ଭଦ୍ରକ ଅଫିସ, ୮ା୧୨: ୫୦୦ ଟଙ୍କା ଦିଅ ଆଉ ଜାତିଗତ ପ୍ରମାଣପତ୍ର ନିଅ। ଗୋଟେ ସରକାରୀ ଅଫିସରର କ’ଣ ମୁଣ୍ଡ ୨୦୦ ଟଙ୍କା କି । ଏମିତି ଏକ ଭିଡିଓ ଭଦ୍ରକ ଜିଲାରେ ଏବେ ଭାଇରାଲ ହେବାରେ ଲାଗିଛି। ଜାତିଗତ ପ୍ରମାଣପତ୍ର ଦେବାକୁ ଦଳାଙ୍ଗ ଆରଆଇ ଜଣେ ବ୍ୟକ୍ତିଙ୍କ ସହ ଏଭଳି ମୁଲଚାଲ କରୁଥିବାର ଭିଡିଓ ଭାଇରାଲ ପରେ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି। ଧାମନଗର ତହସିଲ ଅଧୀନ ଦଳାଙ୍ଗ ରାଜସ୍ବ ମଣ୍ଡଳ ଅଞ୍ଚଳର ଜଣେ ବ୍ୟକ୍ତି ନିଜ ଝିଅଙ୍କର ଜାତିଗତ ପ୍ରମାଣପତ୍ର ପାଇଁ ଆବେଦନ କରିଥିଲେ। ପ୍ରମାଣପତ୍ର ପାଇଁ ବାରମ୍ବାର ତହସିଲ ଅଫିସ ଓ ଆର୍ଆଇ ଅଫିସ ଦୌଡ଼ିବାକୁ ପଡ଼ିଥିଲା। ଆର୍ଆଇ କାଗଜପତ୍ର ତହସିଲ ଅଫିସକୁ ପଠାଇ ନ ଥିବା ତହସିଲ ଅଫିସରେ କହି ଫେରାଉଥିଲେ। ଆରଆଇ ଅଫିସରେ ପହଞ୍ଚତ୍ବା ପରେ ଆର୍ଆଇ ଏଥିପାଇଁ ୫୦୦ ଟଙ୍କା ମାଗିଥିଲେ। ସମ୍ପୃକ୍ତ ବ୍ୟକ୍ତି ମାତ୍ର ୨୦୦ ଟଙ୍କା ଦେବାକୁ କହିବାରୁ ଆରଆଇ ଏଥିରେ ରାଜି ହୋଇ ନ ଥିଲେ। ହେଲେ ସମ୍ପୃକ୍ତ ବ୍ୟକ୍ତି ୫୦୦ ଟଙ୍କା ଦେବାରୁ ସେ ତାଙ୍କ ଜାତିଗତ ପ୍ରମାଣପତ୍ର ତହସିଲଦାରଙ୍କ ନିକଟକୁ ପଠାଇଥିଲେ। ଏ ନେଇ ତହସିଲଦାର କ୍ଷୀରୋଦ ଚନ୍ଦ୍ର ପଣ୍ଡା କହିଛନ୍ତି ଭିଡିଓ ଦେଖିବାକୁ ମିଳିଛି, ଲିଖିତ ଅଭିଯୋଗ ହୋଇନାହିଁ। ଲିଖିତ ଅଭିଯୋଗ ମିଳିଲେ ଘଟଣାର ତଦନ୍ତ କରାଯିବ। ସମ୍ପୃକ୍ତ ଆରଆଇଙ୍କୁ ଯୋଗାଯୋଗ କରାଯାଇଥିଲେ ବି ସମ୍ଭବ ହୋଇନାହିଁ।
