ଭଞ୍ଜନଗର,୩/୧୦(ବାବୁଲା ପ୍ରଧାନ):ପବିତ୍ର ଦୂର୍ଗାପୂଜା ଅବସରରେ ଗଞ୍ଜାମ ଜିଲା ଭଞ୍ଜନଗର ପ୍ରଜାପିତା ବ୍ରହ୍ମାକୁମାରୀ ଈଶ୍ୱରୀୟ ବିଶ୍ୱବିଦ୍ୟାଳୟ ତରଫରୁ ଭଞ୍ଜନଗରସ୍ଥିତ ଶାନ୍ତିସ୍ରୋତ ଭବନଠାରେ ତିନି ଦିନ ଧରି ଚାଲିଥିବା ଆଧ୍ୟାତ୍ମିକ କାର୍ଯ୍ୟକ୍ରମ ଉଦଯାପିତ ହୋଇଯାଇଛି। ଏହି ଅବସରରେ ବିଭିନ୍ନ ଦିବସରେ ବକ୍ତାମାନେ ଯୋଗଦେଇ କ୍ରୋଧ,ଲୋଭ,ଅହଙ୍କାର, ହିଂସା ଭଳି ଖରାପ ଅଭ୍ୟାସ ପରିତ୍ୟାଗ ଦ୍ୱାରା ଜୀବନରେ ଶାନ୍ତି ମିଳିଥାଏ ବୋଲି କହିଥିଲେ। ତେଣୁ ଆଜି ଭଳି ଏହି ପବିତ୍ର ଦିନରେ ଉକ୍ତ କୁଅଭ୍ୟାସକୁ ପରିତ୍ୟାଗ କରିବାକୁ ବକ୍ତାମାନେ ଆହ୍ବାନ କରିଥିଲେ। ପ୍ରଥମ ଦିବସରେ ଭଞ୍ଜନଗର ଉପଖଣ୍ଡ ଆରକ୍ଷୀ ଅଧିକ୍ଷକ ଦୀପକ କୁମାର ମିଶ୍ର,ବିଜ୍ଞାପିତ ଅଞ୍ଚଳ ପରିଷଦ ନଗରପାଳ ଗୋପବନ୍ଧୁ ମହାପାତ୍ର ଅତିଥି ଭାବେ ଯୋଗଦେଇ ଚୈତନ୍ୟ ଦେବୀମଣ୍ଡପର ଉଦଘାଟନ କରିଥିଲେ। ଶାନ୍ତିସ୍ରୋତ ଭବନର ସଂଚାଳିକା ରାଜଯୋଗିନୀ ବ୍ରହ୍ମାକୁମାରୀ ସନ୍ତୋଷିନୀ ଭଉଣୀ କାର୍ଯ୍ୟକ୍ରମକୁ ପରିଚାଳନା କରିଥିଲେ।
ଦିତୀୟ ଦିବସରେ ଅତିରିକ୍ତ ଆରକ୍ଷୀ ଅଧିକ୍ଷକ ରଞ୍ଜନ କୁମାର ଦେ, କାରାଗାର ପରିଚାଳକ ମାନସ ରଞ୍ଜନ ସାମନ୍ତ, କେ.ଏସୟୁ.ବି. କଲେଜର ପ୍ରାକ୍ତନ ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ତ୍ରିପାଠୀ, ବ୍ରହ୍ମା କୁମାର ଅକ୍ଷୟ ଭାଇ, ବ୍ରହ୍ମାକୁମାରୀ ସନ୍ତୋଷିନୀ ଭଉଣୀ ଅତିଥି ଭାବେ ଯୋଗଦେଇ ବିଜୟା ଦଶମୀର ଆଧ୍ୟାତ୍ମିକ ରହସ୍ୟ -‘ଆସୁରୀ ଶକ୍ତି ଉପରେ ଦୈବୀ ଶକ୍ତିର ବିଜୟର ପ୍ରତୀକ’ବୋଲି ବର୍ଣ୍ଣନା କରିଥିଲେ।
ତୃତୀୟ ଦିବସରେ ଏସିଏଫ ବିବେକ ଦାସ, ବଣିକ ସଂଘ କର୍ମକର୍ତ୍ତା ଗୌରୀ ଶଙ୍କର ପାତ୍ର, ଥାନା ଏସଆଇ ଲକ୍ଷ୍ମୀଧର ମହାନ୍ତି, ବିଏସଏନଏଲ ଏସଡିଓ ଭେଙ୍କେଟେସ ସତିଶନ୍ ପ୍ରମୁଖ ଅତିଥି ଭାବେ ଯୋଗଦେଇ ନିଜର ବକ୍ତବ୍ୟ ରଖିଥିଲେ। ତିନିଦିନ ବ୍ୟାପୀ ଶିଶୁ କଳାକାରମାନେ ମା’ଙ୍କ ଉଦ୍ଦେଶ୍ୟରେ ନୃତ୍ୟ ପରିବେଷଣ କରିବା ସହ ନାଟକ ମାଧ୍ୟମରେ ଈଶ୍ୱରୀୟ ସନ୍ଦେଶ ପ୍ରଦାନ କରିଥିଲେ। ସାମାଜିକ କର୍ମୀ ଶୂଳପାଣି ଶତପଥୀ ଏବଂ ବ୍ରହ୍ମାକୁମାର ଭାଇ ଓ ଭଉଣୀ ମାନେ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ।
