ନୂଆଦିଲ୍ଲୀ, ୧୬। ୩: ବିବାହିତ ପୁରୁଷ କରୁଥିବା ଆତ୍ମହତ୍ୟା ଘରୋଇ ହିଂସା। ଏ ନେଇ ଜାଇଡ୍ଲାଇନ୍ ଓ ଜାତୀୟ ପୁରୁଷ କମିଶନ୍ ଗଠନ କରାଯିବା ନେଇ ବୁଧବାର ସୁପ୍ରିମକୋର୍ଟରେ ପିଟିଶନ୍ ଦାଖଲ କରାଯାଇଛି। ପିଟିଶନ୍ରେ ଆଇନଜୀବୀ ମହେଶ କୁମାର ତିଓ୍ବାରି ନ୍ୟାଶନାଲ କ୍ରାଇମ୍ ରେକର୍ଡସ୍ ବ୍ୟୁରୋର ୨୦୨୧ ଡେଟାକୁ ଦାଖଲ କରିଛନ୍ତି, ଯେଉଁଥିରେ ଆତ୍ମହତ୍ୟା ଯୋଗୁ ଦେଶରେ ମୋଟ ୧,୬୪,୦୩୩ ଜଣଙ୍କ ମୃତ୍ୟୁ ଘଟିଥିବା ଦର୍ଶାଯାଇଛି। ମୃତକଙ୍କ ମଧ୍ୟରୁ ୮୧,୦୬୩ ବିବାହିତ ପୁରୁଷ ଆତ୍ମହତ୍ୟା କରିଥିବାବେଳେ ୨୮,୬୮୦ ବିବାହିତ ମହିଳା ଆତ୍ମହତ୍ୟା କରିଥିବା ଡେଟାରେ ଉଲ୍ଲେଖ କରାଯାଇଛି। ତେବେ ୩୩.୨% ପୁରୁଷ ପାରିବାରିକ ଅସୁବିଧା ପାଇଁ ଜୀବନ ହାରିବା ସହ ୪.୮% ବିବାହ ସଂକ୍ରାନ୍ତୀୟ ବିବାଦ ପାଇଁ ଆତ୍ମହତ୍ୟା କରିଥିବା ଜଣାପଡ଼ିଛି।
ସେହିପରି ଚଳିତବର୍ଷ ୧,୧୮,୯୭୯ ପୁରୁଷ ଏବଂ ୪୫,୦୨୬ ଜଣ ମହିଳା ଆତ୍ମହତ୍ୟା କରିଛନ୍ତି। ତେବେ ଜାତୀୟ ମାନବାଧିକାର କମିଶନ୍ ଘରୋଇ ହିଂସାର ଶିକାର ହେଉଥିବା ପୁରୁଷଙ୍କ କ୍ଷେତ୍ରରେ ହସ୍ତକ୍ଷେପ କରିବା ପାଇଁ ପିଟିଶନ୍ରେ ଉଲ୍ଲେଖ କରାଯାଇଛି। ଅନ୍ୟପକ୍ଷେ ପାରିବାରିକ ବିବାଦ ଓ ବିବାହ ଜନିତ ସମସ୍ୟା ସମ୍ପର୍କିତ ଅଭିଯୋଗକୁ ପ୍ରତ୍ୟେକ ଥାନାର ଅଧିକାରୀ ଗ୍ରହଣ କରିବା ସହ ଏ ନେଇ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ଗାଇଡ୍ଲାଇନ୍ ଜାରି କରିବା କଥା ପିଟିଶନ୍ରେ ଉଲ୍ଲେଖ କରାଯାଇଛି। ଘରୋଇ ହିଂସାର ଶିକାର ହୋଇ ଆତ୍ମହତ୍ୟା କରୁଥିବା ପୁରୁଷଙ୍କ ସମ୍ପର୍କରେ କେନ୍ଦ୍ରୀୟ ଆଇନ କମିଶନ ତରଫରୁ ରିସର୍ଚ୍ଚ କରିବା କଥା ପିଟିଶନ୍ରେ କୁହାଯାଇଛି।
