ପାଟନା,୩୧।୭: ବିହାର ପୁର୍ନିଆର ଏମପି ପପ୍ପୁ ଯାଦବ ଅଯୋଧ୍ୟା ରାମ ମନ୍ଦିର ଚାନ୍ଦା ସଂଗ୍ରହରେ କଥିତ ଅନିୟମିତତା ପ୍ରସଙ୍ଗକୁ ନେଇ ସଂସଦ ପରିସରରେ ପ୍ରତିବାଦ କରିଛନ୍ତି । ଏହି ପ୍ରତିବାଦକୁ ଭିନ୍ନ ଢଙ୍ଗରେ ପ୍ରକାଶ କରିବା ପାଇଁ ପପ୍ପୁ ଯାଦବ ସାଧୁ ବେଶ ଧାରଣ କରି ସଂସଦରେ ପହଞ୍ଚିଥିଲେ। ଗେରୁଆ ବସ୍ତ୍ର ପିନ୍ଧି ସେ ସଂସଦ ପରିସର ବାହାରେ ଧାରଣାରେ ବସି ରାମ ମନ୍ଦିର ଚାନ୍ଦା ସମ୍ପର୍କିତ ଅଭିଯୋଗର ନିରପେକ୍ଷ ତଦନ୍ତ ଦାବି କରିଥିଲେ।
ଏହି ପ୍ରତିବାଦରେ ଲୋକସଭାର ବିରୋଧୀ ଦଳ ନେତା ରାହୁଲ ଗାନ୍ଧୀ ମଧ୍ୟ ପପ୍ପୁ ଯାଦବଙ୍କ ସହ ଉପସ୍ଥିତ ରହି ସମର୍ଥନ ଜଣାଇଥିଲେ। ଏହାଛଡ଼ା ସମାଜବାଦୀ ପାର୍ଟିର ଏମପିମାନେ ମଧ୍ୟ ପ୍ରତିବାଦରେ ସାମିଲ ହୋଇଥିଲେ। ଏହି ଘଟଣା ପରେ ସଂସଦ ପରିସରରେ ପପ୍ପୁ ଯାଦବଙ୍କ ସାଧୁ ବେଶକୁ ନେଇ ମଧ୍ୟ ଜୋରଦାର ଚର୍ଚ୍ଚା ଆରମ୍ଭ ହୋଇଛି ।
ପ୍ରତିବାଦ ସମୟରେ ସେ ରାହୁଲ ଗାନ୍ଧୀ ଏବଂ ସମାଜବାଦୀ ପାର୍ଟିର ଏମପିଙ୍କଠାରୁ ଟଙ୍କା ସଂଗ୍ରହ କରିଥିଲେ। ବିରୋଧୀ ଦଳର ଏମପିମାନେ ମଧ୍ୟ ଜୋରଦାର ସ୍ଲୋଗାନ ଦେଇଥିଲେ । ଏମପିମାନେ ପପୁ ଯାଦବଙ୍କୁ ଦାନ ଦେବା ଆରମ୍ଭ କରିବା ମାତ୍ରେ ସେମାନଙ୍କ ମଧ୍ୟରୁ କିଛି ଲୋକଙ୍କ ମଧ୍ୟରେ ପ୍ରତୀକାତ୍ମକ ହାତାହାତି ହୋଇଥିଲା। ପ୍ରିୟଙ୍କା ଗାନ୍ଧୀ, ରାହୁଲ ଗାନ୍ଧୀ ଏବଂ ଡିମ୍ପଲ ଯାଦବଙ୍କ ସହିତ ଅଯୋଧ୍ୟା ଏମପି ଅବଧେଶ ପ୍ରସାଦ ମଧ୍ୟ ପ୍ରତିବାଦରେ ଅଂଶଗ୍ରହଣ କରିଥିଲେ। ସମଗ୍ର ପ୍ରତିବାଦ ରାମ ମନ୍ଦିରରେ ଅର୍ପଣ କରାଯାଇଥିବା ପ୍ରସାଦ ଚୋରି ପ୍ରସଙ୍ଗ ଉପରେ କେନ୍ଦ୍ରିତ ଥିଲା।
ଶୁକ୍ରବାର ସଂସଦର ମୌସୁମୀ ଅଧିବେଶନର ୧୦ମ ଦିନ । କିନ୍ତୁ, ଗୃହ କାର୍ଯ୍ୟ ଆରମ୍ଭ ହେବା ମାତ୍ରେ ଏକ ବଡ଼ ହଙ୍ଗାମା ଆରମ୍ଭ ହୋଇଥିଲା, ଯାହା ଫଳରେ ଲୋକ ସଭା ବାଚସ୍ପତି ଓମ୍ ବିର୍ଲା ଏମପିମାନଙ୍କୁ ଚେତାବନୀ ଦେଇଥିଲେ। ହଟ୍ଟଗୋଳ ଯୋଗୁଁ ଲୋକସଭା କାର୍ଯ୍ୟକୁ ଦିନ ୧୨ଟା ପର୍ଯ୍ୟନ୍ତ ମୁଲତବୀ ରଖାଯାଇଥିଲା । ଆଜି ମଧ୍ୟ କାର୍ଯ୍ୟ ଆରମ୍ଭ ହେବା ମାତ୍ରେ ସଂସଦର ଉଭୟ ଗୃହରେ ପ୍ରବଳ ହଟ୍ଟଗୋଳ ହୋଇଥିଲା। ରାଜ୍ୟ ସଭା କାର୍ଯ୍ୟକୁ ଅଗଷ୍ଟ ୩ ପର୍ଯ୍ୟନ୍ତ ମୁଲତବୀ ରଖାଯାଇଛି ।
