ଭଞ୍ଜନଗର,୧୭।୬(ବାବୁଲା ପ୍ରଧାନ): ଗଞ୍ଜାମ ଜିଲା ଭଞ୍ଜନଗରର ପୂର୍ବତନ କଂଗ୍ରେସ ବିଧାୟକ ପ୍ରାର୍ଥୀ ତଥା ପିସିସି ସଭ୍ୟ ଦେବୀ ବିଷୋୟୀଙ୍କୁ ବୁଧବାର କଂଗ୍ରେସ ଦଳରୁ ନିଲମ୍ବିତ କରାଯାଇଛି। ଦଳୀୟ ଶୃଙ୍ଖଳା ଭଙ୍ଗ କରିବା ସହିତ ଦଳିୟ ନେତୃତ୍ୱ ବିରୋଧରେ ସାମାଜିକ ଗଣମାଧ୍ୟମରେ ବିଭିନ୍ନ ସମୟରେ ବିବୃତ୍ତି ଦେଇଥିବା ଯୋଗୁ ଦେବୀଙ୍କ ବିରୁଦ୍ଧରେ ଦଳ ଏହି କାର୍ଯ୍ୟାନୁଷ୍ଠାନ ନେଇଛି। ଅପରପକ୍ଷେ ଏନେଇ ଦଳୀୟ ହାଇକମାଣ୍ଡଙ୍କୁ ସବୁ ବିଷୟ ଜଣାଇବି ବୋଲି ଦେବୀ କହିଛନ୍ତି। ଘଟଣାରୁ ପ୍ରକାଶ ଯେ, ଗତ ରାଜ୍ୟ ସଭା ନିର୍ବାଚନ ସମୟରେ ଗଞ୍ଜାମ ଜିଲା ପଶ୍ଚିମ କଂଗ୍ରେସ ସଭାପତି ତଥା ସାନଖେମୁଣ୍ଡି ବିଧାୟକ ରମେଶ ଜେନା କ୍ରସ ଭୋଟିଂ କରିବା ଅଭିଯୋଗରେ ଦଳରୁ ନିଲମ୍ବିତ କରାଯାଇଥିଲା । ଏହାପରେ ଜିଲା ସଭାପତି ଦାୟିତ୍ୱ ପୂର୍ବତନ ଭଞ୍ଜନଗର ବ୍ଲକ ଅଧ୍ୟକ୍ଷ ତଥା ଭଞ୍ଜନଗର ନିର୍ବାଚନମଣ୍ଡଳୀରୁ ଦୁଇଥର କଂଗ୍ରେସରୁ ନିର୍ବାଚନ ଲଢି ବହୁ କମ୍ ଭୋଟ ବ୍ୟବଧାନରେ ପରାସ୍ତ ହୋଇଥିବା ବିଧାୟକ ପ୍ରାର୍ଥୀ ବି ଦଣ୍ଡପାଣି ପାତ୍ରଙ୍କୁ ଜିଲା ସଭାପତି ଦାୟିତ୍ୱ ଦିଆଯାଇଥିଲା। ଯାହାକୁ ନେଇ ଦେବୀ ଅସନ୍ତୁଷ୍ଟ ଥିଲେ। ଏଥିସହ ଦେବୀ ଏନେଇ ସାମାଜିକ ଗଣମାଧ୍ୟମରେ ପିସିସି ସଭାପତି ଭକ୍ତ ଚରଣ ଦାସ ଏବଂ ଦଣ୍ଡପାଣିଙ୍କ ବିରୁଦ୍ଧର ଅସନ୍ତୋଷ ବ୍ୟକ୍ତ କରିଥିଲେ। ଦଣ୍ଡପାଣି କଂଗ୍ରେସ ଛାଡିବା ପରେ ଭାଜପାକୁ ଚାଲି ଯାଇଥିଲେ। ଏଥିସହ ବିଜେଡି ସହ ଦଣ୍ଡପାଣି ଯୋଗାଯୋଗରେ ଥିଲେ। ଏହିଭଳି ଜଣେ ନେତାଙ୍କୁ ଜିଲା ସଭାପତି ଦାୟିତ୍ୱ ଦିଆଯିବାକୁ ନେଇ ଦେବୀ ଅସନ୍ତୁଷ୍ଟ ପ୍ରକାଶ କରିଥିଲେ। ଯାହାକୁ ନେଇ ପିସିସି ସଭାପତି ଦେବୀଙ୍କ ବିରୁଦ୍ଧରେ ଆଜି କଡ଼ା କାର୍ଯ୍ୟାନୁଷ୍ଠାନ ନେଇଛନ୍ତି। ଦଣ୍ଡପାଣିଙ୍କ ସମର୍ଥକ ଏହାକୁ ସ୍ବାଗତ କରୁଥିବା ବେଳେ ଦେବୀ ସମର୍ଥକ ଅସନ୍ତୋଷ ବ୍ୟକ୍ତ କରିଛନ୍ତି।
ଦେବୀ ବିଷୋୟୀ ବହୁ ବର୍ଷ ଧରି କଂଗ୍ରେସ ସହ ଜଡ଼ିତ ଥିଲେ। ଦେବୀ ପୂର୍ବତନ କଂଗ୍ରେସ ନେତା ସ୍ବର୍ଗତ ଲୁଲୁ ମହାପାତ୍ରଙ୍କ ଘନିଷ୍ଠ ବନ୍ଧୁ ଥିଲେ । ଦେବୀ କଲେଜ ଗୁଡିକରେ ହେଉଥିବା ଛାତ୍ର ସଂସଦ ନିର୍ବାଚନ ଗୁଡ଼ିକରେ ପ୍ରମୁଖ ଭୂମିକା ନିଭାଇଥିଲେ। ବର୍ତ୍ତମାନ ଦଳ ତାଙ୍କୁ ନିଲମ୍ବିତ କରିଥିବା ବେଳେ ଆଗାମୀ ଦିନରେ ଦଳ ଉପରେ ତାହାର ପ୍ରଭାବ କିଭଳି ପଡୁଛି ଦେଖିବା ବାକି ରହିଲା।
