଭିଯୋଗ କରିବା ପରେ ପୋଲିସ ଜଣଙ୍କୁ ଗିରଫ କରିଛି। ଅନ୍ୟ କମ୍ପାନୀ ଅଧିକାରୀ ବା ଡିଲରମାନେ ବଜାର ଉପରେ ନଜର ରଖିବା ସହ ପୋଲିସକୁ ଖବର ଦିଅନ୍ତୁ।
-ଜଗମୋହନ ମୀନା, ଏସ୍ପି, ଅନୁଗୋଳ
ସାଧାରଣ ଲୋକେ ଜାଣିବା କଷ୍ଟକର
କେଉଁ ଦୋକାନୀ କମ୍ପାନୀର ଅସଲି ପୋଷାକ ବିକ୍ରି କରୁଛନ୍ତି ଓ କିଏ ନକଲିକୁ ଅସଲି କହି ଗ୍ରାହକଙ୍କୁ ଦେଉଛନ୍ତି, ତାହା ଜାଣିବା ସାଧାରଣ ଲୋକଙ୍କ ପକ୍ଷେ କଷ୍ଟକର। ଅନେକ ସମୟରେ ଏ ନେଇ ଅଭିଯୋଗ କଲେ ପୋଲିସ ପକ୍ଷରୁ ସହଯୋଗ ମିଳି ନ ଥାଏ। କିନ୍ତୁ ଅନୁଗୋଳ ପୋଲିସ ସମ୍ପୂର୍ଣ୍ଣ ସହଯୋଗ କରିଥିବାରୁ ସାଧୁବାଦ୍।
-ଯୁଗଳ କିଶୋର ଆହୁଜା, କ୍ୱାଲିଟି କଣ୍ଟ୍ରୋଲ ମ୍ୟାନେଜର
ମାଲ୍ ଥାଇ ବିକ୍ରି ହୋଇପାରୁ ନାହିଁ
ବ୍ରାଣ୍ଡେଡ୍ କମ୍ପାନୀ ନାମ ଥାଇ ବଜାରରେ ନକଲି ପୋଷାକ ବିକ୍ରି କରାଯାଉଛି। କେତେଜଣ ଦୋକାନୀ ଏପରି ପୋଷାକକୁ ଅସଲି କହି କିଛି ଅର୍ଥ କମ୍ରେ ଦେଉଛନ୍ତି। ଫଳରେ ଲୋକେ ଠକାମିର ଶିକାର ହେଉଛନ୍ତି। ଏହାଦ୍ୱାରା ବ୍ରାଣ୍ଡେଡ୍ କମ୍ପାନୀ ଉପରୁ ଲୋକଙ୍କ ଭରସା ତୁଟୁଛି। ଡିଲରଙ୍କ ନିକଟରେ ମାଲ୍ ଗଦା ହୋଇଥିଲେ ବି ତାହା ବିକ୍ରି ହେଉନାହିଁ।
-ପୱନ କୁମାର ମାଣ୍ଡୋଠିଆ, କପଡ଼ା ବ୍ୟବସାୟୀ
କମ୍ପାନୀ ଉପରୁ ଭରସା ତୁଟୁଛି
ଅନୁଗୋଳ ବଜାରରେ ନକଲି ସାମଗ୍ରୀ ଭରିଗଲାଣି। ଅଧିକ ଅର୍ଥ ଦେଇ ଲୋକେ ବ୍ରାଣ୍ଡେଡ୍ କପଡ଼ା କିଣୁଥିବା ଭାବୁଥିଲେ ମଧ୍ୟ କିଛି ଦିନ ପରେ ତାହା ନଷ୍ଟ ହୋଇଯାଉଛି। ତେଣୁ କମ୍ପାନୀ ଉପରୁ ଗ୍ରାହକଙ୍କ ଭରସା ତୁଟିଯାଉଥିବା ବେଳେ ପ୍ରକୃତରେ ସେମାନେ ଅଧିକ ଅର୍ଥ ଦେଇ ନକଲି ପୋଷାକ କିଣିଥିବା ଜାଣିପାରୁ ନାହାନ୍ତି। ସ୍ବତନ୍ତ୍ର ସ୍କ୍ବାଡ୍ ଗଠନ କରାଯାଇ ଦୋକାନ ଗୁଡ଼ିକରେ ଯାଞ୍ଚ ହେବା ଆବଶ୍ୟକ।
-ବରଦା ପ୍ରସନ୍ନ ଦାସ, ଗ୍ରାହକ, ଅନୁଗୋଳ
