ଲୋଇସିଂହା,୧୧।୧୨(ସୁଶାନ୍ତ ବାରିକ): ଲୋଇସିଂହାଶକ୍ତି ନଗର ପଡାରେ ପାଇପ ଫାଟି ରାସ୍ତା ଉପରେ ବହୁଛି ପାଣି। ଏ ଦୃଶ୍ୟ ହେଉଛି ବଲାଙ୍ଗୀର ଜିଲା ଲୋଇସିଂହା ବ୍ଲକ ଲୋଇସିଂହା ଓ୍ବାର୍ଡ ନଂ ୧୬ ଶକ୍ତି ନଗର ପଡା ଇଣ୍ଡିଆନ ବ୍ୟାଙ୍କ ରାସ୍ତାର ଦୃଶ୍ୟ। ପାନୀୟ ଜଳ ଯୋଗାଣ ପାଇପ ଫାଟି ରାସ୍ତା ଉପରେ ବହୁଛି। ଦୀର୍ଘ ଦୁଇମାସ ହେଲା ଏହି ପାଇପ ସାମାନ୍ୟ ଫାଟି ପାଣି ବାହାରୁଥିଲା। ସ୍ଥାନୀୟ ସରପଞ୍ଚଙ୍କୁ ଏହି ସମସ୍ୟା ବିଷୟରେ ଅବଗତ କରାଯାଇଥିଲା। ସରପଞ୍ଚ ନିଜେ ଆସି କ୍ଷେତ୍ର ପରିଦର୍ଶନ କରି ସୁଦ୍ଧା ସମାଧାନ କଲେ ନାହିଁ। ଶେଷରେ ଏବେ ପରିସ୍ଥିତି ଏପରି ହୋଇଛି ଯେ, ସମ୍ପୂର୍ଣ୍ଣ ପାଇପ ଫାଟି ଦୀର୍ଘ ତିନି ଦିନ ହେଲା ରାସ୍ତା ଉପରେ ପାଣି ବହି ଚାଲୁଛି। ପାଣି ଯୋଗାଣ ସମୟରେ ପାଇପରୁ ପାଣି ବାହାରିବା ଯୋଗୁ ଏକପ୍ରକାର ଜଳବନ୍ଦୀର ସମ୍ମୁଖୀନ ହେଉଛନ୍ତି ପଡାବାସୀ। ଉକ୍ତ ପଡ଼ାରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ଏକ ଘରୋଇ କୋଚିଙ୍ଗ ସେଣ୍ଟର ରହିଛି। ଫଳରେ ଏତେ ଶୀତରେ ଛୋଟ ଛୋଟ ଛୁଆ ମାନେ ଏହି ପାଣି ଭିତର ଦେଇ ଯାତାୟାତ କରିବାକୁ ବାଧ୍ୟ ହେଉଛନ୍ତି। ଜଳ ଯୋଗାଣ ବେଳେ ପାଣି ଅପଚୟ ହେଉଥିବାରୁ ସାଧାରଣରେ ଅସନ୍ତୋଷ ପ୍ରକାଶ ପାଉଛି।
Dharitri – Odisha’s No.1 Odia Daily
