ନୂଆଦିଲ୍ଲୀ,୨୭।୪: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବୁଧବାର ତୈଳ ମୂଲ୍ୟ ଉପରେ ଭାଟ୍ ହ୍ରାସ କରିବାକୁ ରାଜ୍ୟ ଗୁଡିକୁ କହିଛନ୍ତି। କରୋନା ଉପରେ ମୁଖ୍ୟମନ୍ତ୍ରୀଙ୍କ ସହ ବାର୍ତ୍ତାଳାପ ବେଳେ ପ୍ରଧାନମନ୍ତ୍ରୀ ମୋଦୀ ‘କୋଅପରେଟିଭ୍ ଫେଡେରାଲିଜିମ’ ଅଧୀନରେ ଭାଲ୍ୟୁ ଆଡେଡ୍ ଟ୍ୟାକ୍ସ (ଭାଟ) ହ୍ରାସ କରିବାକୁ ରାଜ୍ୟମାନଙ୍କୁ ନିବେଦନ କରିଛନ୍ତି। ଦେଶରେ ଦିନକୁ ଦିନ ପେଟ୍ରୋଲ-ଡିଜେଲ ଦର ବୃଦ୍ଧି ସମ୍ପର୍କରେ ପ୍ରଧାନମନ୍ତ୍ରୀ ମଧ୍ୟ ତୈଳ ମୂଲ୍ୟରେ ଭ୍ୟାଟ ହ୍ରାସ କରିଥିବା ରାଜ୍ୟଗୁଡିକର ଉଦାହରଣ ଦେଇଛନ୍ତି। ମୁଁ କାହାକୁ ସମାଲୋଚନା କରୁନାହିଁ, କେବଳ ଆଲୋଚନା କରୁଛି ବୋଲି ସେ କହିଛନ୍ତି।
ଇନ୍ଧନ ଉପରେ ଭ୍ୟାଟ ହ୍ରାସ କରିବା ବିଷୟରେ କେତେକ ରାଜ୍ୟ ଶୁଣୁନାହାଁନ୍ତି। ମହାରାଷ୍ଟ୍ର, ତେଲେଙ୍ଗାନା, ଆନ୍ଧ୍ରପ୍ରଦେଶ, ପଶ୍ଚିମବଙ୍ଗ, ତାମିଲନାଡୁ, ଝାଡ଼ଖଣ୍ଡ, କେରଳ କେତେକ କାରଣରୁ ଏହାକୁ ଅଣଦେଖା କରିଛନ୍ତି। କେନ୍ଦ୍ର ଦ୍ୱାରା ଏକ୍ସାଇଜ ଡ୍ୟୁଟି ହ୍ରାସ ହେବା ପରେ କେତେକ ରାଜ୍ୟ ପେଟ୍ରୋଲ, ଡିଜେଲ ଉପରେ ଟିକସ ହ୍ରାସ କରିନାହାଁନ୍ତି, ଏହା ଲୋକଙ୍କ ପ୍ରତି ଅନ୍ୟାୟ। ୟୁକ୍ରେନ-ରୁଷ ଯୁଦ୍ଧରେ ପେଟ୍ରୋଲ ଏବଂ ଡିଜେଲର ମୂଲ୍ୟ ବୃଦ୍ଧି ଘଟୁଛି ବୋଲି ପ୍ରଧାନମନ୍ତ୍ରୀ ମୋଦି କହିଛନ୍ତି।
