ଦାରିଙ୍ଗବାଡି,୨୨।୧(ଅରୁଣ ସାହୁ): କନ୍ଧମାଳ ଜିଲା ଦାରିଙ୍ଗବାଡି ଥାନା ଅଞ୍ଚଳରେ କୁଢ଼ କୁଢ଼ ପ୍ଲାଷ୍ଟିକ, ଥର୍ମାକୋଲ ଥାଳି, ପଲିଥିନ ଏବେ ପ୍ରାଣୀସମ୍ପଦ ପାଇଁ ବିପଦ ସାଜିଛନ୍ତି। ଉକ୍ତ ବ୍ଲକର ବିଭିନ୍ନ ଗ୍ରାମରେ ବିଶେଷ କରି ଦାରିଙ୍ଗବାଡିଠାରୁ ମାତ୍ର ୧୩ କିମି ଦୂର ଅନ୍ୟତମ ଛୋଟ ବଜାରରେ ଅଳିଆ ଗଦାରେ ପ୍ରାଣୀସମ୍ପଦଙ୍କ ଜୀବନ ଅଟକିଛି। ଭୋକିଲା ଖାଦ୍ୟ ଅନ୍ବେଷଣରେ ଘରୁ ବାହାରିଥିବା ପ୍ରାଣୀସମ୍ପଦ ଏବେ ବଜାରରେ ପଡିଥିବା ପ୍ଲାଷ୍ଟିକରୁ ନିଜ ଖାଦ୍ୟ ଖୋଜି ସିଧା ପ୍ଲାଷ୍ଟିକ, ପଲିଥିନ ଖାଇ ଗୁରୁତର ହେଉଛନ୍ତି। ଏଭଳି ଏକ ଅଭାବନୀୟ ଦୃଶ୍ୟ ସିମନବାଡି ବଜାର ବ୍ୟାଙ୍କ ସମ୍ମୁଖରେ ଏକ ଅଳିଆ ଆବର୍ଜନା ତଥା ପ୍ଲାଷ୍ଟିକ ଭର୍ତ୍ତି ସ୍ଥାନରେ ଅସହାୟ ଅବସ୍ଥାରେ ଏକ ବଳଦ ମରଣ ସହ ସଂଘର୍ଷ କରୁଥିଲା। ସେହି ନିକଟର ଜଣେ ପ୍ରତିଷ୍ଠିତ ବ୍ୟବସାୟୀ ବିଭୁତି ଭୂଷଣ ସାହୁ ଦେଖି ତୁରନ୍ତ ପ୍ରାଣୀ ଓ ମତ୍ସ ବିଭାଗର ଭ୍ରାମ୍ୟମାଣ ଚିକିତ୍ସା ଦଳକୁ ଫୋନ କରି ଜଣାଇଥିଲେ। ଖବର ପାଇ ଭ୍ରାମ୍ୟମାଣ ଦଳ ଉକ୍ତ ବ୍ଲକ ତିଲୋରୀ ଅଞ୍ଚଳରେ ଟୀକାକରଣ କରୁଥିବା ବେଳେ ତାକୁ ଛାଡି ତୁରନ୍ତ ସିମନବାଡିରେ ପହଞ୍ଚି ଗୁରୁତର ବଳଦର ଚିକିତ୍ସା ଆରମ୍ଭ କରିଥିଲେ। ପ୍ରାୟ ୧ ଘଣ୍ଟା ଧରି ଉକ୍ତ ବଳଦର ଚିକିତ୍ସା କରିବା ପରେ ବଳଦଟି ଉଠି ଚାଲି ପାରିଥିଲା। ଏତେ ବଡ଼ ଘଟଣା ଘଟିଥିଲେ ମଧ୍ୟ ବଳଦର ମାଲିକଙ୍କ ଦେଖା ମିଳ ନ ଥିଲା। ଏହି ଚିକିତ୍ସା ପାଇଁ ଚତୁର୍ଥ ଶ୍ରେଣୀ କର୍ମଚାରୀ ମନୋଜ ବେହେରା, ହେରଦ ପ୍ରଧାନ ଏବଂ ଗାଡି ଚାଳକ ରତ୍ନାକର ନାୟକ ପ୍ରମୁଖ ଏହି ଚିକିତ୍ସା କରି ସୁସ୍ଥ କରାଇଥିଲେ।
Dharitri – Odisha’s No.1 Odia Daily
