ସମ୍ବଲପୁର,୧୭ା୧୦(ବ୍ୟୁରୋ): କଚ୍ଚାଘର ସବୁ ପକ୍କା ହୋଇଯିବ। ସମସ୍ତଙ୍କ ଘରେ କଂକ୍ରିଟ ଛାତ ରହିବ। ୨୦୨୨ ମସିହା ସୁଦ୍ଧା ଆଉ କେହି ବାସହରା ହୋଇ ରହିବେ ନାହିଁ। କେନ୍ଦ୍ର ସରକାର ୫ ବର୍ଷିଆ ଦୀର୍ଘମିଆଦୀ ଯୋଜନା କରିଛନ୍ତି। ଏଭଳି ନାରାବାଜି ଓ ନିର୍ବାଚନୀ ଇସ୍ତାହାର ଦେଇ ଭାଜପା କ୍ଷମତାକୁ ଆସିଥିଲା। ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କଠାରୁ ଆରମ୍ଭ କରି ରାଜ୍ୟ, ଜିଲାସ୍ତରୀୟ ଭାଜପା ନେତା ଓ ବିଧାୟକମାନେ ନିଜ ବକ୍ତବ୍ୟରେ ଏହାକୁ ଦୋହରାଇଥିଲେ। ହେଲେ ସମ୍ବଲପୁର ଜିଲାରେ ପ୍ରଧାନମନ୍ତ୍ରୀ ଆବାସ ଯୋଜନା (ପିଏମ୍ଏଓ୍ବାଇ) ଫମ୍ପା ପ୍ରତିଶ୍ରୁତି ପାଲଟିଛି। ୨୦୨୨ ସୁଦ୍ଧା ଏହି ଯୋଜନାର ଧାର୍ଯ୍ୟ ଲକ୍ଷ୍ୟ ପୂରଣ ପାଇଁ ସମୟସୀମା ରହିଥିବାବେଳେ ଜିଲାରେ ୨୨,୪୯୮ଜଣ ଆବେଦନକାରୀ ଘର ପାଇବା ଅପେକ୍ଷାରେ ରହିଛନ୍ତି। ଦୀର୍ଘ ୩ବର୍ଷ ମଧ୍ୟରେ ଜିଲାକୁ ମାତ୍ର ୧୪୫ ଘର ଆସିଛି। ଅନ୍ୟପକ୍ଷରେ ବହୁ ଗରିବ ପରିବାର ଘର ପାଇବା ପାଇଁ ନିଜର ନାମ ପଞ୍ଜୀକରଣ କରିପାରିନାହାନ୍ତି। ୨୦୧୭ରେ ବାକି ରହିଥିବା ଗରିବ ପରିବାର ଆବେଦନ କରିବାକୁ କୁହାଯାଇଥିଲା। ଜିଲାରେ ୭୨ ହଜାର ଲୋକ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର ପାଇଁ ଆବେଦନ କରିଥିଲେ। ଯାଞ୍ଚ ସମୟରେ ବିଭିନ୍ନ କାରଣରୁ ଅନେକ ଆବେଦନକାରୀଙ୍କୁ ବାଦ୍ ଦିଆଯାଇଥିବା ବେଳେ କେତେଜଣ ନିଜ ଇଚ୍ଛାରେ ପ୍ରତ୍ୟାହାର ମଧ୍ୟ କରିନେଇଥିଲେ। ଅନ୍ୟ ସରକାରୀ ଯୋଜନାରେ ମଧ୍ୟ କେତେକ ପରିବାରଙ୍କୁ ଘର ମିଳିଯାଇଛି। ହେଲେ ପ୍ରଧାନମନ୍ତ୍ରୀ ଆବାସ ଯୋଜନାରେ ୨୦୧୬ରୁ ୨୦୧୮ ମସିହା ମଧ୍ୟରେ ଯେଉଁ ସଂଖ୍ୟାରେ ଜିଲାକୁ ଘର ମିଳିଥିଲା ଏବେ ତାହା ବନ୍ଦ ହୋଇଯାଇଛି।
