ନୂଆଦିଲ୍ଲୀ,୧୩।୩ : ଡାକ୍ତରୀ ପରିସ୍ଥିତି କାରଣରୁ ନୂଆଦିଲ୍ଲୀରୁ ଦୋହା ଅଭିମୁଖେ ଏକ ଇଣ୍ଡିଗୋ ବିମାନକୁ ପାକିସ୍ତାନର କରାଚିରେ ଜରୁରୀକାଳୀନ ଅବତରଣ କରାଯାଇଛି। ଏକ ବିମାନ ଅଧିକାରୀ ନ୍ୟୁଜ ଏଜେନ୍ସିକୁ ଏ ବିଷୟରେ ସୂଚନା ଦେଇଛନ୍ତି। ଜାଣିବାକୁ ମିଳିଛି ଯେ ବିମାନରେ ଥିବା ଜଣେ ଯାତ୍ରୀଙ୍କ ମୃତ୍ୟୁ ଘଟିଛି।
ନ୍ୟୁଜ ଏଜେନ୍ସି ଅନୁଯାୟୀ, ଇଣ୍ଡିଗୋ ବିମାନ ୬-ଇ-୧୭୩୬ ଦିଲ୍ଲୀରୁ ଦୋହାକୁ ଉଡ଼ାଣ କରିଥିଲା। ତେବେ ମଝି ଆକାଶରେ ଜଣେ ଯାତ୍ରୀଙ୍କ ମୃତ୍ୟୁ ଘଟିବାରୁ ଡାକ୍ତରୀ ଜରୁରୀକାଳୀନ ପରିସ୍ଥିତି କାରଣରୁ କରାଚି ଅଭିମୁଖେ ଏହା ଯାତ୍ରା କରିଥିଲା। ବିମାନ ସେବା ପକ୍ଷରୁ ସୂଚନା ପ୍ରଦାନ କରାଯାଇଛି ଯେ ଦୁର୍ଭାଗ୍ୟବଶତଃ ବିମାନବନ୍ଦର ବିମାନବନ୍ଦର ମେଡିକାଲ ଟିମ ପହଞ୍ଚିବା ପରେ ଯାତ୍ରୀଙ୍କୁ ମୃତ ଘୋଷଣା କରାଯାଇଥିଲା।
ଡାକ୍ତରୀ ଜରୁରୀକାଳୀନ ପରିସ୍ଥିତି ଯୋଗୁଁ ବିମାନକୁ ଡାଇଭର୍ଟ କରାଯାଇଥିଲା। ବିମାନର ଅନ୍ୟ ଯାତ୍ରୀଙ୍କୁ ସ୍ଥାନାନ୍ତର ପାଇଁ ବ୍ୟବସ୍ଥା କରିବାକୁ କାର୍ଯ୍ୟ ଜାରି ବୋଲି ଏୟାରଲାଇନ୍ସ କହିଛି।
