ହାଙ୍ଗଝୋ,୨୩ା୧୦: ଚାଇନାର ହାଙ୍ଗଝୋରେ ରବିବାର ଆରମ୍ଭ ହୋଇଛି ପାରା ଏସିଆନ୍ ଗେମ୍ସ। ରଙ୍ଗାରଙ୍ଗ କାର୍ଯ୍ୟକ୍ରମ ସହିତ ଏହି କାର୍ଯ୍ୟକ୍ରମ ଆରମ୍ଭ ହୋଇଥିଲା। ଭାରତ ପକ୍ଷରୁ ପାରା ସଟଲର ପାରୁଲ ପରମାର ଓ ପାରା କ୍ଲବ୍ ଥ୍ରୋୟର ଅମିତ ସରୋହା ଧ୍ୱଜା ବାହକ ରହିଥିଲେ। ୧୫ ଦିନ ପୂର୍ବରୁ ସମାନ ଭେନ୍ୟୁରେ ଭାରତୀୟ ଆଥ୍ଲେଟମାନେ ଏସିଆନ୍ ଗେମ୍ସରେ ପଦକ ସଂଖ୍ୟାରେ ଶତକ ହାସଲ କରିଥିଲେ। ବିଗତ ପାରା ଏସିଆନ୍ ଗେମ୍ସରେ ଭାରତ ୭୨ ପଦକ ହାସଲ କରିଥିବା ବେଳେ ଚଳିତବର୍ଷ ଏହି ସଂଖ୍ୟାକୁ ଅତିକ୍ରମ କରିବାକୁ ପ୍ରୟାସ କରିବ। ଚଳିତ ପାରା ଏସିଆନ୍ ଗେମ୍ସ ପାଇଁ ଭାରତ ୩୧୩ ଜଣିଆ ଦଳ ପ୍ରେରଣ କରିଛି। ଭାରତୀୟ ଇତିହାସରେ ଏହା ସବୁଠାରୁ ବଡ ଦଳ ଓ ଚଳିତ ସଂସ୍କରଣରେ ରେକର୍ଡ ପଦକ ହାସଲ କରିବା ଲକ୍ଷ୍ୟରେ ରହିଛି ଭାରତ। ୨୨ଟି ଇଭେଣ୍ଟରୁ ୧୭ଟିରେ ଭାରତୀୟ ଆଥ୍ଲେଟ ଅଂଶଗ୍ରହଣ କରିବେ। ପ୍ରଥମ ଥର ପାଇଁ ରୋଇଂ, କାନୋଇଂ, ଲନ୍ ବଲ୍, ଟାଏକୋଣ୍ଡୋ ଓ ଦୃଷ୍ଟିବାଧିତ ଫୁଟବଲରେ ଭାରତ ଅଂଶଗ୍ରହଣ କରିବ। ୪୩ ଦେଶର ସମୁଦାୟ ୪୦୦୦ ପ୍ରତିଯୋଗୀ ଏହି ମେଗା ଇଭେଣ୍ଟରେ ଅଂଶଗ୍ରହଣ କରିବେ। ୨୦୧୪ ଓ ୨୦୧୮ ସଂସ୍କରଣରେ ଭାରତ ଯଥାକ୍ରମେ ୧୫ ଓ ୯ମ ସ୍ଥାନରେ ଅଭିଯାନ ଶେଷ କରିଥିଲା। ତେବେ ଚଳିତବର୍ଷ ଦଳ ପଦକ ସଂଖ୍ୟାରେ ଶତକ ହାସଲ କରିବା ନେଇ ପାରାଲିମ୍ପିକ୍ସ କମିଟି ଅଫ୍ ଇଣ୍ଡିଆ ଦୃଢୋକ୍ତି ପ୍ରକାଶ କରିଛି।
