ଭୁବନେଶ୍ୱର୧୪।୬: ପାକିସ୍ତାନଠାରୁ ଆରମ୍ଭ କରି ଆମେରିକା ପର୍ଯ୍ୟନ୍ତ, ବିଶ୍ୱର ସମସ୍ତ ଦେଶରେ ପେଟ୍ରୋଲ-ଡିଜେଲ ଦର ଆକାଶଛୁଆଁ ହେବାରେ ଲାଗିଛି, କିନ୍ତୁ ଭାରତ ହେଉଛି ଏକମାତ୍ର ଦେଶ ଯେଉଁଠାରେ ଜାଳେଣି କିମ୍ୱା ଇନ୍ଧନ ମୂଲ୍ୟରେ ୩.୧% ହ୍ରାସ ଘଟିଛି। କେନ୍ଦ୍ର ପେଟ୍ରୋଲିୟମ ଏବଂ ପ୍ରାକୃତିକ ଗ୍ୟାସ ମନ୍ତ୍ରୀ ହରଦୀପ ସିଂ ପୁରୀଙ୍କ ବୟାନ ଅନୁଯାୟୀ, ମେ ୨୦୨୨ ରୁ ମେ ୨୦୨୬ ମଧ୍ୟରେ ଭାରତରେ ଜାଳେଣି ଦରରେ ୩.୧% ହ୍ରାସ ରେକର୍ଡ କରାଯାଇଛି।
କେନ୍ଦ୍ର ମନ୍ତ୍ରୀ ନିଜ ଦ୍ୱାରା ଜାରି କରାଯାଇଥିବା ସଂଖ୍ୟା ଓ ତଥ୍ୟ ଆଧାରରେ ବୁଝାଇଛନ୍ତି ଯେ, ଯେଉଁଠି ଗତ ଚାରି ବର୍ଷ ମଧ୍ୟରେ ପାକିସ୍ତାନରେ ପେଟ୍ରୋଲ-ଡିଜେଲ ମୂଲ୍ୟରେ ୭୦% ବୃଦ୍ଧି ଘଟିଛି, ସେହିପରି ଶ୍ରୀଲଙ୍କାରେ ଦାମ ୬୬% ପର୍ଯ୍ୟନ୍ତ ବଢ଼ିଛି। ଇଟାଲୀ ଏବଂ ଫ୍ରାନ୍ସରେ ମଧ୍ୟ ଜାଳେଣି ଦର ଯଥାକ୍ରମେ ୪୬% ଏବଂ ୪”୭% ବୃଦ୍ଧି ପାଇଛି। ଆମେରିକାରେ ମଧ୍ୟ ଇନ୍ଧନ ଦର ୩୫% ପର୍ଯ୍ୟନ୍ତ ବଢ଼ିଛି। ଅପରପକ୍ଷରେ, ଭାରତରେ କ୍ରମାଗତ ଭାବେ ଦାମ କମିଛି। ଏହି ଚାରି ବର୍ଷ ମଧ୍ୟରେ ଭାରତରେ ଜାଳେଣି ମୂଲ୍ୟରେ ୩.୧% ର ଶୁଦ୍ଧ (ନେଟ) ହ୍ରାସ ଘଟିଛି।
ସରକାରଙ୍କ ତରଫରୁ କୁହାଯାଇଛି ଯେ, ନିକଟରେ ପଶ୍ଚିମ ଏସିଆରେ ଦେଖାଦେଇଥିବା ଉତ୍ତେଜନା ହେତୁ ଆନ୍ତର୍ଜାତୀୟ ସ୍ତରରେ ଅଶୋଧିତ ତୈଳ (କ୍ରୁଡ ଅଏଲ) ମୂଲ୍ୟ ବ୍ୟାରେଲ ପିଛା ୭୦ ଡଲାରରୁ ବୃଦ୍ଧି ପାଇ ୧୨୨ ଡଲାର ସ୍ତରରେ ପହଞ୍ଚିଛି। ସରକାର ଦେଶର ଜନସାଧାରଣଙ୍କୁ ଏହି ଦରବୃଦ୍ଧିର ପ୍ରଭାବରୁ ରକ୍ଷା କରିବା ପାଇଁ ସମୟ ସମୟରେ ଅନେକ ପଦକ୍ଷେପ ନେଇଛନ୍ତି; ଯେପରିକି ସରକାର ପେଟ୍ରୋଲ ଉପରୁ ଲିଟର ପିଛା ୩ ଟଙ୍କା ଏକ୍ସାଇଜ ଡ୍ୟୁଟି (ଅବକାରୀ ଶୁଳ୍କ) କାଟ କରିଛନ୍ତି ଏବଂ ଡିଜେଲ ଉପରେ ଏହାକୁ ଶୂନ୍ୟ (ଜିରୋ) କରିଦେଇଛନ୍ତି।
