ଓ୍ବାଶିଂଟନ,୫।୧୦ : ଆମେରିକାର ଓରେଗନ ହୋମରେ ଏକ ବିମାନ ଦୁର୍ଘଟଣାରେ ଦୁଇ ଜଣଙ୍କର ମୃତ୍ୟୁ ହୋଇଛି। ଏହା ଏକ ଛୋଟ ବିମାନ ଥିଲା, ଯେଉଁଥିରେ ତିନି ଜଣ ଲୋକ ଥିଲେ। ଏହି ବିମାନ ଦୁର୍ଘଟଣାର ଭିଡିଓ ମଧ୍ୟ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭିଡିଓରେ, ବିମାନଟି ପୋର୍ଟଲ୍ୟାଣ୍ଡର ଦକ୍ଷିଣ-ପଶ୍ଚିମଠାରୁ ୨୫ ମାଇଲ ଦୂରରେ ଥିବା ଛୋଟ ସହର ନ୍ୟୁବର୍ଗର ଭୂମି ଆଡକୁ ଦ୍ରୁତ ଗତିରେ ଖସିପଡୁଥିବାର ଭିଡ଼ିଓରେ ନଜର ଆସିଛି।
ବିମାନଟି ଏକ ଘରର ଛାତରେ ଖସିପଡିଥିଲା। ଫଳରେ ଘର ଭାଙ୍ଗିରୁଜି ଯାଇଥିଲା ବୋଲି ଅଧିକାରୀମାନେ କହିଛନ୍ତି। ତୁଆଲାଟିନ ଭ୍ୟାଲି ଫାୟାର ଆଣ୍ଡ ରେସକ୍ୟୁ ଏକ ଖବର ପ୍ରକାଶନରେ କହିଛି ବିମାନରେ ଥିବା ଦୁଇଜଣ ଯାତ୍ରୀଙ୍କର ଘଟଣାସ୍ଥଳରେ ମୃତ୍ୟୁ ଘଟିଛି। ତୃତୀୟ ଯାତ୍ରୀଙ୍କୁ ଗୁରୁତର ଆହତ ଅବସ୍ଥାରେ ପୋର୍ଟଲ୍ୟାଣ୍ଡର ଏକ ଟ୍ରମା ହସ୍ପିଟାଲକୁ ନିଆଯାଇଛି।
ଦୁର୍ଘଟଣା ବିମାନଟି ଯେଉଁ ଘର ଉପରେ ଖସି ପଡ଼ିଥିଲା ସେହି ଘରେ ସେତେବେଳେ ବହୁ ଲୋକ ଥିଲେ। ସୌଭାଗ୍ୟବଶତଃ ସେମାନେ ସମସ୍ତେ ନିରାପଦରେ ବାହାରକୁ ବାହାରିବାରେ ସଫଳ ହୋଇଥିଲେ। ଏହି ଘଟଣାର ଶୁଟିଂ କରିଥିବା ନ୍ୟୁବର୍ଗ ବାସିନ୍ଦା ମୀଖା ଶାଉର୍ କହିଛନ୍ତି ଆକାଶରୁ କାର୍ଡବୋର୍ଡର ଖଣ୍ଡ ପରି ଦେଖାଯାଉଥିବା ଏକ ବସ୍ତୁ ଦେଖି ସେ ଘରୁ ବାହାରକୁ ବାହାର ଏହାର ଶୁଟିଂ କରି ଏହି ଭିଡିଓକୁ ତାଙ୍କ ଗର୍ଲଫ୍ରେଣ୍ଡ ଏବଂ ତାଙ୍କ ପରିବାରକୁ ପଠାଇଥିଲେ।
