ନ୍ୟୁୟର୍କ,୨୬।୧୧(ପି.ଟି.): ଏନ୍ବିଏ ଦଳ ଓକ୍ଲାହୋମା ସିଟି ଥଣ୍ଡରଗାର୍ଡ ଖେଳାଳି ଜୋଶ ଗିଡେ ଅଡୁଆରେ। ଜଣେ ନାବାଳିକାଙ୍କ ସହିତ ଶାରୀରିକ ସମ୍ପର୍କ ରଖିଥିବା ନେଇ ଅଭିଯୋଗ ଆସିବା ପରେ ଏନ୍ବିଏ ପକ୍ଷରୁ ତଦନ୍ତ ଆରମ୍ଭ କରାଯାଇଛି। ଏକ ସୋସିଆଲ ମିଡିଆ ଆକାଉଣ୍ଟରେ ଏକ ଭିଡିଓ ପୋଷ୍ଟ କରାଯାଇଥିଲା। ଗିଡେଙ୍କ ସହିତ ଏକାଧିକ ଭିଡିଓରେ ନଜର ଆସିଥିବା ବାଳିକା ଜଣକ ଜଣେ ହାଇସ୍କୁଲ ଛାତ୍ର ବୋଲି ଉକ୍ତ ଆକାଉଣ୍ଟରୁ ଦାବି କରାଯାଇଥିଲା। ତେବେ ପରବର୍ତ୍ତୀ ସମୟରେ ଉକ୍ତ ଆକାଉଣ୍ଟକୁ ଡିଆକ୍ଟିଭେଟ୍ କରାଯାଇଥିଲା। ଏନ୍ବିଏର ଭବିଷ୍ୟତର ତାରକା ଭାବେ ଗିଡେଙ୍କୁ ବିବେନା କରାଯାଏ। ଅଷ୍ଟ୍ରେଲିଆର ଏହି ୨୧ ବର୍ଷୀୟ ଖେଳାଳି ଜଣକ ଏହି ମାମଲାକୁ ନେଇ ନୀରବତା ଅବଲମ୍ବନ କରିଛନ୍ତି। ତେବେ ଏନ୍ବିଏ ସ୍ବତନ୍ତ୍ର ଭାବରେ ଏହି ମାମଲାର ତଦନ୍ତ କରିବ ବୋଲି ମୁଖପାତ୍ର ମାଇକେଲ୍ ବାସ୍ କହିଛନ୍ତି। ଖବରଦାତା ଏହି ମାମଲାକୁ ନେଇ ଗିଡେଙ୍କୁ ପ୍ରଶ୍ନ କରିବା ପରେ ସେ ବର୍ତ୍ତମାନ ଏହାକୁ ନେଇ କୌଣସି ମତାମତ ଦେବାକୁ ଚାହୁଁ ନ ଥିବା ପ୍ରକାଶ କରିଥିଲେ। ଓକ୍ଲାହୋମା ସିଟି ଥଣ୍ଡରଗାର୍ଡ ଦଳର କୋଚ୍ ମାର୍କ ଡାଇଗ୍ନେଲ୍ଟ ମଧ୍ୟ ଏହାକୁ ନେଇ ପ୍ରତିକ୍ରିୟା ପ୍ରକାଶ କରିନାହାନ୍ତି। ଏହା ଜୋଶଙ୍କ ବ୍ୟକ୍ତିଗତ ମାମଲା ହୋଇଥିବାରୁ ଆମେ କିଛି ମତାମତ ଦେବା ଶ୍ରେୟସ୍କର ହେବ ନାହିଁ। ୨୦୨୧ରେ ପ୍ରଥମ ଥର ଏନ୍ବିଏ ଖେଳିଥିବା ଜୋଶ୍ ଚଳିତ ସିଜନରେ ୧୨.୩ ହାରାହାରିରେ ସ୍କୋର କରୁଥିବା ବେଳେ ୫.୭ ରିବାଉଣ୍ଡ ଓ ୪.୫ ଆସିଷ୍ଟ ସ୍କୋର ରହିଛି। ପ୍ରଥମ ସିଜନରେ ସେ ହାରାହାରି ୧୬.୬ ପଏଣ୍ଟ ସ୍କୋର କରୁଥିବା ବେଳେ ରିବାଉଣ୍ଡରୁ ୭.୯ ଓ ଆସିଷ୍ଟରୁ ୬.୨ ସ୍କୋର କରିଥିଲେ।
