ଯେଉଁ ଲୋକମାନେ ଚାପ ଯୋଗୁ ରାତିରେ ସଠିକ ଭାବେ ଶୋଇପାରୁ ନାହାଁନ୍ତି କିମ୍ବା ଯେଉଁମାନଙ୍କୁ ନିଦ ହେଉ ନାହିଁ, ସେମାନଙ୍କ ପାଇଁ ଏକ ଖୁସି ଖବର ଅଛି। ହଂକଂରେ ଏଭଳି ଲୋକଙ୍କ ପାଇଁ ଏକ ସ୍ବତନ୍ତ୍ର ବସ ଯାତ୍ରା ଆରମ୍ଭ ହୋଇଛି। ଏଥିରେ ବସ ଯାତ୍ରା କୌଣସି ସ୍ଥାନକୁ ଯିବା ପାଇଁ ନୁହେଁ, ବରଂ ବସ ଭିତରେ ଆରାମଦାୟକ ପରିବେଶରେ ଶୋଇବା ପାଇଁ ବ୍ୟବସ୍ଥା କରାଯାଇଥାଏ। ଯାତ୍ରୀମାନେ ୫ ଘଣ୍ଟିଆ ବସ ଯାତ୍ରା ପାଇଁ ଟିକେଟ ନିଅନ୍ତି, କିନ୍ତୁ ସେମାନେ ଏହାକୁ କୌଣସି ଗନ୍ତବ୍ୟ ସ୍ଥଳରେ ପହଞ୍ଚିବା ପାଇଁ ବ୍ୟବହାର କରନ୍ତି ନାହିଁ ବରଂ ବସରେ ଶୋଇବା ପାଇଁ ବ୍ୟବହାର କରନ୍ତି। ଏହି ଡବଲ ଡେକର୍ ବସ ୫ ଘଣ୍ଟା ମଧ୍ୟରେ ୭୬ କିଲୋମିଟର ଅତିକ୍ରମ କରେ ଏବଂ ଯାତ୍ରୀମାନେ ଏହି ଦୀର୍ଘ ଯାତ୍ରା ସମୟରେ ଆରାମରେ ଶୋଇପାରୁଛନ୍ତି । ସାଧାରଣ ବସ୍ରେ ଆରାମରେ ଶୋଇଥିବା ଲୋକଙ୍କୁ ଦେଖିବା ଦ୍ୱାରା ଏହି ବସ ସେବା ଆରମ୍ଭ ହୋଇଛି।
ଏହି ଅଜବ ବସ ଯାତ୍ରା ଆରମ୍ଭ କରିଥିବା କମ୍ପାନୀ ଉଲୁ ଟ୍ରାଭେଲ୍ସର ମାର୍କେଟିଂ ଏବଂ ବିଜନେସ ଡେଭଲପମେଣ୍ଟ ମ୍ୟାନେଜର କେନେଥ କଙ୍ଗ କହିଛନ୍ତି ଯେ, ନୂଆ ନୂଆ ବସ ଯାତ୍ରା ଆରମ୍ଭ କରୁଥିଲି, ମୋର ଜଣେ ବନ୍ଧୁଙ୍କ ପୋଷ୍ଟ ଦେଖିଲି। ସେ ଲେଖିଥିଲେ ଚାପ ଯୋଗୁ ସେ ରାତିରେ ଭଲ ନିଦ ହୋଇପାରି ନ ଥିଲେ। ପରେ ବସ ଯାତ୍ରା ସମୟରେ ସେ ଶୋଇପଡିଥିଲେ। ଏହିଠାରେ ଆମେ ଏହି ନୂତନ ବସ ଯାତ୍ରା ପାଇଁ ଧାରଣା ପାଇଲୁ ବୋଲି ସେ କହନ୍ତି।
ଏହି ବସ ରେ ଯାତ୍ରା ପାଇଁ ଟିକେଟ ମୂଲ୍ୟ ୧୦୦୦ ରୁ ୩,୮୦୦ଟଙ୍କା ମଧ୍ୟରେ ରହିଛି। ଡେକ ଏବଂ ସିଟ ସ୍ଥିତିକୁ ଆଧାର କରି ଟିକେଟ ମୂଲ୍ୟ ନିର୍ଣ୍ଣୟ କରାଯାଏ। ଯାତ୍ରୀମାନେ ବସ୍ରେ ଭଲ ଶୋଇବା ପାଇଁ ସେମାନଙ୍କୁ ଆଇ ମାସ୍କ ଏବଂ ଇୟର ପ୍ଲଗ ମଧ୍ୟ ଯୋଗାଇ ଦିଆଯାଇଛି। ଗତ ଶନିବାର ଠାରୁ ଆରମ୍ଭ ହୋଇଥିବା ଶୋଇଥିବା ବସ ଟୁରକୁ ଲୋକମାନେ ପସନ୍ଦ କରୁଛନ୍ତି। ଏହା ପୂର୍ବରୁ ଏହି ଯାତ୍ରା ପାଇଁ ସମସ୍ତ ଟିକେଟ ଅଳ୍ପ ସମୟ ମଧ୍ୟରେ ବିକ୍ରି ହୋଇଯାଇଥିଲା। ଏଥିରେ ଭ୍ରମଣ କରିବା ପାଇଁ ଲୋକମାନେ ଜୋତା ବଦଳରେ ଚପଲ ପିନ୍ଧି ଆସିଥିଲେ ଏବଂ ସେମାନଙ୍କ ସହିତ କମ୍ବଳ ଓ ତକିଆ ଆଣିଥିଲେ।
