ନୂଆଦିଲ୍ଲୀ,୩୧।୧: ବଜେଟ ଅଧିବେଶନ ପୂର୍ବରୁ ସଂସଦରେ ପହଞ୍ଚି ପ୍ରଧାନମନ୍ତ୍ରୀ ମୋଦି ଦେଶବାସୀଙ୍କୁ ସମ୍ବୋଧିତ କରିଛନ୍ତି। ପ୍ରଧାନମନ୍ତ୍ରୀ କହିଛନ୍ତି, ମୁଁ ମା’ ଲକ୍ଷ୍ମୀଙ୍କ ନିକଟରେ ପ୍ରାର୍ଥନା କରୁଛି ଯେ ଦେଶର ପ୍ରତ୍ୟେକ ଗରିବ ଏବଂ ମଧ୍ୟବିତ୍ତ ବର୍ଗର ସମ୍ପ୍ରଦାୟ ଉପରେ ମା’ ଲକ୍ଷ୍ମୀଙ୍କ ଆଶୀର୍ବାଦ ରହୁ। ଆମର ଗଣତନ୍ତ୍ର ୭୫ ବର୍ଷ ପୂରଣ କରିଛି। ଏହା ଦେଶର ପ୍ରତ୍ୟେକ ନାଗରିକଙ୍କ ପାଇଁ ଅତ୍ୟନ୍ତ ଗର୍ବର ବିଷୟ।
ପ୍ରଧାନମନ୍ତ୍ରୀ ମୋଦି କହିଛନ୍ତି, ଏହା ତୃତୀୟ କାର୍ଯ୍ୟକାଳର ପ୍ରଥମ ପୂର୍ଣ୍ଣାଙ୍ଗ ବଜେଟ। ମୁଁ ବିଶ୍ୱାସର ସହିତ କହିପାରିବି ଯେ ଏକ ବିକଶିତ ଭାରତର ସଂକଳ୍ପ ୨୦୪୭ରେ ପୂରଣ ହେବ। ଏହି ବଜେଟ ଏକ ନୂତନ ଆତ୍ମବିଶ୍ୱାସ ସୃଷ୍ଟି କରିବ, ନୂତନ ଶକ୍ତି ଦେବ। ସେ ଏହା ମଧ୍ୟ କହିଛନ୍ତି ଦେଶବାସୀ ମିଳିତ ଭାବରେ ଏହି ସଂକଳ୍ପକୁ ପ୍ରୟାସର ସହିତ ପୂରଣ କରିବେ।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ତୃତୀୟ କାର୍ଯ୍ୟକାଳରେ, ଆମେ ଦେଶର ସର୍ବାଙ୍ଗୀନ ବିକାଶ ଦିଗରେ ମିଶନ ମୋଡରେ ଆଗକୁ ବଢ଼ୁଛୁ। ନବସୃଜନ, ଅନ୍ତର୍ଭୁକ୍ତିକରଣ ଏବଂ ନିବେଶ – ଏଗୁଡ଼ିକ ନିରନ୍ତର ଭାବରେ ଆର୍ଥିକ କାର୍ଯ୍ୟକଳାପ ପାଇଁ ଆମର ରୋଡମ୍ୟାପର ଆଧାର ହୋଇଆସିଛି। ପ୍ରଧାନମନ୍ତ୍ରୀ ମୋଦି ବଜେଟ ଅଧିବେଶନ ପୂର୍ବରୁ କହିଛନ୍ତି, ସବୁବେଳେ ପରି ଏହି ଅଧିବେଶନରେ ମଧ୍ୟ ଅନେକ ଐତିହାସିକ ବିଲ ଉପରେ ଗୃହରେ ଆଲୋଚନା ହେବ ଏବଂ ବ୍ୟାପକ ମନ୍ଥନ ପରେ, ସେଗୁଡ଼ିକ ଏପରି ଆଇନରେ ପରିଣତ ହେବ ଯାହା ରାଷ୍ଟ୍ରର ଶକ୍ତି ବୃଦ୍ଧି କରିବା ପାଇଁ କାମ କରିବ।
