ବେହେରା,୨୦।୫(ଡି.ଏନ.ଏ.): କଳାହାଣ୍ଡି ଜିଲା ଧର୍ମଗଡ଼ ବ୍ଲକ ପର୍ଲା ପଞ୍ଚାୟତ ସେମଲା ଗ୍ରାମରେ ନିର୍ମିତ ବସୁଧା ଯୋଜନା କାମକୁ ଆସୁ ନାହିଁ। ଗାଁରେ ବିଶୁଦ୍ଧ ପାନୀୟ ଜଳ ଯୋଗାଇ ଦେବା ନିମନ୍ତେ ବସୁଧା ଯୋଜନାରେ ନିର୍ମାଣ ହୋଇଛି ଓଭର ହେଡପାଣି ଟାଙ୍କି। ଘରକୁ ଘର ପାଇପ ବିଛାଯାଇ ସମ୍ପୂର୍ଣ୍ଣ ହୋଇଛି ନିର୍ମାଣ କାର୍ଯ୍ୟ । କିନ୍ତୁ ପାଣି ଟୋପାଏ ପାଇ ପାରୁ ନାହାନ୍ତି ଗ୍ରାମବାସୀ। ଏହି ଯୋଜନା ପରେ ଗାଁରେ ବିଶୁଦ୍ଧ ପାନୀୟ ଜଳ ଯୋଗାଣ ହୋଇ ଜଳ କଷ୍ଟ ଦୂର ହେବ ବୋଲି ଲୋକେ ଆଶା କରିଥିଲେ। ହେଲେ ଗ୍ରାମବାସୀଙ୍କ ଆଶା ଆଶାରେ ମଉଳି ଗଲା। କାର୍ଯ୍ୟ ସମ୍ପୂର୍ଣ୍ଣ ପରେ ଟେଷ୍ଟିଂ ପାଇଁ ୧୦ ଦିନ ଗ୍ରାମରେ ପାଣି ଛଡ଼ା ଯାଇଥିଲା। କିନ୍ତୁ ଏବେ ଅଚଳ ହୋଇ ପଡିଛି। ଅନ୍ୟପଟେ ମୁଡ୍ରାନଦୀ କୂଳରେ ନିର୍ମାଣ ହୋଇଥିବା ଇନଟେକ ପାଣିଟାଙ୍କି ନିମ୍ନମାନର କାର୍ଯ୍ୟ ଯୋଗୁ ଦୁର୍ବଳ ହେଉଥିବା ଲୋକେ ଅଭିଯୋଗ କରିଛନ୍ତି। ସୂଚନା ଅନୁସାରେ ସେମଲା ଗ୍ରାମରେ ପ୍ରାୟ ୧୫୦୦ରୁ ଊର୍ଦ୍ଧ୍ୱ ଜନସଂଖ୍ୟା ରହିଥିବା ବେଳେ ୮ଟି ପଡା ପାଇଁ ୭ଟି ନଳକୂପ ରହିଛି। ଅଧିକାଂଶ ନଳକୂପ ପାନୀୟ ଜଳ ବ୍ୟବହାର ଅନୁପଯୋଗୀ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ଏବେ ଗ୍ରୀଷ୍ମ ପ୍ରବାହରେ ସାରା ଗାଁଠୁ ସହର ଉତ୍ତାପରେ ଜଳି ଉଠୁଛି। ଲୋକେ ପାଣି ପାଇଁ ଡହଳ ବିକଳ ହୋଇ ପଡୁଛନ୍ତି। ପାନୀୟ ଜଳ ସମସ୍ୟା ଦୂର କରିବା ନିମନ୍ତେ ପାନୀୟ ଜଳ ପ୍ରକଳ୍ପ କାର୍ଯ୍ୟକ୍ଷମ କରିବା ପାଇଁ ଗ୍ରାମ୍ୟ ଜଳଯୋଗାଣ ଓ ପରିମଳ ବିଭାଗ କନିଷ୍ଠ ଯନ୍ତ୍ରୀଙ୍କୁ ଜଣାଇଲେ ମଧ୍ୟ କିଛି ସୁଫଳ ମିଳୁ ନ ଥିବା ଗ୍ରାମବାସୀ କହିଛନ୍ତି। ଫଳରେ ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି। ପ୍ରଶାସନ ତୁରନ୍ତ ପଦକ୍ଷେପ ନେଇ ଗ୍ରାମରେ ବିଶୁଦ୍ଧ ପାନୀୟ ଜଳ ଯୋଗାଇବାକୁ ସାଧାରଣରେ ଦାବି ହେଉଛି। ଏ ନେଇ ଧର୍ମଗଡ଼ ଗ୍ରାମ୍ୟ ଜଳ ଯୋଗାଣ ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ମଧ୍ୟ ସମ୍ଭବ ହୋଇ ନ ଥିଲା।
