ଭାପୁର,୫ା୫(ଡି.ଏନ.ଏ.): ଭାପୁର ବ୍ଲକ ପଦ୍ମାବତୀ ପଞ୍ଚାୟତର ଜନସାଧାରଣ ଝଗଡ଼ପଡ଼ାଠାରେ ଥିବା କୁମ୍ଭୀ ନାଳ ଦେଇ ଭାପୁର ବ୍ଲକକୁ ଯାତାୟାତ କରିଥାନ୍ତି। ରାକମା ପଞ୍ଚାୟତ ଓ ଅନ୍ୟ ପାଖ ପଡୋଶୀ ପଞ୍ଚାୟତର ଛାତ୍ରୀଛାତ୍ର ମଧ୍ୟ ଏହି ବାଟ ଦେଇ ଯାତାୟାତ କରନ୍ତି। ହେଲେ ବର୍ଷାଦିନ ହେଲେ ସେହି କୁମ୍ଭୀ ନାଳରେ ପାଣି ଆସିବା ଫଳରେ ଯାତାୟାତ କରିବା ଅସମ୍ଭବ ହେଉଛି। କୁମ୍ଭୀ ନାଳ ଉପରେ ଏକ ପୋଲ ନିର୍ମାଣ ହୋଇ ପାରିଲେ ଉଭୟ ପଞ୍ଚାୟତର ଜନସାଧାରଣ, ପାଖ ପଡ଼ୋଶୀ ବାଟୋଇଙ୍କର ଓ ଛାତ୍ରୀଛାତ୍ରମାନେ ଯାତାୟାତ କରିବା ସମ୍ଭବ ହୋଇପାରନ୍ତା। ପୋଲ ନିର୍ମାଣ ପାଇଁ ଉଭୟ ପଞ୍ଚାୟତର ଜନସାଧାରଣ ଭାପୁର ବିଡିଓ ରଞ୍ଜିତ କୁମାର ମଲ୍ଲିକ ଓ ସ୍ଥାନୀୟ ବିଧାୟକ ସୌମ୍ୟରଞ୍ଜନ ପଟ୍ଟନାୟକଙ୍କୁ ଏକ ଦାବିପତ୍ର ଦେଇଥିଲେ।
ସୂଚନାଯୋଗ୍ୟ, ପ୍ରତିଦିନ ପଦ୍ମାବତୀ, ଶାସନ, ରାକମା, ବିଜିପୁର ଅନେକ ପଞ୍ଚାୟତର ଶହଶହ ଜନସାଧାରଣ ଏହି ନାଳ ରାସ୍ତା ଦେଇ ପାଦରେ ଯାତାୟାତ କରିଥାନ୍ତି। ହେଲେ ଅଧିକାଂଶ ସମୟରେ ପାଣି ରହୁଥିବାରୁ ଜନସାଧାରଣ ୮ରୁ୧୦ କିଲୋମିଟର ବୁଲି କିମ୍ବା ବିଜିପୁର ଛକ ଦେଇଯିବା ଆସିବା କରିବାକୁ ବାଧ୍ୟ ହୋଇଥାନ୍ତି। ଏହି ନାଳ ଉପରେ ଲକ୍ଷାଧିକ ଟଙ୍କା ମଞ୍ଜୁର ହୋଇ ମାପଚୁପ ସହ ସ୍ଥାନ ନିରୁପଣ ପରେ ମଧ୍ୟ ଦୀର୍ଘବର୍ଷ ଧରି ପୋଲ ନିର୍ମାଣ ହୋଇପାରିଲା ନାହିଁ। ୨୦୧୭-୧୮ରେ ଦୁବପଲ୍ଲୀ-ବାଦିଲୋ ରାସ୍ତାଟି ପ୍ରଧାନମନ୍ତ୍ରୀ ସଡ଼କ ଯୋଜନାରେ ସାମିଲ ହୋଇ ୨କୋଟି ୫୩ ଲକ୍ଷ ଟଙ୍କା ମଞ୍ଜୁର ହେଲା। ଏହି ଅର୍ଥରେ ପକ୍କା ସଡ଼କ ନିର୍ମାଣ ସହ ଝଗଡ଼ପଡ଼ା ନାଳ ଉପରେ ପୋଲ ନିର୍ମାଣ ପାଇଁ ଲକ୍ଷାଧିକ ଟଙ୍କା ମଧ୍ୟ ମଞ୍ଜୁର ହୋଇଥିଲା। ଜନସାଧାରଣ ପୋଲ ନିର୍ମାଣ ଖୁବ୍ଶୀଘ୍ର ହେବ ବୋଲି ଖୁସି ହୋଇଥିଲେ। ମାତ୍ର ରାସ୍ତା ନିର୍ମାଣ ହେଲା ସତ ହେଲେ ନାଳ ଉପରେ ପୋଲ ନିର୍ମାଣ ହେଲା ନାହିଁ। ଜନସାଧାରଣଙ୍କ ଅଭିଯୋଗ ଅନୁଯାୟୀ, ରାଜନୈତିକ ଇଚ୍ଛାଶକ୍ତିର ଅଭାବ ଯୋଗୁ ଏହି ପୋଲ ନିର୍ମାଣ କାର୍ଯ୍ୟ ହୋଇପାରିଲା ନାହିଁ। ସେହି ସମୟରେ ତତ୍କାଳୀନ ସରପଞ୍ଚ ଓ ସ୍ଥାନୀୟ ରାଜନୈତିକ ବ୍ୟକ୍ତିବିଶେଷ ନାଳ ଉପରେ ପୋଲ ନିର୍ମାଣ ପାଇଁ ତତ୍ପର ହୋଇ ବିଭାଗୀୟ ଯନ୍ତ୍ରୀଙ୍କ ଉପସ୍ଥିତରେ ଚିହ୍ନଟ ପ୍ରକ୍ରିୟା ସରିଥିଲା। ମାପଚୁପ ପରେ ଚିହ୍ନ ଦିଆଯାଇଥିଲା। ହେଲେ ଦୀର୍ଘ ୬ବର୍ଷ ପରେ ମଧ୍ୟ ପୋଲ ହୋଇପାରିଲା ନାହିଁ। ଏ ନେଇ ରାସ୍ତା ପଞ୍ଚାୟତର ତତ୍କାଳୀନ ସରପଞ୍ଚ ବନମାଳୀ ନାୟକ କହିଛନ୍ତି, ଜଣେ ବ୍ୟକ୍ତିଙ୍କ ଜମି ଉପରେ ପୋଲ ମାଡ଼ି ଯାଉଥିବାରୁ ସେ ଜମି ନ ଛାଡିବାରୁ ସେହି ସମୟରେ କାମ ବନ୍ଦ ହୋଇଥିଲା। ଏ ନେଇ ଗ୍ରାମ୍ୟ ଉନ୍ନୟନ ବିଭାଗର ଯନ୍ତ୍ରୀ କେଶବ ଚନ୍ଦ୍ର ସୁବୁଦ୍ଧିଙ୍କୁ ପଚାରିବାରେ ପୂର୍ବରୁ କାହିଁକି ଟଙ୍କା ଫେରିଗଲା କହିପାରିବି ନାହିଁ। ସେଠାରେ ପୋଲ ନିର୍ମାଣ ପାଇଁ ଜିଲା ପରିଷଦ ସଭ୍ୟ ଧର୍ମେନ୍ଦ୍ର କୁମାର ଧଳ ଜିଲା ପରିଷଦ ବୈଠକରେ କଥା ଉଠାଇଥିଲେ। ସେହି ଅନୁଯାୟୀ ଏହି ପୋଲ ନିର୍ମାଣ ପାଇଁ ବିଭାଗ ପକ୍ଷରୁ ରାଜ୍ୟ ସରକାରଙ୍କ ଅନୁମୋଦନ ପାଇଁ ପଠାଇଛୁ। ଅନୁମୋଦନ ହୋଇ ଆସିଲେ ପୋଲ ନିର୍ମାଣ ହେବ ବୋଲି ସେ କହିଛନ୍ତି।
