ନୂଆଦିଲ୍ଲୀ,୨।୬: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଛତ୍ରପତି ଶିବାଜୀ ମହାରାଜଙ୍କ ରାଜତିଳକର ୩୫୦ ବର୍ଷ ପୂର୍ତ୍ତି ଅବସରରେ ଦେଶବାସୀଙ୍କୁ ସମ୍ବୋଧିତ କରିଛନ୍ତି। ମୋଦି କହିଛନ୍ତି, ଛତ୍ରପତି ଶିବାଜୀ ମହାରାଜ ଦାସତ୍ୱର ମାନସିକତାକୁ ଶେଷ କରିଥିଲେ। ଶିବାଜୀ ମହାରାଜ ସର୍ବଦା ଦେଶର ଏକତା ଓ ଅଖଣ୍ଡତାକୁ ସର୍ବୋପରି ରଖିଛନ୍ତି। ଆଜି ‘ଗୋଟିଏ ଭାରତ ଶ୍ରେଷ୍ଠ ଭାରତ’ ଭିଜନରେ ଶିବାଜୀ ମହାରାଜାଙ୍କ ବିଚାରର ହିଁ ପ୍ରତିବିମ୍ବ ଭାବେ ଦେଖାଯାଉଛି।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଛତ୍ରପତି ଶିବାଜୀ ମହାରାଜଙ୍କ ରାଜ୍ୟାଭିଷେକ ଦିବସ ନୂଆ ଚେତନା, ନୂତନ ଶକ୍ତି ଆଣିଛି। ଛତ୍ରପତି ଶିବାଜୀ ମହାରାଜଙ୍କ ରାଜ୍ୟାଭିଷେକ ସେହି ସମୟର ଏକ ଚମତ୍କାର ଏବଂ ବିଶେଷ ଅଧ୍ୟାୟ । ଜାତୀୟ କଲ୍ୟାଣ ଏବଂ ଜନ କଲ୍ୟାଣ ତାଙ୍କ ଶାସନର ମୌଳିକ ଉପାଦାନ । ଆଜି ମୁଁ ଛତ୍ରପତି ଶିବାଜୀ ମହାରାଜଙ୍କ ପାଦତଳେ କୋଟଇ କୋଟି ପ୍ରଣାମ କରୁଛି।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଶହ ଶହ ବର୍ଷର ଦାସତ୍ୱ ଦେଶବାସୀଙ୍କଠାରୁ ସେମାନଙ୍କ ଆତ୍ମବିଶ୍ୱାସ ଛଡ଼ାଇ ନେଇଛି, ଏଭଳି ସମୟରେ ଲୋକଙ୍କ ଉପରେ ଆତ୍ମବିଶ୍ୱାସ ସୃଷ୍ଟି କରିବା ଏକ କଷ୍ଟସାଧ୍ୟ କାର୍ଯ୍ୟ ଥିଲା। ସେହି ସମୟରେ ଛତ୍ରପତି ଶିବାଜୀ ମହାରାଜ କେବଳ ଆକ୍ରମଣକାରୀଙ୍କ ବିରୁଦ୍ଧରେ ଲଢି ନ ଥିଲେ ବରଂ ଆତ୍ମ-ଶାସନ ସମ୍ଭବ ବୋଲି ଜନସାଧାରଣଙ୍କ ମନରେ ବିଶ୍ୱାସ ସୃଷ୍ଟି କରିଥିଲେ।
