ଚେନ୍ନାଇ,୧୧।୧୦: ତାମିଲନାଡୁକୁ ବିକାଶର ନୂଆ ଶିଖରରେ ପହଞ୍ଚାଇବା ପାଇଁ କେନ୍ଦ୍ର ସରକାର ସମସ୍ତ ପ୍ରକାରର ସହଯୋଗ ଯୋଗାଇଦେବେ ବୋଲି କହିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି। ରବିବାର ଚେନ୍ନାଇରେ ରେଳ, ମେଟ୍ରୋ, ରାଜପଥ, ବନ୍ଦର, ପେଟ୍ରୋଲିୟମ ଓ ଶିକ୍ଷା କ୍ଷେତ୍ର ସହ ଜଡ଼ିତ ବିଭିନ୍ନ ବିକାଶ ପ୍ରକଳ୍ପର ଉଦ୍ଘାଟନ ଓ ଶିଳାନ୍ୟାସ କରି ସେ ଏହା କହିଛନ୍ତି । ଏହି ପ୍ରକଳ୍ପଗୁଡ଼ିକର ମୋଟ ମୂଲ୍ୟ ପ୍ରାୟ ୧୩ ହଜାର କୋଟି ଟଙ୍କା।
ମୋଦି କହିଛନ୍ତି, ତାମିଲନାଡୁକୁ ଏକ ବିକଶିତ ରାଜ୍ୟରେ ପରିଣତ କରିବା ଲାଗି କେନ୍ଦ୍ର ସରକାର ପୂର୍ଣ୍ଣ ପ୍ରତିବଦ୍ଧତାର ସହ ରାଜ୍ୟ ସହିତ ରହିଛନ୍ତି । ଉଭୟ ମିଶି ଏକ ବିକଶିତ ତାମିଲନାଡୁ ମାଧ୍ୟମରେ ବିକଶିତ ଭାରତର ସଂକଳ୍ପ ପୂରଣ କରିବାକୁ ହେବ । ପ୍ରଧାନମନ୍ତ୍ରୀ କହିଛନ୍ତି, ତାମିଲନାଡୁ ପାଇଁ ଆଜିର ଦିନ ଐତିହାସିକ । ପ୍ରାୟ ୧୩ ହଜାର କୋଟି ଟଙ୍କାର ବିଭିନ୍ନ ପ୍ରକଳ୍ପ ରାଜ୍ୟର ବିକାଶକୁ ନୂଆ ଗତି ଦେବ । ଏଥିମଧ୍ୟରୁ କେତେକ ସମ୍ପୂର୍ଣ୍ଣ ହୋଇଥିବା ପ୍ରକଳ୍ପର ଉଦ୍ଘାଟନ କରାଯାଇଥିବା ବେଳେ ଆଉ କେତେକ ନୂଆ ପ୍ରକଳ୍ପର ଶିଳାନ୍ୟାସ କରାଯାଇଛି ।
ଏହି ପ୍ରକଳ୍ପଗୁଡ଼ିକ ଲୋକଙ୍କ ଦୈନନ୍ଦିନ ଯାତାୟାତକୁ ସହଜ କରିବା ସହ ଶିଳ୍ପ ଓ ବାଣିଜ୍ୟର ବିକାଶରେ ସହାୟକ ହେବ। ଏହାଦ୍ୱାରା ରାଜ୍ୟର ଯୁବପିଢ଼ିଙ୍କ ପାଇଁ ନୂଆ ନିଯୁକ୍ତି ସୁଯୋଗ ମଧ୍ୟ ସୃଷ୍ଟି ହେବ ବୋଲି ମୋଦି ଆଶା ପ୍ରକାଶ କରିଛନ୍ତି। ତାମିଲନାଡୁର ସାଂସ୍କୃତିକ ଐତିହ୍ୟ ଓ ଆଧୁନିକ ବିକାଶକୁ ଏକାଠି ଯୋଡ଼ି ପ୍ରଧାନମନ୍ତ୍ରୀ କହିଛନ୍ତି, ମନ୍ଦିରରୁ ମେଟ୍ରୋ ପର୍ଯ୍ୟନ୍ତ ତାମିଲନାଡୁର ଅଭିଜ୍ଞତା ଆଜିର ଭାରତର ପ୍ରକୃତ ଚିତ୍ରକୁ ପ୍ରତିଫଳିତ କରୁଛି। ଭାରତ ନିଜର ସାଂସ୍କୃତିକ ଶକ୍ତିରୁ ପ୍ରେରଣା ନେଉଛି, ବିଜ୍ଞାନର ଅଗ୍ରଗତି ଦ୍ୱାରା ଆଗକୁ ବଢ଼ୁଛି ଏବଂ ଆଧୁନିକ ଭିତ୍ତିଭୂମି ଜରିଆରେ ନୂଆ ସୁଯୋଗ ସୃଷ୍ଟି କରୁଛି । ଦେଶର ଐତିହ୍ୟ ଓ ଭବିଷ୍ୟତର ଆକାଂକ୍ଷା ଏକାସାଙ୍ଗରେ ଆଗକୁ ବଢ଼ୁଛି ବୋଲି ସେ କହିଛନ୍ତି।
ଏହି ଗସ୍ତ ସମୟରେ ମୋଦି ଚେନ୍ନାଇ ମେଟ୍ରୋର ଆଉ ଏକ ପର୍ଯ୍ୟାୟକୁ ଜନସାଧାରଣଙ୍କ ଉଦ୍ଦେଶ୍ୟରେ ସମର୍ପଣ କରିବା ସହ IITରେ ଥିବା ବ୍ରେନ୍ ରିସର୍ଚ୍ଚ ସେଣ୍ଟର ପରିଦର୍ଶନ କରିଥିବା କହିଛନ୍ତି। ଏହି କ୍ଷେତ୍ରରେ ଗବେଷଣା ଜନସ୍ୱାସ୍ଥ୍ୟ କ୍ଷେତ୍ରରେ ଅନେକ ନୂଆ ସୁଯୋଗ ସୃଷ୍ଟି କରିପାରିବ ବୋଲି ସେ ମତ ଦେଇଛନ୍ତି । ସରକାରର ମୁଖ୍ୟ ଭାବେ ୨୫ ବର୍ଷ ପୂରଣ କରିବା ପ୍ରସଙ୍ଗ ଉଠାଇ ମୋଦି କହିଛନ୍ତି, ୨୦୦୧ ଅକ୍ଟୋବରରେ ସେ ପ୍ରଥମଥର ପାଇଁ ଗୁଜରାଟର ମୁଖ୍ୟମନ୍ତ୍ରୀ ଭାବେ ଶପଥ ନେଇଥିଲେ । ଏହାପରଠାରୁ ଦେଶବାସୀ ତାଙ୍କୁ ପ୍ରଥମେ ମୁଖ୍ୟମନ୍ତ୍ରୀ ଏବଂ ପରେ ପ୍ରଧାନମନ୍ତ୍ରୀ ଭାବେ ସେବା କରିବାର ସୁଯୋଗ ଦେଇଛନ୍ତି। ଏହି ୨୫ ବର୍ଷର ଯାତ୍ରାରେ ଗଣତନ୍ତ୍ରର ଦୁଇଟି ପ୍ରମୁଖ ଶକ୍ତି ଉପରେ ତାଙ୍କର ବିଶ୍ୱାସ ଆହୁରି ଦୃଢ଼ ହୋଇଛି। ପ୍ରଥମଟି ହେଉଛନ୍ତି ଦେଶର ଜନସାଧାରଣ ଏବଂ ଦ୍ୱିତୀୟଟି ହେଉଛି ସହଯୋଗୀ ସଂଘୀୟ ବ୍ୟବସ୍ଥା ବା କୋ-ଅପରେଟିଭ୍ ଫେଡେରାଲିଜମ୍।
ସେ କହିଛନ୍ତି, ସେ ସବୁବେଳେ ରାଜ୍ୟର ବିକାଶ ମାଧ୍ୟମରେ ଦେଶର ବିକାଶର ମନ୍ତ୍ର ନେଇ କାମ କରିଛନ୍ତି । ମୁଖ୍ୟମନ୍ତ୍ରୀ ଥିବା ସମୟରେ ସେ ରାଜ୍ୟଗୁଡ଼ିକର ଆକାଂକ୍ଷାକୁ ବୁଝିଥିଲେ। ପ୍ରଧାନମନ୍ତ୍ରୀ ହେବା ପରେ ସେହି ଆକାଂକ୍ଷା ପୂରଣ କରିବା ସହ ରାଜ୍ୟଗୁଡ଼ିକ ନିଜ ଲକ୍ଷ୍ୟ ହାସଲ କରିବା ପାଇଁ ମଧ୍ୟ ସୁଯୋଗ ସୃଷ୍ଟି କରିବାକୁ ଉଦ୍ୟମ କରିଛନ୍ତି ବୋଲି ମୋଦି କହିଛନ୍ତି।