ନୂଆଦିଲ୍ଲୀ,୧୪ା୧୨: ଭାରତୀୟ ପାର୍ଲାମେଣ୍ଟକୁ ଗଣତନ୍ତ୍ରର ମନ୍ଦିର ଆଖ୍ୟା ଦିଆଯାଇଛି। ସାରା ଦେଶର ଲୋକଙ୍କ ଦ୍ୱାରା ନିର୍ବାଚିତ ପ୍ରତିନିଧିମାନେ ଏଠାରେ ନିଜ ନିଜ ଅଞ୍ଚଳର ସମସ୍ୟା ଓ ଜାତୀୟ ପ୍ରସଙ୍ଗ ଉଠାଇଥାଆନ୍ତି। ୨୦୦୧ରେ ପୁରୁଣା ପାର୍ଲାମେଣ୍ଟ ଉପରେ ପାକିସ୍ତାନୀ ଆତଙ୍କବାଦୀମାନେ ଆକ୍ରମଣ କରିଥିଲେ। ସେହି ପାର୍ଲାମେଣ୍ଟ ହାଉସ୍ ଏବେ ଇତିହାସ ପାଲଟିଯାଇଥିବାବେଳେ ୨୦୨୩ ମେ’ ୨୮ରେ ଉଦ୍ଘାଟିତ ନୂଆ ସଂସଦ ଭବନରେ ବୁଧବାର ଅନୁପ୍ରବେଶକାରୀଙ୍କ ଉପଦ୍ରବ ଦେଖିବାକୁ ମିଳିଛି। ପୂର୍ବ ଆକ୍ରମଣର ୨୨ ବର୍ଷ ପରେ ବି ଲୋକେ କାଣ୍ଡ ଭିଆଇବାକୁ ଦୁଃସାହସ କରୁଛନ୍ତି। ୧୦ ବର୍ଷରୁ ଊର୍ଦ୍ଧ୍ୱ ସମୟ ଧରି ସଂସଦର ସୁରକ୍ଷା ପାଇଁ କର୍ମଚାରୀଙ୍କୁ ନିଯୁକ୍ତି ଦିଆ ନ ଯିବା ଏହାର ଅନ୍ୟତମ କାରଣ ହୋଇପାରେ।
ପାର୍ଲାମେଣ୍ଟ ସୁରକ୍ଷାରେ ବୁଧବାର ଦେଖାଦେଇଥିବା ବଡ଼ ଧରଣର ତ୍ରୁଟିକୁ ନେଇ ବିରୋଧୀ ଦଳଗୁଡ଼ିକ ଉଦ୍ବେଗ ପ୍ରକାଶ କରିଛନ୍ତି। ଇଣ୍ଡିଆନ୍ ନ୍ୟାଶନାଲ ଡେଭେଲପ୍ମେଣ୍ଟାଲ ଇନ୍କ୍ଲୁସିଭ୍ ଆଲାଏନ୍ସ (ଇଣ୍ଡିଆ) ବ୍ଲକ୍ ପକ୍ଷରୁ ଏନେଇ ଗୁରୁବାର ସକାଳେ ଏକ ବୈଠକ କରାଯିବ। ଏହି ପ୍ରସଙ୍ଗରେ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କୁ ଭେଟି ଭବିଷ୍ୟତ କାର୍ଯ୍ୟପନ୍ଥା ନିର୍ଦ୍ଧାରଣ କରାଯିବ ବୋଲି ଜଣାପଡ଼ିଛି। ଇତିମଧ୍ୟରେ ବିରୋଧୀ ନେତାମାନେ ସ୍ବରାଷ୍ଟ୍ର ମନ୍ତ୍ରୀ ଅମିତ ଶାହାଙ୍କ ବିବୃତି ଦାବି କରିଛନ୍ତି।
ସଭା ବାଚସ୍ପତି ଓମ୍ ବିର୍ଲାଙ୍କ ଦ୍ୱାରା ଆହୂତ ସର୍ବଦଳୀୟ ବୈଠକରେ ବିରୋଧୀ ସଦସ୍ୟମାନେ ପାର୍ଲାମେଣ୍ଟର ସୁରକ୍ଷାକୁ ନେଇ ଗଭୀର ଚିନ୍ତାବ୍ୟକ୍ତ କରିଛନ୍ତି। ୨ ଅଭିଯୁକ୍ତ ଡି. ମନୋରଞ୍ଜନ ଓ ସାଗର ଶର୍ମାଙ୍କୁ ଲୋକ ସଭା ଭିଜିଟର୍ସ ଗ୍ୟାଲେରିରେ ବସିବା ଲାଗି ୪୫ ମିନିଟ୍ ପାଇଁ ଅନୁମତି ମିଳିଥିଲା। କିନ୍ତୁ ଦୁହେଁ ସେଠାରେ ପ୍ରାୟ ୨ ଘଣ୍ଟା ଧରି ରହିଥିଲେ, ଯାହାକି ନିୟମର ଉଲ୍ଲଂଘନ। ସଂସଦର ସୁରକ୍ଷା ଦାୟିତ୍ୱରେ ଥିବା କର୍ମଚାରୀମାନେ ନିର୍ଦ୍ଧାରିତ ସମୟ ଶେଷ ହେବା ପୂର୍ବରୁ ଭିଜିଟର୍ସ ଗ୍ୟାଲେରିରୁ ଦର୍ଶକମାନଙ୍କୁ ସ୍ଥାନ ଛାଡ଼ି ଚାଲିଯିବା ପାଇଁ ନିର୍ଦ୍ଦେଶ ଦେଇଥାନ୍ତି। କିନ୍ତୁ ବୁଧବାର ସିକ୍ୟୁରିଟି ଷ୍ଟାଫ୍ଙ୍କ ଉପସ୍ଥିତି ନଗଣ୍ୟ ଥିଲା। ସ୍ପେଶାଲ ଡାଇରେକ୍ଟର (ସିକ୍ୟୁରିଟି)ଙ୍କଠୁ ନେଇ ସିକ୍ୟୁରିଟି ଆସିଷ୍ଟାଣ୍ଟ ଗ୍ରେଡ୍-୨ ପର୍ଯ୍ୟନ୍ତ ପ୍ରାୟ ୩୦୧ ଜଣ କର୍ମଚାରୀ ସୁରକ୍ଷା ଦାୟିତ୍ୱରେ ରହିବା ପାଇଁ ବ୍ୟବସ୍ଥା ରହିଛି। କିନ୍ତୁ ୧୭୬ ଜଣଙ୍କୁ ନିଯୁକ୍ତି ଦିଆଯାଇଛି। ଅବଶିଷ୍ଟ ୧୨୫ ପଦବୀ ଖାଲି ପଡ଼ିଛି। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଉଛି ଖାଲି ପଡ଼ିଥିବା ପଦବୀ ମଧ୍ୟରୁ ସର୍ବାଧିକ ହେଉଛି ଏଣ୍ଟ୍ରି-ଲେଭେଲ ପୋଷ୍ଟ୍। ମଞ୍ଜୁର ହୋଇଥିବା ୭୨ ସିକ୍ୟୁରିଟି ଆସିଷ୍ଟାଣ୍ଟ ଗ୍ରେଡ୍-୨ କର୍ମଚାରୀଙ୍କ ସ୍ଥାନରେ କେବଳ ୯ ଜଣଙ୍କୁ ନିଯୁକ୍ତ କରାଯାଇଛି। ସେହିପରି ସିକ୍ୟୁରିଟି ଆସିଷ୍ଟାଣ୍ଟ ଗ୍ରେଡ୍-୧ ପଦରେ ୬୯ ଜଣଙ୍କୁ ନିଯୁକ୍ତି ମିଳିବା ସ୍ଥାନରେ ରହିଛନ୍ତି ମାତ୍ର ୨୪ ଜଣ। ୧୦ ବର୍ଷରୁ ଊର୍ଦ୍ଧ୍ୱ ସମୟ ଧରି କାହାକୁ ନିଯୁକ୍ତି ଦିଆଯାଇ ନ ଥିବା ସୂତ୍ରରୁ ଜଣାପଡ଼ିଛି। ୨୦୦୧ ପାର୍ଲାମେଣ୍ଟ ଆକ୍ରମଣର ୨୨ ବର୍ଷ ପୂର୍ତ୍ତି ଅବସରରେ ଘଟିଥିବା ଏହି କାଣ୍ଡ ପରିପ୍ରେକ୍ଷୀରେ ସୁରକ୍ଷା ବ୍ୟବସ୍ଥାର ସମୀକ୍ଷା ପରେ କଡ଼ା ବନ୍ଦୋବସ୍ତ କରାଯିବ ବୋଲି ସର୍ବଦଳୀୟ ବୈଠକରେ ବାଚସ୍ପତି ସୂଚନା ଦେଇଛନ୍ତି। ଏହି ଘଟଣା ପରେ ପାର୍ଲାମେଣ୍ଟ ହାଉସ୍ ପରିସରରେ ଭିଜିଟର୍ସଙ୍କ ପ୍ରବେଶକୁ ବନ୍ଦ କରିଦିଆଯାଇଛି।
ନେତା ସୁଦୀପ ବନ୍ଦ୍ୟୋପାଧ୍ୟାୟ କହିଛନ୍ତି, ବିରୋଧୀ ଦଳଗୁଡ଼ିକ ଗୁରୁବାର ସକାଳେ କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖାର୍ଗେଙ୍କ ବାସଭବନରେ ବୈଠକ କରିବେ। ସଂସଦ ସୁରକ୍ଷାରେ ତ୍ରୁଟିକୁ ନେଇ ଉକ୍ତ ବୈଠକରେ ଆଲୋଚନା ହେବ। ସେମାନେ ରାଷ୍ଟ୍ରପତିଙ୍କୁ ଭେଟି ଏହି ପ୍ରସଙ୍ଗରେ ଦୃଷ୍ଟି ଆକର୍ଷଣ କରିବା ନେଇ ଚିନ୍ତା କରୁଛନ୍ତି। ଉପଯୁକ୍ତ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲେ ଏପରି ଘଟି ନ ଥାଆନ୍ତା। ଏଥପାଇଁ ସ୍ବରାଷ୍ଟ୍ର ମନ୍ତ୍ରୀ ଶାହା ଉଭୟ ଲୋକ ସଭା ଓ ରାଜ୍ୟ ସଭାରେ ବିବୃତି ରଖନ୍ତୁ ବୋଲି କଂଗ୍ରେସ କହିଛି। ଅନ୍ୟ ଦଳଗୁଡ଼ିକର ସଦସ୍ୟମାନେ ମଧ୍ୟ ଶାହାଙ୍କଠାରୁ ସ୍ପଷ୍ଟୀକରଣ ଲୋଡ଼ିଛନ୍ତି।
