ବେଗୁନିଆପଡା,୧୪।୨(ଡି.ଏନ.ଏ.): ଗଞ୍ଜାମ ଜିଲା କୋଦଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ଏକ ସପ୍ତାହରୁ ଅଧିକ ସମୟ ହେବ ବିନା ଡାକ୍ତରରେ ଚାଲିଛି। ଆଇପିଏଚ ଷ୍ଟାଣ୍ଡାର୍ଡ ୧ର ମାନ୍ୟତା ପାଇଥିବା ଏହି ଡାକ୍ତରଖାନାଟି ଉପରକୁ ଚକ୍ାଚକ ଭିତର ଫମ୍ପା। ଅର୍ଥାତ୍ ଜଣେ ବି ଡାକ୍ତର ଏଠି ନାହାନ୍ତି। ୪ ଜଣ ସ୍ପେଶାଲିଷ୍ଟ ଡାକ୍ତରଙ୍କୁ ମିଶାଇ ୧୦ ରୁ ଉଦ୍ଧର୍ବ ଡାକ୍ତର ରହିବା କଥା। ଜିଲା ସ୍ବାସ୍ଥ୍ୟ ସମିତି ପକ୍ଷରୁ ଜଣେ ଡାକ୍ତରଙ୍କୁ ଏଠାକୁ ୪ ଦିନ ପାଇଁ ଡେପୁଟେଶନରେ ଅଣାଯାଇଥିବା ବେଳେ ସେ ୪ ଦିନ ପରେ ଚାଲି ଯାଇଛନ୍ତ। ଫଳରେ ରୋଗୀ ସେବା ଠପ ହୋଇଯାଇଛି । ଗରିବ ଅସହାୟ ରୋଗୀମାନେ ଅନେକ ଅସୁବିଧାର ସମ୍ମୁଖୀନ ହେଉଛନ୍ତି। ରାଜନେତା ତଥା ଜନପ୍ରତିନିଧି ମାନେ କିନ୍ତୁ କୌଣସି ଆଖିଦୃଶିଆ ପଦକ୍ଷେପ ନେଉ ନାହାନ୍ତି। ବିଧାୟିକା ଲତିକା ପ୍ରଧାନ ଉକ୍ତ ମେଡିକାଲ ପାଇଁ ଅନେକ କିଛି କରୁଛି ବୋଲି କହୁଥିବା ବେଳେ ବର୍ତ୍ତମାନ ମେଡିକାଲରେ ଡାକ୍ତର ନ ଥିବା କଥା ତାଙ୍କୁ ଜଣା ଅଛି ନା ନାହିଁ ବୋଲି ସ୍ଥାନୀୟ ଲୋକେ ପ୍ରଶ୍ନ କରିଛନ୍ତ। ୮ ପଞ୍ଚାୟତ ସମେତ କୋଦଳା ଏନ୍ଏସିର ଜନତା ଏହି ଡାକ୍ତରଖାନା ଉପରେ ନିର୍ଭର କରିଥାନ୍ତି। ଅନ୍ୟପଟେ, ଜିଲା ମୁଖ୍ୟ ସ୍ବାସ୍ଥ୍ୟ ଅଧିକାରୀ ଦିନେ ୨ ଦିନ ମଧ୍ୟରେ ଡାକ୍ତର ଦେବାକୁ କହିଥିଲେ ମଧ୍ୟ ଏଯାଏ ଡାକ୍ତରଙ୍କ ନିଯୁକ୍ତି ହୋଇନି। ଯାହାକୁ ନେଇ ସ୍ଥାନୀୟ ଅଞ୍ଚଳରେ ଅସନ୍ତୋଷ ବୃଦ୍ଧି ପାଉଥିବା ବେଳେ କେବେ ଡାକ୍ତର ନିଯୁକ୍ତି ହେଉଛି ତାହା ଦେଖିବାକୁ ବାକି ରହିଲା।
