ପୁରୁଷୋତ୍ତମପୁର,୨୯ା୪(ସବିତା ମିଶ୍ର): ଦୀର୍ଘ ୧୫ମାସ ପରେ ଗଞ୍ଜାମ ଜିଲା ପୁରୁଷୋତ୍ତମପୁର ପଞ୍ଚାୟତ ସମିତି ବୈଠକ ବସିଥିବା ବେଳେ ତାହା ଏକପ୍ରକାରର ରଣକ୍ଷେତ୍ର ପାଲଟିଥିଲା। ଯାହାକି ମୁହାଁମୁହିଁ ହୋଇ ବାକବିତଣ୍ଡା, ଯୁକ୍ତିତର୍କ ଘଟି ଟେବୁଲୁ ପିଟିବା, ମାଇକ୍ରୋଫୋନ ଭାଙ୍ଗିବା ସହ ଉପରକୁ ଚୌକି ଟେକିବା ପର୍ଯ୍ୟନ୍ତ କଥା ଯାଇଥିଲା। ଏହି ବୈଠକ ଏପରି ଥିଲା ଯେ, ଏହା ଜନସାଧାରଣଙ୍କ ସ୍ବାର୍ଥ ବଦଳରେ ରାଜନୈତିକ ଅଭିସନ୍ଧି ଓ ଗୋଷ୍ଠୀ ବିବାଦ ଭଳି ରହିଥିଲା। ଏହାସାଙ୍ଗକୁ ଜନପ୍ରତିନିଧିଙ୍କ ପ୍ରଶ୍ନବାଣରେ ବିଭାଗୀୟ ଅଧିକାରୀମାନେ ଘାଇଲା ହୋଇ ତୁ ତୁ ମେ ମେ ହୋଇପଡ଼ିଥିଲେ। ଯାହାକି ଏହା ଅତ୍ୟନ୍ତ ନିନ୍ଦନୀୟ ଘଟଣା ପାଲଟିଛି।
ବିଡିଓ ଶରତକୁମାର ପାତ୍ରଙ୍କ ସଂଯୋଜନାରେ ବୈଠକ ଆରମ୍ଭ ହୋଇଥିବା ବେଳେ ପ୍ରଥମେ ଜଳଭାରତ ମିଶନ ଓ ସ୍ବଚ୍ଛଭାରତ ମିଶନକୁ ନେଇ ଏକ ସଂସ୍ଥା ବୁଝାଇବା ବେଳେ ସେ ପୁରୁଷୋତ୍ତମପୁର ବ୍ଲକର ବିକାଶ କଥା ନ କହି ଅନ୍ୟ ବ୍ଲକର କଥା କହିବାରେ ଲାଗିଥିଲେ। ଏହାକୁ ନେଇ ଉପସ୍ଥିତ ଜନପ୍ରତିନିଧିମାନେ ପ୍ରତିବାଦ କରି ଅନ୍ୟ ବ୍ଲକରେ ଯଦି ହେଉଛି ଏହି ବ୍ଲକରେ କାହିଁକି ହୋଇପାରୁନାହିଁ କିପରି ଏଠାରେ ହୋଇପାରିବ ବୋଲି ପ୍ରଶ୍ନକରି ସେଥିନେଇ କହିବାକୁ କହିଥିଲେ। ଫଳରେ ଏହାକୁ ନେଇ ଦୁଇଗୋଷ୍ଠୀର ଜନପ୍ରତିନିଧିଙ୍କ ମଧ୍ୟରେ ମୁହାଁମୁହିଁ ପରିସ୍ଥିତି ହୋଇ ଅପ୍ରୀତିକର ଘଟଣା ଘଟିଥିଲା। ଫଳରେ ଉପସ୍ଥିତ କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ ହସ୍ତକ୍ଷେପ କରି ଉଭୟଙ୍କୁ ବୁଝାଶୁଝା କରି ପରିସ୍ଥିତିକୁ ନିୟନ୍ତ୍ରଣ କରିଥିଲେ।
