ନୂଆଦିଲ୍ଲୀ,୨୦।୧: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଭିଡିଓ କନଫରେନ୍ସିଂ ମାଧ୍ୟମରେ ସରକାରୀ ବିଭାଗ ତଥା ସଂଗଠନରେ ପ୍ରାୟ ୭୧,୦୦୦ ନିଯୁକ୍ତି ପତ୍ର ବଣ୍ଟନ କରିଛନ୍ତି। ଏହି ଅବସରରେ ମୋଦି କହିଛନ୍ତି, ଏହା ହେଉଛି ୨୦୨୩ ବର୍ଷର ପ୍ରଥମ ରୋଜଗାର ମେଳା। ଉଜ୍ଜ୍ୱଳ ଭବିଷ୍ୟତ ପାଇଁ ନୂଆ ଆଶା ସହିତ ଏହି ବର୍ଷ ଆରମ୍ଭ ହୋଇଛି। ମୁଁ ସମସ୍ତ ଯୁବତୀଯୁବକ ଏବଂ ସେମାନଙ୍କ ପରିବାରକୁ ଅଭିନନ୍ଦନ ଜଣାଉଛି। ଆଗାମୀ ଦିନରେ ଲକ୍ଷ ଲକ୍ଷ ପରିବାର ସରକାରୀ ଚାକିରିରେ ନିଯୁକ୍ତି ପାଇବାକୁ ଯାଉଛନ୍ତି। କେନ୍ଦ୍ର ସରକାର, ଏନଡିଏ ଏବଂ ଭାଜପା ଶାସିତ ରାଜ୍ୟରେ ମଧ୍ୟ ନିରନ୍ତର ନିଯୁକ୍ତି ମେଳା ଆୟୋଜନ କରାଯାଉଛି। କ୍ରମାଗତ ଭାବରେ ଆୟୋଜିତ ଏହି ରୋଜଗାର ମେଳା ବର୍ତ୍ତମାନ ଆମ ସରକାରଙ୍କ ପରିଚୟ ପାଲଟିଛି।
ଦେଶର ବିଭିନ୍ନ ସ୍ଥାନରୁ ମନୋନୀତ ଯୁବତୀଯୁବକଙ୍କୁ ଜୁନିୟର ଇଞ୍ଜିନିୟର, ଲୋକୋ ପାଇଲଟ, ଟେକ୍ନିସିଆନ, ଇନ୍ସପେକ୍ଟର, ସବ ଇନ୍ସପେକ୍ଟର, କନଷ୍ଟେବଳ, ଷ୍ଟେନୋଗ୍ରାଫର, ଜୁନିଅର ଆକାଉଣ୍ଟାଣ୍ଟ, ଗ୍ରାମିଣ ଡାକ ସେବା, ଆୟକର ନିରୀକ୍ଷକ, ଶିକ୍ଷକ, ନର୍ସ, ଡାକ୍ତର, ସାମାଜିକ ଭାବରେ ନିଯୁକ୍ତି ଦିଆଯିବ। ଭାରତ ସରକାରଙ୍କ ଅଧୀନରେ ସୁରକ୍ଷା ଅଧିକାରୀ, ପିଏ, ଏମଟିଏସ୍ ପରି ବିଭିନ୍ନ ପଦରେ ପୋଷ୍ଟିଂ କରାଯିବ।