ସାଧାରଣ ଜନତାଙ୍କୁ ବିଶ୍ୱସ୍ତରୀୟ ମୂଲ୍ୟ ବୃଦ୍ଧିରୁ ବଞ୍ଚାଇବା ପାଇଁ ସରକାର ଟିକସ ହ୍ରାସ ଆକାରରେ ବାର୍ଷିକ ପ୍ରାୟ ୧ ଲକ୍ଷ କୋଟିରୁ ଅଧିକ ଟଙ୍କାର ରାଜସୱ ବୋଝ ନିଜେ ବହନ କରିଛନ୍ତି। ସରକାରୀ ତୈଳ କମ୍ପାନୀଗୁଡ଼ିକ ମଧ୍ୟ ଆନ୍ତର୍ଜାତୀୟ ସ୍ତରରେ କ୍ରୁଡ ଅଏଲ ମୂଲ୍ୟର ଏହି ଅସ୍ଥିରତା ମଧ୍ୟରେ ବହୁ ପରିମାଣର ‘ଅଣ୍ଡର ରିକଭରି’ (Under recovery) ସହିଛନ୍ତି, ଯଦ୍ଦୱାରା ଦେଶର ଖୁଚୁରା ବଜାରରେ ଜାଳେଣି ଦର ନ ବଢ଼ୁ। ନିକଟ ଅତୀତର କିଛି ସପ୍ତାହ ମଧ୍ୟରେ ଘରୋଇ ବଜାରରେ ଅଶୋଧିତ ତୈଳର ମୂଲ୍ୟ ବୃଦ୍ଧି ଯୋଗୁଁ ପେଟ୍ରୋଲ-ଡିଜେଲ ଦାମ ନିଶ୍ଚିତ ଭାବେ କିଛିଟା ବଢ଼ିଛି, କିନ୍ତୁ ୪ ବର୍ଷର ଦୀର୍ଘକାଳୀନ ଅବଧିକୁ ଦେଖିଲେ, ଏହା ୩% ରୁ ଅଧିକ ହ୍ରାସକୁ ଦର୍ଶାଉଛି।
ଖୁଚୁରା ପେଟ୍ରୋଲ ପମ୍ପଗୁଡ଼ିକରୁ ଶିଳ୍ପଭିତ୍ତିକ କିମ୍ୱା ପାଇକାରୀ (ଥୋକ) କ୍ରେତାମାନଙ୍କ ଦ୍ୱାରା ଶସ୍ତା ଡିଜେଲ ଉଠାଇବା ଏବଂ ଏହାର କଳାବଜାରୀକୁ ରୋକିବା ପାଇଁ ସରକାର ଗାଡ଼ି ପିଛା ଦୈନିକ ୨୦୦ ଲିଟର ଡିଜେଲର ସୀମା ମଧ୍ୟ ସ୍ଥିର କରିଛନ୍ତି, ଯଦ୍ୱାରା ସାଧାରଣ ଗ୍ରାହକଙ୍କ ପାଇଁ ଜାଳେଣି ଷ୍ଟକରେ କୌଣସି ଅଭାବ ଦେଖା ନଦିଏ।
ଭୁବନେଶ୍ୱରରେ ଆଜି ପେଟ୍ରୋଲ ରେଟ ୧୦୮.୮୯ ଟଙ୍କା ଥିବା ବେଳେ ଡିଜେଲ ରେଟ ୧୦୦.୬୦ ଟଙ୍କା ରହିଛି । ଗତକାଲି ତୁଳନାରେ ଦରରେ ସାମାନ୍ୟ ହ୍ରାସ ଘଟିଛି ।
