ମୁଲାନପୁର,୧୧ା୧୨: ମହାରାଜା ଯାଦବୀନ୍ଦ୍ର ସିଂହ ଅନ୍ତର୍ଜାତୀୟ କ୍ରିକେଟ୍ ଷ୍ଟାଡିୟମ୍ରେ ଖେଳାଯାଇଥିବା ଦ୍ୱିତୀୟ T20 ଅନ୍ତର୍ଜାତୀୟ ମ୍ୟାଚରେ ଭାରତୀୟ ଦଳ ଦକ୍ଷିଣ ଆଫ୍ରିକାଠାରୁ ୫୧ ରନ୍ରେ ପରାସ୍ତ ହୋଇଛି। ପ୍ରଥମେ ବୋଲର ଏବଂ ପରେ ବ୍ୟାଟରଙ୍କ ଦୁର୍ବଳ ପ୍ରଦର୍ଶନ ଯୋଗୁଁ ଭାରତକୁ ଏହି ବଡ଼ ପରାଜୟର ସାମ୍ନା କରିବାକୁ ପଡ଼ିଛି। ଏହି ବିଜୟ ସହ ଦକ୍ଷିଣ ଆଫ୍ରିକା ୫ ମ୍ୟାଚ୍ ବିଶିଷ୍ଟ ସିରିଜ୍କୁ ୧-୧ରେ ବରାବର କରିଛି।
ମ୍ୟାଚ୍ ପୂର୍ବରୁ ପୂର୍ବତନ ଭାରତୀୟ କ୍ରିକେଟର ଯୁବରାଜ ସିଂହ ଟିମ୍ ହଡଲ୍ରେ ଯୋଗ ଦେଇଥିଲେ। ଏହି ସମୟରେ ୨୦୧୧ ବିଶ୍ୱକପ୍ ବିଜେତା ଦଳର ତାଙ୍କ ସାଥୀ ତଥା ମୁଖ୍ୟ କୋଚ୍ ଗୌତମ ଗମ୍ଭୀରଙ୍କ ସହ ତାଙ୍କର ଏକ ମଜାଦାର ମୁହୂର୍ତ୍ତର ଫଟୋ ସୋସିଆଲ୍ ମିଡିଆରେ ଭାଇରାଲ୍ ହୋଇଥିଲା।
ମ୍ୟାଚ୍ ଆରମ୍ଭ ପୂର୍ବରୁ ଯୁବରାଜ ସିଂହଙ୍କ ନାମରେ ନାମିତ ଏକ ଷ୍ଟାଣ୍ଡ୍ର ଉଦ୍ଘାଟନ କରାଯାଇଥିଲା। ଏହି ଷ୍ଟାଡିୟମ୍ରେ ଏହା ପ୍ରଥମ ପୁରୁଷ ଅନ୍ତର୍ଜାତୀୟ କ୍ରିକେଟ୍ ମ୍ୟାଚ୍, ଯାହା ଭାରତର ୫୫ ତମ ଭେନ୍ୟୁ ଭାବରେ ପରିଗଣିତ ହୋଇଛି।
ଦକ୍ଷିଣ ଆଫ୍ରିକା ପ୍ରଥମେ ବ୍ୟାଟିଂ କରି ୨୦ ଓଭରରେ ୪ ୱିକେଟ୍ ହରାଇ ୨୧୩ ରନ୍ର ବିଶାଳ ସ୍କୋର କରିଥିଲା। ଓପନର କ୍ୱିଣ୍ଟନ ଡି କକ୍ ମାତ୍ର ୪୬ ବଲ୍ରେ ୭ଟି ଛକା ସହାୟତାରେ ୯୦ ରନ୍ର ଚମତ୍କାର ପାଳି ଖେଳିଥିଲେ। ଡୋନାଭାନ୍ ଫେରେରା (୩୦) ଏବଂ ଡେଭିଡ୍ ମିଲର୍ (୨୦) ଦ୍ରୁତ ରନ୍ କରିଥିଲେ।
ଭାରତୀୟ ବୋଲର ଯଶପ୍ରୀତ ବୁମରା ଏବଂ ଅର୍ଶଦୀପ ସିଂହ ମହଙ୍ଗା ସାବ୍ୟସ୍ତ ହୋଇଥିଲେ। ବିଶେଷକରି ଅର୍ଶଦୀପ ଗୋଟିଏ ଓଭରରେ ୭ଟି ୱାଇଡ୍ ବଲ୍ ପକାଇ ଅସନ୍ତୋଷଜନକ ପ୍ରଦର୍ଶନ କରିଥିଲେ।
୨୧୪ ରନ୍ର ବିଜୟ ଲକ୍ଷ୍ୟ ପିଛା କରି ଭାରତୀୟ ଦଳ ୧୯.୧ ଓଭରରେ ମାତ୍ର ୧୬୨ ରନ୍ କରି ଅଲ୍ ଆଉଟ୍ ହୋଇଯାଇଥିଲା। ଶୁବମନ ଗିଲ୍, ଅଭିଷେକ ଶର୍ମା ଏବଂ ଅଧିନାୟକ ସୂର୍ଯ୍ୟକୁମାର ଯାଦବଙ୍କ ୱିକେଟ୍ ଶୀଘ୍ର ହରାଇବା ପରେ ଭାରତୀୟ ଦଳ ଚାପରେ ଆସିଯାଇଥିଲା। ତିଳକ ବର୍ମା ୩୪ ବଲ୍ରେ ୬୨ ରନ୍ର ଏକକ ଲଢ଼ୁଆ ପାଳି ଖେଳିଥିଲେ।
ଦକ୍ଷିଣ ଆଫ୍ରିକା ପାଇଁ ଓଟନିଏଲ୍ ବାର୍ଟମ୍ୟାନ୍ ୪ ଓଭରରେ ୨୪ ରନ୍ ଦେଇ ୪ଟି ୱିକେଟ୍ ନେଇ ଦଳର ବିଜୟରେ ମୁଖ୍ୟ ଭୂମିକା ଗ୍ରହଣ କରିଥିଲେ। ଏହା ବ୍ୟତୀତ ଲୁଙ୍ଗି ଏନଗିଡି, ମାର୍କୋ ୟାନସେନ୍ ଏବଂ ଲୁଥୋ ସିପାମଲା ପ୍ରତ୍ୟେକ ୨ଟି ଲେଖାଏଁ ୱିକେଟ୍ ନେଇଥିଲେ।
