ମାଲକାନଗିରି,୧୦ା୨(ଦୁର୍ଯ୍ୟୋଧନ ପାତ୍ର)-ଗରିବ ଓ ଅସହାୟଙ୍କୁ ବାର୍ଷିକ ଅନ୍ୟୁନ ଶହେ ଦିନ ରୋଜଗାର ଯୋଗାଇ ଦେବାକୁ ସରକାର ବାର୍ଷିକ କୋଟି କୋଟି ଟଙ୍କା ଖର୍ଚ୍ଚ କରି ଏମ୍ଜିଏନ୍ଆରଇଜିଏସ୍ ଭଳି ବହୁ ଯୋଜନା କରିଛନ୍ତି। ଅଞ୍ଚଳର ବିକାଶ ପାଇଁ ବିଭିନ୍ନ ଯୋଜନାରେ ଲୋକଙ୍କୁ ସାମିଲ କରାଯାଇ ସୁଶାସନର ଆଶ୍ୱାସନା ମଧ୍ୟ ଦିଆଯାଉଛି ା ହେଲେ ବିଭିନ୍ନ ପ୍ରକଳ୍ପ ଓ ନିର୍ମାଣାଧିନ କାମରେ ଲୋକଙ୍କ ବଦଳରେ ମେଶିନ ଲଗାଇ ବେଆଇନ ଭାବେ ନିମ୍ନମାନର କାମ କରାଯାଉଥିବା ବେଳେ ପ୍ରଶାସନ ନୀରବଦ୍ରଷ୍ଟା ସାଜିଛି।
ଫଳରେ ବାଧ୍ୟ ହୋଇ ଅଞ୍ଚଳର ଲୋକେ କାମ ଧନ୍ଦା ନ ପାଇ ଦାଦନ ଖଟିବାକୁ ବାହାର ରାଜ୍ୟକୁ ଯିବା ପାଇଁ ବାଧ୍ୟ ହେଉଛନ୍ତି। ଏପରି ଦେଖିବାକୁ ମିଳିଛି କାଲିମେଳା ବ୍ଲକ ଗୁମକା ପଞ୍ଚାୟତ ଏମ୍ପିଭି ୧୪ ଗ୍ରାମରୁ ନଦୀ ଘାଟ ରାସ୍ତା କାମ ବିନା ଫଳକରେ ଠିକାଦାର ମେଶିନ ଲଗାଇ ସାରି ଦେଇଛନ୍ତି। ଏହି ପ୍ରକଳ୍ପଟି ଏମ୍ଜିଏନ୍ଆରଇଜିଏସ୍ରେ ଲୋକଙ୍କ ଦ୍ୱାରା କରାଯିବାକୁ ଥିବା ବେଳେ ଠିକାଦାରଙ୍କ ଦ୍ୱାରା ମେଶିନ ଲଗାଇ କରାଯାଇ ଲକ୍ଷାଧିକ ଟଙ୍କା ଆତ୍ମସାତ୍ କରାଯାଇଛି। କେତେ ମାଟି ପକାଇ କାମଟି ସମ୍ପୂର୍ଣ୍ଣ ହୋଇଯାଇଥିବା କୁହାଯାଇଛି।
ପ୍ରକଳ୍ପ ଆଡ଼ରେ ପକାଯାଇଥିବା ଏହି ମାଟି ବର୍ଷାରେ ଧୋଇ ହୋଇଯିବ ବୋଲି ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଗ୍ରାମରେ କୌଣସି କାମ ଧନ୍ଧା ନ ପାଇ ଲୋକେ ଦାଦନ ଖଟିବାକୁ ପଡୋଶୀ ଆନ୍ଧ୍ର ପ୍ରଦେଶ ଓ ଛତିଶଗଡ଼କୁ ଚାଲି ଯାଉଥିବା ବେଳେ ଗ୍ରାମରେ ତରବରିଆ ଭାବେ ଠିକାଦାରଙ୍କ ଦ୍ୱାରା ଚେଷ୍ଟା କରିଥିଲେ ସୁଦ୍ଧା ତାହା ସମ୍ଭବ ହୋଇ ପାରି ନ ଥିବାରୁ ବିଭାଗୀୟ ଅଧିକାରୀଙ୍କ ପ୍ରତିକ୍ରିୟା ମିଳି ପାରିନାହିଁ। ଏହି ନିମ୍ନମାନର କାମର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଗ୍ରାମବାସୀ ଦାବି କରିଛନ୍ତି।
