ପଟ୍ଟାମୁଣ୍ଡାଇ,୨୫୯(କଳ୍ପତରୁ ନାୟକ): କେନ୍ଦ୍ରାପଡ଼ା ଜିଲା ପଟ୍ଟାମୁଣ୍ଡାଇ ଅଞ୍ଚଳରେ ବହୁଳ ପଲିଥିନ, ପ୍ଲାଷ୍ଟିକ୍ ବର୍ଜ୍ୟ ଲୋକମାନଙ୍କ ପାଇଁ ଅଭିଶାପ ପାଲଟିଛି। ପ୍ଲାଷ୍ଟିକ୍ର ମାତ୍ରାଧିକ ବ୍ୟବହାର ଯୋଗୁ ଏହା ବର୍ଜ୍ୟବସ୍ତୁରେ ପରିଣତ ହୋଇ ଚାରିଆଡ଼େ ପଡ଼ିରହୁଛି। ଏହାଦ୍ୱାରା ଗୋରୁ, ଛେଳି, ମେଣ୍ଢା ପ୍ରଭୃତି ପ୍ରଭାବିତ ହେଉଛନ୍ତି। ଏପରିକି କିଛି ଗୃହପାଳିତ ପ୍ରାଣୀ ପଲିଥିନକୁ ଖାଦ୍ୟ ଭାବି ଗିଳି ଦେଉଛନ୍ତି। ଯାହାଙ୍କ କ୍ଷୀର ଲୋକେ ଖାଇ ରୋଗର ଶିକାର ହେଉଛନ୍ତି ବୋଲି ବିଶେଷଜ୍ଞମାନେ ମତ ପ୍ରକାଶ କରିଛନ୍ତି।
ବୁଦ୍ଧିଜୀବୀ ପ୍ରେମାନନ୍ଦ ପଣ୍ଡା କହିଛନ୍ତି, ପଟ୍ଟାମୁଣ୍ଡାଇ ସହରରେ ହୋଟେଲ ଓ ଜନବସତିରେ କୁଢ଼କୁଢ଼ ପ୍ଲାଷ୍ଟିକ୍ ଗଦା ହୋଇଛି। ଛିଣ୍ଡା ପାଲ, ପ୍ଲାଷ୍ଟିକ, ପଲିଥିନ, ସୋଲ ସମେତ ଘରର ନିତ୍ୟବ୍ୟବହୃତ ଜିନିଷ ଗଦା ହେଉଛି। ଏପରି କି କିଛି ସ୍ଥାନରେ ମୁକ୍ତ ଶୌଚାଳୟ ପାଲଟିଛି। ପ୍ଲାଷ୍ଟିକ, ଥର୍ମୋକୁଲ ବେଶିଦିନ ପଡ଼ି ରହି ମାଇକ୍ରୋ ପ୍ଲାଷ୍ଟିକ୍ରେ ପରିଣତ ହେଉଥିବାବେଳେ ଏସବୁକୁ ଗୃହପାଳିତ ପ୍ରାଣୀ ଖାଇ ଦେଉଛନ୍ତି। ଯାହା ପାଇଁ ତାଙ୍କ ଜୀବନ ପ୍ରତି ବିପଦ ସୃଷ୍ଟି କରୁଛି। ପୁଣି ଏହି ଗାଈ କ୍ଷୀର ମଣିଷ ଖାଇବା ଦ୍ୱାରା ମଣିଷ ଶରୀରରେ ବିଭିନ୍ନ ରୋଗ ସୃଷ୍ଟି ହେଉଛି। ସୁରକ୍ଷା ଲାଗି କୋଟିକୋଟି ଟଙ୍କା ଖର୍ଚ୍ଚ ହେଉଛି। ସଚେତନ କରାଯାଉଛି। ଅଥଚ ପ୍ଲାଷ୍ଟିକ୍ରେ ରୁନ୍ଧି ହୋଇଯାଉଥିବା ପ୍ରଶାସନର ଅବହେଳା ପଦାରେ ପଡୁଛି। ଡାକ୍ତର ନିରାକାର ସେଠୀ କହିଛନ୍ତି, ପୂର୍ବେ ଗ୍ରାମଗୁଡ଼ିକରେ ଘରୋଇ ଦୁଗ୍ଧ ପାଇଁ ଲୋକେ ଗାଈ ପାଳୁଥିଲେ। ସେମାନେ କ୍ଷେତରେ ଘାସ ଚରନ୍ତି ଏବଂ ଗୋରକ୍ଷକ କଟା ଘାସ ରାତିରେ ଦିଅନ୍ତି। ସେହି ଗାଈମାନେ ଦେଉଥିବା କ୍ଷୀରକୁ ଲୋକେ ପିଇବା ଦ୍ୱାର ଅନେକ ଲାଭ ମିଳେ। ଗାଈ କ୍ଷୀରରେ କ୍ୟାଲସିୟମ୍, ଭିଟାମିନ୍-ବି, ଫସ୍ଫରସ୍ ଏବଂ ପ୍ରୋଟିନ୍ ଭଳି ଉପାଦାନ ରହିଥାଏ। କ୍ଷୀରରେ ଭିଟାମିନ୍ ଡି’ ଭରପୂର ଥିବାରୁ କର୍କଟ ପ୍ରତିରୋଧ ଶକ୍ତି ବଢ଼େ, ଆଖି