ଇସଲାମାବାଦ,୧୫।୩: ପାକିସ୍ତାନରୁ ଏପରି ଏକ ଘଟଣା ସାମ୍ନାକୁ ଆସିଛି ଯାହା ଶୁଣି ଯେ କେହି ଆଶ୍ଚର୍ଯ୍ୟ ହୋଇ ଯାଉଛନ୍ତି। ଘଟଣା ହେଲା ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସର ଏକ ବିମାନର ଚକ ନିଖୋଜ ହୋଇଯାଇଛି। ଆଶ୍ଚର୍ଯ୍ୟଜନକ କଥା ହେଉଛି ଯେ ଯେତେବେଳେ ବିମାନଟି ଲାହୋର ବିମାନବନ୍ଦରରେ ଅବତରଣ କରୁଥିଲା, ସେତେବେଳେ ଦେଖାଗଲା ଯେ ବିମାନର ଗୋଟିଏ ଚକ ନ ଥିଲା। ତଥାପି, ଏପର୍ଯ୍ୟନ୍ତ ଏହା ଜଣା ପଡ଼ିନାହିଁ ଯେ ଚକଟି ଆକାଶରୁ କେଉଁଠାରେ ଏବଂ କିପରି ଅଦୃଶ୍ୟ ହୋଇଗଲା?
ସୋସିଆଲ ମିଡିଆରେ ଦାବି କରାଯାଉଛି ଯେ ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସର ଏକ ଘରୋଇ ବିମାନର ଚକ ଚୋରି ହୋଇଯାଇଛି। ଯଦିଓ ବିମାନ କମ୍ପାନୀ ଏପର୍ଯ୍ୟନ୍ତ ଏ ବିଷୟରେ କୌଣସି ସୂଚନା ଦେଇନାହିଁ। ଏୟାରଲାଇନ୍ସ କହିଛି ଯେ ବର୍ତ୍ତମାନ ଏହି ମାମଲାର ତଦନ୍ତ କରାଯାଉଛି। କିଛି ଦିନ ପୂର୍ବରୁ ନେପାଳରୁ ମଧ୍ୟ ସମାନ ଘଟଣା ସାମ୍ନାକୁ ଆସିଥିଲା।
ସୂଚନାଯୋଗ୍ୟ, ଗୁରୁବାର (୧୩ ମାର୍ଚ୍ଚ, ୨୦୨୫)ରେ ପାକିସ୍ତାନ ଇଣ୍ଟରନ୍ୟାସନାଲ ଏୟାରଲାଇନ୍ସର ଏକ ବିମାନ, ଯାହାର ନମ୍ବର ଥିଲା PK-306, ଏହା କରାଚୀରୁ ଲାହୋର ଅଭିମୁଖେ ଯାତ୍ରା କରିଥିଲା। ଯେତେବେଳେ ବିମାନ କରାଚୀରୁ ଉଡ଼ାଣ ଆରମ୍ଭ କରିଥିବା ସେତେବେଳେ ସବୁକିଛି ଠିକ୍ ଥିଲା। କିନ୍ତୁ ଲାହୋର ବିମାନବନ୍ଦରରେ ଅବତରଣ କରିବା ପରେ ଜଣାପଡିଲା ଯେ ବିମାନର ଚକ ନାହିଁ, ତା’ପରେ ଜଣାପଡିଲା ଯେ ବିମାନଟି କୌଣସି ପ୍ରକାରେ ଚକ ବିନା ଲାହୋରରେ ଅବତରଣ କରାଯାଇଥିଲା।
ଜଣେ ଏୟାରଲାଇନ୍ସ ମୁଖପାତ୍ର କହିଛନ୍ତି ଯେ ବିମାନଟି କରାଚୀରୁ ଚକ ବିନା ଉଡ଼ାଣ କରିଥିଲା କି ମଝି ଆକାଶରେ ଏହାର ଚକ ଖସି ଯାଇଥିଲା ତାହା ତଦନ୍ତ କରାଯାଉଛି। ତଥାପି, ସେ ଏହା ମଧ୍ୟ ଦାବି କରିଥିଲେ ଯେ କରାଚୀ ବିମାନବନ୍ଦରରେ ଚକର କିଛି ଖଣ୍ଡ ମିଳିଛି। ସେ ଏହା ମଧ୍ୟ କହିଥିଲେ ଯେ ବିମାନଟି ସମୟ ଅନୁସାରେ ଏବଂ ବହୁତ ସୁରୁଖୁରୁରେ ଅବତରଣ କରିଥିଲା।
