ପାଟଣା,୧୫।୨(ସ୍ବ.ପ୍ର.):କେନ୍ଦୁଝର ଜିଲା ପାଟଣା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରରେ ବିଶେଷଜ୍ଞ ଡାକ୍ତର ପଦବୀ ପୂରଣ ନେଇ ୧୨ ଘଣ୍ଟିଆ ପାଟଣା ବନ୍ଦ ଡାକରା ଦିଆଯାଇଛି। ଆନ୍ଦୋଳନକାରୀମାନେ ସୋମବାର ସକାଳ ୬ରୁ ସା ୬ଟା ପର୍ଯ୍ୟନ୍ତ ୧୨ ଘଣ୍ଟିଆ ପାଟଣା ବନ୍ଦ ପାଳନ କରୁଛନ୍ତି। ବିଶେଷଜ୍ଞ ଡାକ୍ତର ନିଯୁକ୍ତି ଏକ ସ୍ପର୍ଶକାତର ପ୍ରସଙ୍ଗ ହୋଇଥିବାରୁ ବିଭିନ୍ନ ମହଲରୁ ବନ୍ଦକୁ ଲୋକଙ୍କର ସମର୍ଥନ ମିଳିଥିବା ଦେଖିବାକୁ ମିଳିଛି। ସୋମବାରଠାରୁ ପାଟଣା ମୁଖ୍ୟାଳୟସ୍ଥିତ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ସମ୍ମୁଖରେ ଆନ୍ଦୋଳନକାରୀମାନେ ଅର୍ନିଦିଷ୍ଟ କାଳ ପର୍ଯ୍ୟନ୍ତ ଧାରଣାରେ ବସିଛନ୍ତି। ପାଟଣା ଢେଙ୍କିକୋଟ ରାସ୍ତା ଦେଇ ଯାଇଥିବା ୨୨୦ ନମ୍ବର ଜାତୀୟ ରାଜପଥର ବୈତରଣୀ ନଦୀର ବ୍ରିଜ, ମଙ୍ଗଳପୁରଛକ ଓ ପାଟଣା କେନ୍ଦେଇ ପଶି ରାସ୍ତାର ପୁଟୁଳିଆ ପେଟ୍ରୋଲ ପମ୍ପ ନିକଟରେ ଆନ୍ଦୋଳନ କାରୀମାନେ ବ୍ୟାନର ମାରି ରାସ୍ତା ଅବରୋଧ କରିଛନ୍ତି। ଫଳରେ ଗମନା ଗମନ ବାଧା ପ୍ରାପ୍ତ ହୋଇଛି। ସମସ୍ତ ସରକାରୀ ବେସରକାରୀ ଅନୁଷ୍ଠାନ, ଯାନବାହନ ଚଳପ୍ରଚଳ, ଦୋକାନ ବଜାର ବନ୍ଦ ରହିଛି। ଧାରଣାରେ ପାଟଣାର ପୂର୍ବତନ ବ୍ଲକ ଅଧକ୍ଷ ଇଂ ବିଦ୍ୟାଧର ଦାଶ , ସାମାଜିକ କର୍ମୀ ଅଜୟ କୁମାର ଦାଶ, ଯୁବ ସାମାଜିକ କର୍ମୀ ବିଜୟ ରତ୍ନ ପତି, ମାର୍କେଟ କମିଟି ସଭାପତି ବୁଲୁ ଭଞ୍ଜ, ଯୁଗଳ କିଶୋର ଦାଶ, ପ୍ରଶାନ୍ତ କୁମାର ଭଞ୍ଜ, ଲକ୍ଷ୍ମଣ କୁମାର ଦାଶ, ଅରୁଣ କୁମାର ମିଶ୍ର, ସନାତନ ଦାଶ, ହରିହର ଓଝା, ସୁଦର୍ଶନ ଲୋହାର, ରଘୁନାଥ ଦାଶ, ପୂର୍ଣ୍ଣ ଚନ୍ଦ୍ର ମହାନ୍ତ, ଲକ୍ଷ୍ମୀଣ କୁମାର ପତି, ଡବ୍ଲୁ ଆଁଶାରୀ ଓ ଶିବପ୍ରଶାଦ ଶତପଥୀ ପ୍ରମୁଖ ଶତାଧିକ ବ୍ୟକ୍ତି ସାମିଲ ହୋଇଛନ୍ତି।