ସେହିପରି ଉନ୍ନୟନମୂଳକ କାର୍ଯ୍ୟମାନ ଗ୍ରାମାଞ୍ଚଳଗୁଡ଼ିକରେ ହୋଇପାରୁନାହିଁ ବିକାଶମୂଳକ କାର୍ଯ୍ୟଲାଗି ସରକାରୀ କର୍ମଚାରୀମାନେ ସହଯୋଗ କରୁନାହାନ୍ତି ଯାହାଦ୍ବାରା ଲୋକେ ସରକାରୀ ଯୋଜନାରୁ ବଞ୍ଚିତ ହୋଇରହିଥିବାର ନେଇ ଜନପ୍ରତିନିଧିମାନେ ଅଭିଯୋଗ କରିଥିଲେ। ଏପରିକି ଯନ୍ତ୍ରୀମାନେ ୧୦ ପ୍ରତିଶତ ପିସି ଭାବରେ ଲାଞ୍ଚ ମାଗୁଥିବା ଓ ନ ଦେଲେ କାର୍ଯ୍ୟରେ ହଇରାଣ ହରକତ କରୁଥିବା ନେଇ ଅଭିଯୋଗ କରି ତୁମୁଳ ଭାବରେ ହୋ-ହଲ୍ଲା ହୋଇଥିଲା।
ସେହିପରି ସିଡିପିଓଙ୍କ କାର୍ଯ୍ୟର ଅବହେଳା କରୁଥିବା ସହ ଜନପ୍ରତିନିଧିଙ୍କ ଅଭିଯୋଗକୁ ଗୁରୁତ୍ୱ ନ ଦେଇ ମନଇଚ୍ଛା ଭାବରେ କାର୍ଯ୍ୟ କରୁଥିବାରୁ ମହିଳା ଶିଶୁବିକାଶ ବିଭାଗ ଏଠାରେ ଧୂଳିସାତ୍ ହୋଇପଡ଼ିଥିବାର ନେଇ ଅଭିଯୋଗ ଆସିଥିବା ବେଳେ ପାନୀୟ ଳଳ ଯୋଗାଣ, ବିଦ୍ୟୁତ୍ ବିଭାଗ ଟାଟାପାଓ୍ବାର, ଗ୍ରାମ୍ୟ ଉନ୍ନୟନ ବିଭାଗ, ଯୋଗାଣ ବିଭାଗ, ପୂର୍ତ୍ତବିଭାଗ ଆଦି ବହୁ ଗୁରୁତ୍ୱପୂର୍ଣ୍ଣ ବିଭାଗରେ ମଧ୍ୟ କର୍ମଚାରୀଙ୍କ ଦାୟିତ୍ୱହୀନତାକୁ ନେଇ ହୋ-ହଲ୍ଲା ହୋଇଥିଲା। ପଞ୍ଚାୟତ ସମିତି ବୈଠକ ଠିକ୍ ସମୟରେ ହେଉ ନ ଥିବା, କର୍ମଚାରୀମାନେ ଏପରି ଲଗାମଛଡ଼ା ହୋଇ କାର୍ଯ୍ୟ କରୁଥିବାରୁ ଗ୍ରାମାଞ୍ଚଳର ବିକାଶ ହୋଇପାରୁ ନ ଥିବା ନେଇ ସମସ୍ତଙ୍କ ମଧ୍ୟରେ ପ୍ରତିବାଦର ସ୍ବର ଉଠିଥିଲା।
ଏହାକୁ ନେଇ କବିସୂର୍ଯ୍ୟନଗର ବିଧାୟକ ପ୍ରତାପ ଚନ୍ଦ୍ର ନାୟକ ଓ ଖଲ୍ଲିକୋଟ ବିଧାୟକ ପୂର୍ଣ୍ଣଚନ୍ଦ୍ର ସେଠୀ ବିଭାଗୀୟ ଅଧିକାରୀମାନଙ୍କୁ ତାଗିଦ କରି ଯେପରି ଜନହିତକର ଓ ବିକାଶମୂଳକ କାର୍ଯ୍ୟମାନକୁ ତରନ୍ତ କରିବା ଲାଗି ନିର୍ଦ୍ଦେଶ ଦେଇଥିଲେ। ଏଥିରେ ଏମ୍ପି ପ୍ରତିନିଧି ଅନିଲ କୁମାର ପଣ୍ଡା, ବ୍ଲକ ଅଧ୍ୟକ୍ଷା ପିଙ୍କି ବେହେରା, ତହସିଲଦାର ବିନୋଦ କୁମାର ବେହେରା, ଏବିଡିଓ ଜୟଶ୍ରୀ ନାୟକ, ସହକାରୀ ଯନ୍ତ୍ରୀ ନାଗ ଭୂଷଣ ଯାଦବ, ସରପଞ୍ଚ ମନୋଜ କୁମାର ଦାଶ, ରାଜଲକ୍ଷ୍ମୀ ବେହେରା, ସବିତା ସେଠୀ, ସୁଧାକର ଗୌଡ଼,ରଞ୍ଜନ କୁମାର ପାତ୍ର, ଏନ ଭାସ୍କର ଦୋରା, ସମିତିସଭ୍ୟ ସୀମାଞ୍ଚଳ ଗୌଡ଼, ସାରଳା ବେହେରା, ଆଭା ପରିଡ଼ାଙ୍କ ସମେତ ବହୁ ଜନପ୍ରତିନିଧି ଯୋଗଦେଇଥିଲେ।
