ନୂଆଦିଲ୍ଲୀ,୮।୨: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ଲୋକ ସଭାରେ ବିରୋଧୀ ଦଳକୁ ଟାର୍ଗେଟ୍ କରିଛନ୍ତି। କିନ୍ତୁ ବ୍ୟବସାୟୀ ଗୌତମ ଆଦାନୀଙ୍କ ପ୍ରସଙ୍ଗକୁ ନେଇ ବିରୋଧୀଙ୍କ ଅଭିଯୋଗ ଉପରେ ପ୍ରଧାନମନ୍ତ୍ରୀ କିଛି କହି ନାହାଁନ୍ତି। ଏ ସମ୍ପର୍କରେ ପୂର୍ବତନ କଂଗ୍ରେସ ସଭାପତି ରାହୁଲ ଗାନ୍ଧୀ ତାଙ୍କୁ ଘେରିଛନ୍ତି। ପ୍ରଧାନମନ୍ତ୍ରୀ ଆଦାନୀଙ୍କୁ ରକ୍ଷା କରୁଥିବା ଅଭିଯୋଗ କରି ରାହୁଲ କହିଛନ୍ତି, ପ୍ରଧାନମନ୍ତ୍ରୀ ଏହି ପ୍ରସଙ୍ଗରେ ଗୋଟିଏ ବି ଜବାବ ଦେଇନାହାଁନ୍ତି। ତାଙ୍କ ଭାଷଣରେ ସତ୍ୟ ଦୃଶ୍ୟମାନ ହେଉଛି। ଯଦି ସେ (ଆଦାନୀ) ତାଙ୍କ ବନ୍ଧୁ ନୁହଁନ୍ତି, ତେବେ ପ୍ରଧାନମନ୍ତ୍ରୀ ତଦନ୍ତ ହେବ ବୋଲି କହିପାରିଥାନ୍ତେ।
ଲୋକ ସଭାରେ ପ୍ରଧାନମନ୍ତ୍ରୀଙ୍କ ଭାଷଣ ପରେ ଗୃହ ବାହାରେ ଗଣମାଧ୍ୟରେ ଆଗରେ ପ୍ରଧାନମନ୍ତ୍ରୀଙ୍କୁ ଟାର୍ଗେଟ କରି ରାହୁଲ ଆହୁରି ମଧ୍ୟ କହିଛନ୍ତି, ତାଙ୍କ (ଆଦାନୀ) ସେଲ କମ୍ପାନୀ, ପ୍ରତିରକ୍ଷା ଶିଳ୍ପରେ ବହୁ ବେନାମୀ ଟଙ୍କା ବୁଲୁଛି। ପ୍ରଧାନମନ୍ତ୍ରୀ ଏହା ଉପରେ କିଛି କହିନାହାଁନ୍ତି। ଏଥିରୁ ଏହା ସ୍ପଷ୍ଟ ହୋଇଛି ଯେ, ପ୍ରଧାନମନ୍ତ୍ରୀ ସେମାନଙ୍କୁ ସୁରକ୍ଷା ଦେଉଛନ୍ତି। ଏହା ଜାତୀୟ ସୁରକ୍ଷା, ଭିତ୍ତିଭୂମି ବିଷୟ, ପ୍ରଧାନମନ୍ତ୍ରୀ ଏହା ଉପରେ କହିବା ଉଚିତ୍ ଥିଲା ଯେ ସେ ତଦନ୍ତ ନିର୍ଦ୍ଦେଶ ଦେବେ। ଏହା ଏକ ବଡ ଘୋଟାଲା। ସେ ନିଶ୍ଚିତ ଭାବରେ ସେମାନଙ୍କୁ ବଞ୍ଚାଇବାକୁ ଚେଷ୍ଟା କରୁଛନ୍ତି।
