ଭୁବନେଶ୍ୱର,୨ା୧୨(ବ୍ୟୁରୋ): ପରୀ ମୃତ୍ୟୁ ଘଟଣାରେ ଏସ୍ଆଇଟି ତଦନ୍ତ ନିର୍ଦ୍ଦେଶ ପରେ ବି ଏହି ମାମଲା ଥମିବାର ନାଁ ନେଉନି। ଭାଜପାର ଏକ ଉଚ୍ଚସ୍ତରୀୟ ପ୍ରତିନିଧି ଦଳ ସୋମବାର ନୟାଗଡ଼ ଜିଲା ଯଦୁପୁର ଗାଁକୁ ଯାଇ ପରୀ ମା’ ଓ ବାପାଙ୍କୁ ଭେଟିବା ପରେ ମଙ୍ଗଳବାର ରାଜ୍ୟପାଳଙ୍କ ଆଗରେ ଫେରାଦ ହୋଇଛନ୍ତି । ପୂର୍ବଭଳି ମନ୍ତ୍ରୀ ଅରୁଣ ସାହୁଙ୍କ ଇସ୍ତଫା ଦାବି ଜିଦ୍ରେ ଅଟଳ ରହିବା ସହ ଏସ୍ଆଇଟି ନୁହେଁ ଏହି ମାମଲାର ସିବିଆଇ ତଦନ୍ତ କରିବାକୁ ଭାଜପା କହିଛି। ବିରୋଧୀ ଦଳ ନେତା ପ୍ରଦୀପ୍ତ ନାୟକଙ୍କ ସହ ଭାଜପା ବିଧାୟକମାନେ ରାଜଭବନରେ ରାଜ୍ୟପାଳ ପ୍ରଫେସର ଗଣେଶୀ ଲାଲଙ୍କୁ ଭେଟି ଏକ ଦାବିପତ୍ର ପ୍ରଦାନ କରିଛନ୍ତି। ପରୀର ମା’ ଓ ବାପା ନ୍ୟାୟ ନ ପାଇ ବିଧାନସଭା ଆଗରେ ଆତ୍ମାହୁତି ଉଦ୍ୟମ କରିଥିଲେ। ଏହାପରେ ଭାଜପା ବିଧାନସଭାରେ ଏ ପ୍ରସଙ୍ଗ ଉଠାଇ ମନ୍ତ୍ରୀଙ୍କ ବହିଷ୍କାର ସହ ସିବିଆଇ ତଦନ୍ତ ଦାବି କରିଥିଲା। ହେଲେ ସରକାର ତାହା ନ କରି ଭୟରେ ଆଗୁଆ ବିଧାନସଭା ବନ୍ଦ କରିଦେଲେ ବୋଲି ପ୍ରଦୀପ୍ତ ଗଣମାଧ୍ୟମ ଆଗରେ କହିଛନ୍ତି। ବିଧାନସଭାର ୩ଟି ଅଧିବେଶନରେ ସର୍ବନିମ୍ନ ୬୦ଟି ବୈଠକ ଦିବସ ଅନୁଷ୍ଠିତ ହେବା ନିହାତି ଆବଶ୍ୟକ। ହେଲେ ସରକାର ସମ୍ବିଧାନକୁ ନ ମାନି ମାତ୍ର ୩୦ଦିନରେ ବିଧାନସଭାକୁ ବନ୍ଦ କରିଦେଲେ। ଏ ପ୍ରସଙ୍ଗରେ ମଧ୍ୟ ରାଜ୍ୟପାଳଙ୍କ ସହ ଆଲୋଚନା କରିଥିବା ପ୍ରଦୀପ୍ତ କହିଛନ୍ତି।
ଏପଟେ ନୟାଗଡ଼ ପରୀ ହତ୍ୟା ଘଟଣାରେ ମନ୍ତ୍ରୀ ଅରୁଣ ସାହୁଙ୍କ ଇସ୍ତଫା ଦାବି କରି ଅଖିଳ ଭାରତୀୟ ବିଦ୍ୟାର୍ଥୀ ପରିଷଦ(ଏବିଭିପି) କର୍ମୀ ରାଜରାସ୍ତାକୁ ଓହ୍ଲାଇଛନ୍ତି। ଏବିଭିପି ସଦସ୍ୟମାନେ ମଙ୍ଗଳବାର ଭୁବନନେଶ୍ୱରରେ ଥିବା ଅରୁଣ ସାହୁଙ୍କ ସରକାରୀ ବାସଭବନ ଘେରିବାକୁ ଉଦ୍ୟମ କରିିବା ସହ ମନ୍ତ୍ରୀଙ୍କ ବିରୋଧରେ ନାରାବାଜି ଦେଇଥିଲେ। ତେବେ ଏବିଭିପି କର୍ମୀମାନେ ଅରୁଣ ସାହୁଙ୍କ ବାସଭବନ ଅଭିମୁଖେ ରାଲିରେ ଆସୁଥିବା ବେଳେ ୫୦ରୁ ଅଧିକ ଏବିଭିପି କର୍ମୀଙ୍କୁ ପୋଲିସ ଗିରଫ କରି ଉଠାଇ ନେଇଥିଲା। ସେହିଭଳି ପ୍ରଦେଶ କଂଗ୍ରେସ ସଭାପତି ନିରଞ୍ଜନ ପଟ୍ଟନାୟକ ମଙ୍ଗଳବାର କଂଗ୍ରେସ ଭବନରେ ଏକ ଖବରଦାତା ସମ୍ମିଳନୀ କରି ଉଭୟ ବିଜେଡି ଓ ଭାଜପା ଉପରେ ବର୍ଷିଛନ୍ତି। ରାଜ୍ୟରେ ବିପର୍ଯ୍ୟସ୍ତ ଆଇନଶୃଙ୍ଖଳା ପରିସ୍ଥିତି ପାଇଁ ବିଜେଡିକୁ ଟାର୍ଗେଟ କରିଥିବା ବେଳେ ପରୀକୁ ନ୍ୟାୟ ଦେବାକୁ ଭାଜପା ଏତେଦିନ କେଉଁଠାରେ ଥିଲା ବୋଲି ପ୍ରଶ୍ନ କରିଛନ୍ତି। ଜୁଲାଇ ୨୧ରୁ ଆଜିପର୍ଯ୍ୟନ୍ତ ନୟାଗଡ଼ ଜିଲାରେ କଂଗ୍ରେସ ପରୀକୁ ଏବଂ ତା’ର ପରିବାରକୁ ନ୍ୟାୟଦେବାକୁ ଆନ୍ଦୋଳନ କରି ଚାଲିଛି। କଂଗ୍ରେସ ଦଳ ଆରମ୍ଭରୁ ଚୁପ୍ ରହିନି। ହେଲେ ଭାଜପା ଆଜକୁ ୪ମାସ ହେଲା କେଉଁଠି ଥିଲା ନିରଞ୍ଜନ ପ୍ରଶ୍ନ କରିଛନ୍ତି।
