ନୂଆଦିଲ୍ଲୀ,୬।୨ : ପୂଜା ସ୍ଥଳ ଅଧିନିୟମ ଗତ କିଛି ଦିନ ହେବ ଚର୍ଚ୍ଚାରେ ରହିଆସିଛି। ଜ୍ଞାନବାପି ମାମଲାରେ କୋର୍ଟଙ୍କ ନିଷ୍ପତ୍ତି ପରେ ଏହାକୁ ନେଇ ବିତର୍କ ଆରମ୍ଭ ହୋଇଛି। ଭାଜପା ଏମପି ହରନାଥ ସିଂ ଯାଦବ ଏହି ପୁରୁଣା ଆଇନକୁ ରଦ୍ଦ କରିବାକୁ ଦାବି କରିଛନ୍ତି।
ସ୍ଥାନ ପୂଜା ଅଧିନିୟମ ୧୯୯୧ରେ ତତ୍କାଳୀନ ପ୍ରଧାନମନ୍ତ୍ରୀ ନରସିଂହ ରାଓଙ୍କ ସରକାର ଆଣିଥିଲେ। ସେହି ସମୟରେ ଘଟିଥିବା ରାମମନ୍ଦିର ଆନ୍ଦୋଳନକୁ ଦୃଷ୍ଟିରେ ରଖି କେନ୍ଦ୍ର ସରକାର ଏହି ଆଇନ ଆଣିବାରେ ସକ୍ରିୟ ଥିଲେ। ଏହି ନିୟମ ଅନୁଯାୟୀ, ୧୫ ଅଗଷ୍ଟ ୧୯୪୭ ଠାରୁ ନିର୍ମିତ କୌଣସି ଧାର୍ମିକ ସ୍ଥାନକୁ ଅନ୍ୟ ଏକ ଧାର୍ମିକ ସ୍ଥାନରେ ପରିଣତ କରାଯାଇପାରିବ ନାହିଁ ।
ଧାର୍ମିକ ସ୍ଥାନର ସ୍ବରୂପ ଅଦଳବଦଳ ପାଇଁ କାରାଦଣ୍ଡ ଏବଂ ଜରିମାନା ମଧ୍ୟ ରହିଛି। ଯଦି କୌଣସି ବ୍ୟକ୍ତି ଧାର୍ମିକ ସ୍ଥାନ ସହିତ ଏଭଳି କରନ୍ତି, ତେବେ ତାଙ୍କୁ ତିନି ବର୍ଷ ପର୍ଯ୍ୟନ୍ତ ଜେଲଦଣ୍ଡ ଏବଂ ଜରିମାନା କରାଯାଇପାରେ।
ଅଯୋଧ୍ୟା ମାମଲାକୁ ପୂଜା ସ୍ଥଳ ଅଧିନିୟମରୁ ଅଲଗା ରଖାଯାଇଥିଲା। ଏହା ପଛର କାରଣ ହେଉଛି ଦେଶର ସ୍ବାଧୀନତା ପୂର୍ବରୁ ଏହି ମାମଲା କୋର୍ଟରେ ଚାଲିଥିଲା। ତେଣୁ ଏହାକୁ ପୂଜା ଅଧିନିୟମଠାରୁ ଅଲଗା ରଖା ହୋଇଥିଲା।
ଆହୁରି ପଢ଼ନ୍ତୁ: ପୂଜାସ୍ଥଳ ଅଧିନିୟମ-୧୯୯୧କୁ ଚ୍ୟାଲେଞ୍ଜ କରି ସୁପ୍ରିମ୍କୋର୍ଟରେ ପିଟିଶନ…
ଭାଜପା ରାଜ୍ୟସଭା ଏମପି ହରନାଥ ସିଂ ଯାଦବ ଏହି ଆଇନକୁ ରଦ୍ଦ କରିବାକୁ ଦାବି କରିଛନ୍ତି। ବଜେଟ ଅଧିବେଶନରେ ରାଜ୍ୟସଭାରେ ବିତର୍କ ବେଳେ ସେ ତୁରନ୍ତ କାର୍ଯ୍ୟକାରୀ ହେବା ସହିତ ଏହି ଆଇନକୁ ରଦ୍ଦ କରିବାକୁ କହିଥିଲେ। ଏହି ଆଇନ ସମ୍ବିଧାନ ଅନୁଯାୟୀ ହିନ୍ଦୁ, ଶିଖ, ଜୈନ ଏବଂ ବୌଦ୍ଧ ସମ୍ପ୍ରଦାୟର ଧାର୍ମିକ ଅଧିକାରକୁ ଉଲ୍ଲଂଘନ କରୁଛି ବୋଲି ସେ କହିଛନ୍ତି। ସେ ଏହାକୁ ଅଣସାମ୍ବିଧାନିକ ବୋଲି ମଧ୍ୟ କହିଛନ୍ତି।
ଆହୁରି ପଢ଼ନ୍ତୁ: ବାବ୍ରି ଭଙ୍ଗ ପରବର୍ତ୍ତୀ ସ୍ଥିତି ସମାଜରେ ସୃଷ୍ଟି ନହେଉ,ପୂଜାସ୍ଥଳ ଅଧିନିୟମ ସମର୍ଥନରେ ଏସ୍ସିଙ୍କ ଦ୍ୱାରସ୍ଥ ହେଲେ ମୁସଲମାନ ସଂଗଠନ…
