ନୂଆଦିଲ୍ଲୀ,୪।୯: ପ୍ରଧାନମନ୍ତ୍ରୀ ଆବାସ ଯୋଜନା (PMAY) ଭାରତ ସରକାରଙ୍କର ଏକ ମହତ୍ତ୍ୱାକାଂକ୍ଷୀ ଯୋଜନା, ଯାହାର ଲକ୍ଷ୍ୟ ହେଉଛି ସମସ୍ତଙ୍କୁ ପକ୍କା ଘର ଯୋଗାଇ ଦେବା। ଏହି ଯୋଜନା ସହରୀ (PMAY-U) ଓ ଗ୍ରାମୀଣ (PMAY-G) ଅଞ୍ଚଳରେ ଗରିବ ଏବଂ ନିମ୍ନ ଆୟ ବର୍ଗର ପରିବାରଙ୍କୁ ପକ୍କା ଘର ପ୍ରଦାନ କରିବା ପାଇଁ ଆରମ୍ଭ ହୋଇଛି। କଚ୍ଚା ଘରେ ରହୁଥିବା ପରିବାରମାନଙ୍କ ପାଇଁ ଏହି ଯୋଜନା ଏକ ବରଦାନ ସାବ୍ୟସ୍ତ ହୋଇଛି। ଗ୍ରାମୀଣ ଅଞ୍ଚଳରେ ୧.୨୦ ଲକ୍ଷ ଟଙ୍କା ଏବଂ ପାର୍ବତ୍ୟ ଅଞ୍ଚଳରେ ୧.୩୦ ଲକ୍ଷ ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଉଛି, ଯେତେବେଳେ ସହରୀ ଅଞ୍ଚଳରେ ଏହି ରାଶି ବିଭିନ୍ନ ମଡେଲ ଅନୁଯାୟୀ ଦିଆଯାଉଛି।
PMAY: ପାତ୍ରତା ମାନଦଣ୍ଡ:
PMAY-G ଯୋଜନାର ଲାଭ ଉଠାଇବା ପାଇଁ ପରିବାର ପାଖରେ ପକ୍କା ଘର ନ ଥିବା ଆବଶ୍ୟକ। ସାମାଜିକ-ଆର୍ଥିକ ଜନଗଣନା ତଥ୍ୟ ଆଧାରରେ ସେଭଳି ପରିବାରଙ୍କୁ ଚୟନ କରାଯାଏ। ଗ୍ରାମ ସଭା ଦ୍ୱାରା ଯାଞ୍ଚ ପରେ ହିଁ ଲାଭାର୍ଥୀ ତାଲିକାରେ ନାମ ଅନ୍ତର୍ଭୁକ୍ତ ହୁଏ। ସହରୀ ଅଞ୍ଚଳରେ ଆର୍ଥିକ ଦୁର୍ବଳ ବର୍ଗ (EWS), ନିମ୍ନ ଆୟ ବର୍ଗ (LIG) ଓ ମଧ୍ୟମ ଆୟ ବର୍ଗ (MIG) ପାଇଁ ଅଲଗା ଅଲଗା ପାତ୍ରତା ମାନଦଣ୍ଡ ରହିଛି। ଆବେଦନକାରୀଙ୍କ ପାଖରେ ଆଧାର କାର୍ଡ ଏବଂ ବ୍ୟାଙ୍କ ଖାତା ଥିବା ବାଧ୍ୟତାମୂଳକ, ଯାହା ଦ୍ୱାରା ସବସିଡି ସିଧାସଳଖ ଖାତାକୁ ସ୍ଥାନାନ୍ତର ହୋଇପାରିବ।
PMAY: ଆବେଦନ ପ୍ରକ୍ରିୟା:
ଗ୍ରାମୀଣ ଅଞ୍ଚଳରେ ଆବେଦନ ପାଇଁ ଗ୍ରାମ ପଞ୍ଚାୟତ କିମ୍ବା ବ୍ଲକ ଡେଭେଲପମେଣ୍ଟ ଅଫିସର (BDO) କାର୍ଯ୍ୟାଳୟରେ ଯୋଗାଯୋଗ କରିବାକୁ ପଡ଼ିବ। ଆବଶ୍ୟକ ଦଲିଲଗୁଡ଼ିକ ମଧ୍ୟରେ ଆଧାର କାର୍ଡ, ବ୍ୟାଙ୍କ ପାସବୁକ, ଏବଂ ଏକ ଶପଥ ପତ୍ର ଅନ୍ତର୍ଭୁକ୍ତ, ଯେଉଁଥିରେ ଆବେଦନକାରୀଙ୍କ ପାଖରେ ପକ୍କା ଘର ନଥିବା ଘୋଷଣା କରାଯାଇଥାଏ। PMAY-U ପାଇଁ ଅନଲାଇନ ପୋର୍ଟାଲ (pmaymis.gov.in) ମାଧ୍ୟମରେ ଆବେଦନ କରାଯାଇପାରିବ। ଆବେଦନ ପରେ ଯାଞ୍ଚ ଓ ସର୍ଭେ କରାଯାଏ, ଏବଂ ସ୍ବୀକୃତି ମିଳିବା ପରେ ପ୍ରଥମ କିସ୍ତି ୭-୧୦ ଦିନ ମଧ୍ୟରେ ଖାତାକୁ ଆସିଥାଏ।
PMAY: ଲାଭ ଓ ପ୍ରଭାବ:
PMAY-G ଅଧୀନରେ ଲାଭାର୍ଥୀମାନଙ୍କୁ କେବଳ ଆର୍ଥିକ ସହାୟତା ନୁହେଁ, ମନରେଗା ଅଧୀନରେ ୯୦-୯୫ ଦିନର ରୋଜଗାର ଏବଂ ସ୍ବଚ୍ଛ ଭାରତ ମିଶନ ଅଧୀନରେ ଶୌଚାଳୟ ର୍ନିମାଣ ପାଇଁ ଅତିରିକ୍ତ ସହାୟତା ମଧ୍ୟ ପ୍ରଦାନ କରାଯାଏ। ଏହି ଯୋଜନା କେବଳ ଘର ଯୋଗାଇ ନ ଥାଏ, ବରଂ ସାମାଜିକ-ଆର୍ଥିକ ସ୍ଥିତିକୁ ମଜବୁତ କରେ। ଲକ୍ଷାଧିକ ପରିବାର ଏହି ଯୋଜନା ମାଧ୍ୟମରେ ପକ୍କା ଘର ପାଇଛନ୍ତିି।
PMAY: କିପରି ଲାଭ ଉଠାଇବେ?
PMAYର ଲାଭ ଉଠାଇବା ପାଇଁ ସ୍ଥାନୀୟ ପଞ୍ଚାୟତ, କିମ୍ବା ଅନଲାଇନ ପୋର୍ଟାଲରେ ଯୋଗାଯୋଗ କରନ୍ତୁ। ଆବଶ୍ୟକ ଦଲିଲଗୁଡ଼ିକ ପ୍ରସ୍ତୁତ ରଖନ୍ତୁ। ଆବେଦନର ସ୍ଥିତି ଯାଞ୍ଚ କରନ୍ତୁ। ଏହି ଯୋଜନା ପ୍ରତ୍ୟେକ ବ୍ୟକ୍ତିଙ୍କ ପାଇଁ ଏକ ସୁବର୍ଣ୍ଣ ସୁଯୋଗ, ଯେଉଁମାନେ ନିଜ ପରିବାର ପାଇଁ ଏକ ନିରାପଦ ଛାତର ସ୍ବପ୍ନ ଦେଖନ୍ତି।
