ଦାରିଙ୍ଗବାଡ଼ି,୭ା୭(ଅରୁଣ ସାହୁ): ମା’ ପାଇଁ ଗଛଟିଏ ଏହି ଥିମ୍ରେ ଏବେ ରାଜ୍ୟ ତଥା ରାଜ୍ୟ ବାହାରେ ବୃକ୍ଷରୋପଣ ହେଉଛି। ଏହି କ୍ରମରେ କନ୍ଧମାଳ ଜିଲା ଦାରିଙ୍ଗବାଡ଼ି ବ୍ଲକ ବ୍ରାହ୍ମଣୀଗାଁ ବନାଞ୍ଚଳ ପକ୍ଷରୁ ମିଳିତ ଭାବେ ଥାନା ପରିସର ମଧ୍ୟରେ ବୃକ୍ଷରୋପଣ କରାଯାଇଛି। ଏଥିରେ ଥାନାରେ ଥିବା ଆଇଆରବି ଯବାନ, ପୋଲିସ ବାହିନୀ ସାମିଲ ହୋଇଥିଲେ। ବନାଞ୍ଚଳ ଅଧିକାରୀ ହରିହର ବେହେରା, ବନପାଳ ଯୋଗେଶ୍ୱର ଧାରୁଆଙ୍କ ନେତୃତ୍ୱରେ ଆଇଆଇଆସି ବିଜୟ କୁମାର ହାଇବୁରୁ, ସବ୍ଇନ୍ସପେକ୍ଟର ଅମରେନ୍ଦ୍ର ସୁବୁଦ୍ଧି ଏବଂ ଅନ୍ୟ ପୋଲିସ ଅଧିକାରୀ ଥାନା ପରିସର ମଧ୍ୟରେ ବିଭିନ୍ନ ପ୍ରକାର ମୂଲ୍ୟବାନ ବୃକ୍ଷ ତଥା ପିସ୍ତା ବାଦାମ, ଲିଚୁ, ଦେବଦାରୁ, ଆମ୍ବ, ଭଳି ଫଳନ୍ତି ବୃକ୍ଷରୋପଣ କରିଛନ୍ତି। ଥାନାକୁ ଦୈନିକ ବିଭିନ୍ନ କାର୍ଯ୍ୟରେ ସାଧାରଣ ଲୋକ ଆସୁଥିବା ବେଳେ ସେମାନଙ୍କୁ ଗଛ ଛାଇ ର ସୁବିଧା ମିଳିବା ସହ ଫଳ ମଧ୍ୟ ମିଳିବ ଏଥିସହ ଥାନାର ସୌନ୍ଦର୍ଯ୍ୟ ବୃଦ୍ଧି ପାଇବା ସହ ପରିବେଶ ସ୍ବଚ୍ଛତା ପାଇଁ ଥାନା ପକ୍ଷରୁ ପ୍ରତିବର୍ଷ ଭଳି ଚଳିତ ବର୍ଷ ମଧ୍ୟ ବିଭିନ୍ନ ପ୍ରକାର ବୃକ୍ଷ ରୋପଣ କରାଯାଇଛି।
ସେହିପରି ବନ ବିଭାଗ ପକ୍ଷରୁ ଉଜୁଡ଼ି ଯାଇଥିବା ଜଙ୍ଗଲକୁ ପୁନଃରୁଦ୍ଧାର କରାଯିବା ସହ ବିଭିନ୍ନ ଶିକ୍ଷାନୁଷ୍ଠାନ ସମେତ ସ୍ବାସ୍ଥ୍ୟ ବିଭାଗ, ବିଦ୍ୟାଳୟ, ମହାବିଦ୍ୟାଳୟ ଆଦି ପରିସରରେ ବୃକ୍ଷରୋପଣ କାର୍ଯ୍ୟକ୍ରମ କରାଯାଉଛି। ପ୍ରକାଶ ଯେ, ଜଳବାୟୁ ପରିବର୍ତ୍ତନର ପ୍ରଭାବରେ ବର୍ଷାର ଅନିୟମିତତା ହେବା ସହ ଗ୍ରୀଷ୍ମ ପ୍ରବାହରେ ଉକ୍ତ ଅଞ୍ଚଳରେ ପ୍ରବଳ ଗରମ ଓ ଶୀତ ଦିନରେ ଆଉ ପୂର୍ବ ଭଳି ଅଧିକା ଦିନ ଶୀତର ପ୍ରକୋପ ରହୁନାହିଁ। ଫଳରେ ଏହାକୁ ପରିବର୍ତ୍ତନ ଆଣିବା ପାଇଁ ପ୍ଲାଷ୍ଟିକ୍ ବର୍ଜନ ସହ ଅଧିକ ବୃକ୍ଷରୋପଣ କରିବାକୁ ବିଭାଗ ପଦକ୍ଷେପ ନେଉଛି।
