ଦେବଗଡ,୩୦।୯(ଶଶାଙ୍କ ଶେଖର ଝାଙ୍କର): ଦେବଗଡ ଥାନା ଅନ୍ତର୍ଗତ ବଳମ ଗ୍ରାମରେ ପଂଚାୟତରାଜ ଓ ପାନୀୟ ଜଳ ଓ ଗ୍ରାମ ଉନ୍ନୟତନ ମନ୍ତ୍ରୀ ରବି ନାରାୟଣ ନାୟକଙ୍କ କାର୍କୁ ଧକ୍କା ଦେଇ ୨ ଜଣ ବାଇକ ଆରୋହୀ ଆହତ ହୋଇଥିବା ଜଣାପଡିଛି । ସେମାନଙ୍କ ମଧ୍ୟରୁ ଜଣଙ୍କ ଅବସ୍ଥା ସଙ୍କଟ୍ଟାପନ୍ନ ରହିଥିବାରୁ ଅଧିକ ଚିକିତ୍ସା ନିମନ୍ତେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଛି । ସୂଚନା ଅନୁଯାୟୀ, ସୋମବାର ସନ୍ଧ୍ୟାରେ ବଳମ ସ୍ଥିତ ଜାଗୃତି ଦୁର୍ଗା ପୂଜା କମିଟି ପକ୍ଷରୁ ଦୁର୍ଗାପୂଜାର ରୌପ୍ୟ ଜୟନ୍ତୀ ସମାରୋହ କାର୍ଯ୍ୟକ୍ରମ ରହିଥିଲା । ମନ୍ତ୍ରୀ ନାୟକ ଏହି କାର୍ଯ୍ୟକ୍ରମରେ ଯୋଗଦେବାକୁ ନିଜ କାର୍ ଯୋଗେ ଆସୁଥିବା ବେଳେ ଆଗରେ ପୋଲିସର ଗାଡି ମଧ୍ୟ ଯାଉଥିଲା । ତେବେ ମନ୍ତ୍ରୀ ନାୟକ ଅଳ୍ପ ଦୂରରେ ଥିବା ମଳମ ଶାସନ ସାହିରେ ଜଣେ ବନ୍ଧୁଙ୍କୁ ସାକ୍ଷାତ କରିବାକୁ ଅଟକିଥିଲେ । ଫଳରେ ପୋଲିସ ପାଇଲଟିଂ ଗାଡିଟି ଆଗକୁ ଅଗ୍ରସର ହେବା ସହ ବଳମ ମୁଖ୍ୟ ଛକ ପାରି ହୋଇଥିଲା । କିଛି ସମୟ ପରେ ମନ୍ତ୍ରୀଙ୍କ କାର୍ଟି ବଳମ ମୁଖ୍ୟ ଛକରେ ଥିବା ମେଡିଆନ କ୍ରସିଂରେ ରାସ୍ତାର ଡାହାଣ ପାର୍ଶ୍ୱକୁ ବୁଲାଇଉଥିବା ବେଳେ ପଛପଟୁ ଏକ ବାଇକରେ ଆସୁଥିବା ନିକଟସ୍ଥ ଭାଲୁମୁଣ୍ଡା ଗ୍ରାମର ଦିଗାମ୍ବର ପ୍ରଧାନ( ୨୨) ଓ ପ୍ରଦୀପ ପଲେଇ ଉକ୍ତ କାର୍ଟିକୁ ପଛପଟୁ ଧକ୍କା ଦେବାସହ ରାସ୍ତା ଉପରକୁ ଛିଟିକି ପଡି ଆହତ ହୋଇଥିଲେ । ସେହିପରି ବାଇକ ଧକ୍କାରେ ମନ୍ତ୍ରୀଙ୍କ କାର୍ ମଧ୍ୟ କ୍ଷତିଗ୍ରସ୍ତ ହୋଇଥିଲା। ସେଠାରେ ଉପସ୍ଥିତ ପୋଲିସ ଉଭୟ ଆହତଙ୍କୁ ଉଦ୍ଧର କରି ଚିକିତ୍ସା ନିମନ୍ତେ ଦେବଗଡ ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ମାତ୍ର ଦିଗାମ୍ବରଙ୍କ ଅବସ୍ଥା ଗୁରୁତର ଥିବାରୁ ଅଧିକ ଚିକିତ୍ସା ନିମନ୍ତେ ବୁର୍ଲା ଡାକ୍ତରଖାନାକୁ ସ୍ଥାନାନ୍ତରିତ କରାଯାଇଥିଲା । ଅନ୍ୟପକ୍ଷରେ ମନ୍ତ୍ରୀ ବଳମ ଦୁର୍ଗାପୂଜା ମଣ୍ଡପରେ ପହଞ୍ଚି ମା’ ଦୁର୍ଗାଙ୍କ ଦର୍ଶନ ସାରି ଜାଗୃତି ଦୁର୍ଗା ପୂଜା କମିଟି ପକ୍ଷରୁ ଆୟୋଜିତ ରୌପ୍ୟ ଜୟନ୍ତୀ ସାମାରୋହରେ କମିଟି କର୍ମକର୍ତ୍ତା ଓ ଅଂଚଳବାସୀଙ୍କୁ କେବଳ ଶୁଭେଚ୍ଛା ବାର୍ତ୍ତା ଦେଇ ନିଜର ବକ୍ତବ୍ୟ ଶେଷ କରିବାସହ ଆହତ ମାନଙ୍କୁ ଦେଖିବା ପାଇଁ ଜିଲା ମୁଖ୍ୟ ଚିକିତ୍ସାଳୟରେ ପହଞ୍ଚିଥିଲେ। ତାଙ୍କ ସହିତ ରୌଫ୍ୟ ଜୟନ୍ତୀ ସମାରୋହରେ ସମ୍ମାନିତ ଅତିଥି ଭାବେ ଯୋଗଦେବାକୁ ଥିବା ଜିଲା ଭାଜପା ସଭାପତି ଅରୁଣ କୁମାର ସାହୁ ମଧ୍ୟ ଉପସ୍ଥିତ ଥିଲେ । ଏହାପରେ ଗୁରୁତର ଆହତ ଦିଗାମ୍ବରଙ୍କୁ ଅଧିକ ଚିକିତ୍ସା ନିମନ୍ତେ ବୁର୍ଲା ଡାକ୍ତରଖାନାକୁ ସ୍ତାନାନ୍ତରିତ କରାଯାଇଥିଲା । ଅନ୍ୟପକ୍ଷରେ ରୌପ୍ୟ ଜୟନ୍ତୀ ସାମାରୋହରେ ଦେବଗଡ ବିଧାୟକ ରୋମାଂଚ ରଞ୍ଜନ ବିଶ୍ୱାଳ ମୁଖ୍ୟ ଅତିଥି ଦାୟିତ୍ୱ ନିର୍ବାହ କରିବା ସହ ଆହତମାନଙ୍କର ଆଶୁ ଆରୋଗ୍ୟ କାମନା କରିଥିଲେ ।