ପାଇଁ ଲାଭଦାୟକ, ହୃଦୟ ସୁସ୍ଥ ରୁହେ ଓ ପ୍ରତିରକ୍ଷା ପ୍ରଣାଳୀ ଶକ୍ତିଶାଳୀ ହୁଏ। କିନ୍ତୁ ଏବେକାର କ୍ଷୀରରେ ଏ ସବୁ ପ୍ରାୟତଃ ମିଳୁନାହିଁ। ଗୋ ଚାଷୀ ସୁଶାନ୍ତି ସାମଲ କହିଛନ୍ତି, ଘରୋଇ ଗୋରୁଙ୍କ ସଂଖ୍ୟା ବହୁତ ହ୍ରାସ ପାଇଛି। ଏହାର ମୁଖ୍ୟ କାରଣ ହେଉଛି ଚାରଣ ଭୂଇଁ। ଏବେ ଚାରଣ ଭୂଇଁ ଜବରଦଖଲକାରୀଙ୍କ କବ୍ଜାକୁ ଚାଲି ଯାଇଥିବା ବେଳେ ଗଁା ଗହଳିରେ ଥିବା ଗୋଚର, ଅନାବାଦୀ, ନୟନଯୋରିକୁ ପୋତାଯାଇ ସରକାରୀ ଅନୁଦାନପ୍ରାପ୍ତ ଉନ୍ନତିମୂଳକ କାମ ହେଉଛି। ଫଳରେ ଗୋରୁ ଚରିବାକୁ ଚାରଣ ଭୂମି ପାଉନହାନ୍ତି। ମୁଦ୍ରାସ୍ଫୀତି ହେତୁ ପ୍ରାଣୀମାନଙ୍କୁ ଉପଯୁକ୍ତ ଖାଦ୍ୟ ଯୋଗାଇବା କଷ୍ଟକର ହୋଇପଡୁଛି। ଏହି ବାଧ୍ୟତାମୂଳକ କାରଣରୁ ଗୋରୁମାନଙ୍କୁ ଖୋଲା ସ୍ଥାନରେ ଛାଡ଼ିବାକୁ ପଡ଼ୁଛି। ଖୋଲା ସ୍ଥାନରେ ପକାଯାଇଥିବା ପଲିଥିନ, ପେପର ଖାଇ ପେଟ ପୂରାଉଛନ୍ତି। ଗବେଷକ ଆର୍ତ୍ତତ୍ରାଣ ପାତ୍ର କହିଛନ୍ତି, ଗୋରୁ ପ୍ଲାଷ୍ଟିକ ବ୍ୟାଗ କିମ୍ବା ଅଳିଆ ଖାଇବା ପରେ ଗୁରୁତର ରୋଗରେ ଅସୁସ୍ଥ ହୋଇପଡନ୍ତି। ଗାଈ କ୍ଷୀର ବାଛୁରୀ ପିଇବା ଦ୍ୱାରା ସେ ମଧ୍ୟ ପ୍ରଭାବିତ ହୋଇ ରୋଗରେ ପଡ଼ି ଅସୁସ୍ଥ ଅବସ୍ଥାରେ ମୃତ୍ୟୁ ଘଟୁଛି। ପ୍ରାଣୀମାନଙ୍କରେ କର୍କଟ ଭଳି ରୋଗ ମଧ୍ୟ ବହୁ ମାତ୍ରାରେ ବୃଦ୍ଧି ପାଉଛି। ୨୦୨୨ ମସିହାରେ କରାଯାଇଥିବା ଏକ ସର୍ବେକ୍ଷଣରୁ ଜଣାପଡିଛି ଯେ, ଗାଈ କ୍ଷୀର, ଗୋବର ଏବଂ ମୂତ୍ରରେ ପ୍ଲାଷ୍ଟିକ୍ କଣିକା ମିଳୁଛି। ଯାହା କେବଳ ପ୍ରାଣୀଙ୍କ ପାଇଁ କ୍ଷତିକାରକ ନୁହେଁ ବରଂ ମଣିଷଙ୍କ କର୍କଟ ରୋଗକୁ ମଧ୍ୟ ପ୍ରୋତ୍ସାହିତ କରିଥାଏ। ସରକାରୀ ନିର୍ଦ୍ଦେଶ ଅନୁଯାୟୀ ପ୍ଲାଷ୍ଟିକ ବ୍ୟାଗ ଉପରେ ନିଷେଧାଦେଶ ଜାରି କରାଯାଇଥିବାବେଳେ ଫୁଟ୍ପାଥ ଦୋକାନୀମାନଙ୍କ ସହ ସ୍ଥାୟୀ ଦୋକାନୀମାନେ ମଧ୍ୟ ପ୍ଲାଷ୍ଟିକ ବ୍ୟାଗ ବ୍ୟବହାର କରୁଛନ୍ତି। ଏହି ପଲିଥିନ ବ୍ୟାଗରେ ଛୁଞ୍ଚତ୍, ତାର, ନଖ ସହ ଅନ୍ୟ ଘରୋଇ ବର୍ଜ୍ୟବସ୍ତୁ ଅଳିଆଗଦାରେ ପକାଯାଏ। ଗୋରୁମାନେ ଏହାକୁ ସେମାନଙ୍କର ଖାଦ୍ୟ ଭାବରେ ବ୍ୟବହାର କରନ୍ତି।