ମିଳିଥିବା ରିପୋର୍ଟ ଅନୁସାରେ,୨୦୧୧ ଜନଗଣନା ଅନୁସାରେ ହୋଇଥିବା ରିପୋର୍ଟକୁ ନେଇ ଆବାସ ଯୋଜନାରେ ପରିବାରଙ୍କୁ ସାମିଲ କରାଯାଇଥିଲା। ରାଜ୍ୟ ଓ କେନ୍ଦ୍ର ସରକାରଙ୍କ ମିଳିତ ଅନୁଦାନରେ ଏହି ଯୋଜନା କାର୍ଯ୍ୟକାରୀ କରାଯାଉଛି। ୨୦୧୬ ମସିହାଠାରୁ ଆରମ୍ଭ କରି ୨୦୨୧ ମସିହା ଭିତରେ ଘର ଯୋଗାଇଦେବାକୁ ଲକ୍ଷ୍ୟ ରଖାଯାଇଥିଲା। ସେ ସମୟରେ ଜିଲାରେ ପ୍ରାୟ ୮୫ ହଜାର ପରିବାର ଆବେଦନ କରିଥିବା ବେଳେ ବିଭିନ୍ନ କାରଣରୁ ୩୯,୪୫୬ ଜଣ ଚୂଡାନ୍ତ ତାଲିକାରେ ରହିଥିଲେ। କିନ୍ତୁ ୩୯,୩୪୮ ଗୋଟି ଘର ମଞ୍ଜୁର ହୋଇଥିଲା। ଏହି ୫ ବର୍ଷରେ ପର୍ଯ୍ୟାୟକ୍ରମେ ହିତାଧିକାରୀଙ୍କୁ କାର୍ଯ୍ୟାଦେଶ ବଣ୍ଟନ କରାଯାଇଥିଲା। ଟାର୍ଗେଟରୁ ୩୯,୧୨୩ ଘର ସମ୍ପୂର୍ଣ୍ଣ ହୋଇଯାଇଛି । ମାତ୍ର ୨୨୫ ଘର ଜମି ଓ ବିଭିନ୍ନ କାରଣରୁ ଶେଷ ହୋଇ ପାରିନାହିଁ। ନୂତନ ଆବେଦନକାରୀଙ୍କ ପାଇଁ ଅନୁଦାନ ନ ଆସିବା ମୁଖ୍ୟ ସମସ୍ୟା ହୋଇଛି।
ଏ ସମ୍ପର୍କରେ ଜିଲା ପରିଷଦ ନିର୍ବାହୀ ଅଧିକାରୀ ଦିଲୀପ କୁମାର ବଳ କହିଛନ୍ତି, ୫ ବର୍ଷ ପାଇଁ ଜିଲାକୁ ଯାହା ଟାର୍ଗେଟ ଦିଆଯାଇଥିଲା, ହାତଗଣତି କିଛି ଘର ଛାଡିଦେଲେ ବାକି ସମ୍ପୂର୍ଣ୍ଣ ହୋଇଯାଇଛି। ଏବେ ନୂତନ ଅନୁଦାନ ଆସିନାହିଁ। ଆସିବା ପରେ ଅପେକ୍ଷା କରିଥିବା ଆବେଦନକାରୀଙ୍କୁ ଘର ଦିଆଯିବ। ଅପେକ୍ଷାରେ ଥିବା ଆବେଦନକାରୀଙ୍କୁ କାର୍ଯ୍ୟାଦେଶ ଦେବା ପୂର୍ବରୁ ପୁଣି ଥରେ ଯାଞ୍ଚ କରାଯିବ ବୋଲି କହିଥିଲେ। ଏ ସମ୍ପର୍କରେ ବିରୋଧୀ ଦଳ ନେତା ତଥା ସମ୍ବଲପୁର ବିଧାୟକ ଜୟନାରାୟଣ ମିଶ୍ର କହିଛନ୍ତି, ୨୦୨୨ ସୁଦ୍ଧା ଧାର୍ଯ୍ୟ ଲକ୍ଷ୍ୟ ପୂରଣ କରିବାକୁ ଲକ୍ଷ୍ୟ ରହିଥିଲା। ହେଲେ ରାଜ୍ୟ ସରକାରଙ୍କ ଅବହେଳା ଯୋଗୁ ପୂରା ହୋଇପାରିଲା ନାହିଁ। ୨୦୨୪କୁ ପୁଣି ଲକ୍ଷ୍ୟ ରଖାଯାଇଛି। ପଶ୍ଚିମ ଓଡିଶାବାସୀଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଅବହେଳା କରୁଥିବା ଏହା ଏକ ଉଦାହରଣ। କାରଣ ବିଗତ ୩ବର୍ଷ ହେବ କେନ୍ଦ୍ର ପକ୍ଷରୁ ଯେତିକି ପରିମାଣର ଘର ଆସିଥିଲା ତାହା ଉପକୂଳ ଓଡ଼ିଶାବାସୀଙ୍କୁ ଦିଆଯାଇଛି। ଲକ୍ଷ୍ୟ ପୂରଣ କରିବା ପାଇଁ କମିଟିରେ ଉପସ୍ଥାପନା କରିଛି। ଶୀଘ୍ର ଅନୁଦାନ ଆସିଯିବ ବୋଲି ସେ କହିଥିଲେ।
