ଇସଲାମାବାଦ୍,୨୯।୫: ପାକିସ୍ତାନର ପଞ୍ଜାବ ପ୍ରଦେଶର କସୁର ଜିଲାରେ ପାକିସ୍ତାନ ସରକାର ଏବଂ ଲସ୍କର-ଏ-ତୋଇବା ମଧ୍ୟରେ ପାରସ୍ପରିକ ମେଣ୍ଟର ଫଟୋ ଭାଇରାଲ ହୋଇଛି। ଏହି ଫଟୋ ଜରିଆରେ ସମଗ୍ର ବିଶ୍ୱ ସମ୍ମୁଖରେ ପାକିସ୍ତାନର ଅସଲ ମୁଖା ଖୋଲିଯାଇଛି। ଏହା କୌଣସି ଅଭିଯୋଗ ନ ଥିଲା, ବରଂ କ୍ୟାମେରାରେ କଏଦ ହୋଇଥିବା ଚିତ୍ର ଥିଲା, ଯେଉଁଠାରେ ପାକିସ୍ତାନ ସରକାରଙ୍କ ଶୀର୍ଷ ମନ୍ତ୍ରୀ ଏବଂ ବକ୍ତାମାନେ ଆତଙ୍କବାଦୀଙ୍କ ସହିତ ମଞ୍ଚ ଶେୟାର କରୁଥିଲେ।
ଶେହବାଜ ଶରିଫ ଏବଂ ମରିୟମ ନୱାଜଙ୍କ ନିକଟତର ପାକିସ୍ତାନର ଖାଦ୍ୟ ମନ୍ତ୍ରୀ ମାଲିକ ରସିଦ ଅହମ୍ମଦ ଖାନ ଏବଂ ପଞ୍ଜାବ ବିଧାନସଭା ବାଚସ୍ପତି ମଲିକ ମହମ୍ମଦ ଅହମ୍ମଦ ଖାନ ଆତଙ୍କବାଦୀ ଆମିର ହମଜା ଏବଂ ସୈଫୁଲ୍ଲା କସୁରୀଙ୍କ ସହିତ ଲସ୍କର ମଞ୍ଚରେ ବସିଥିଲେ। ସେମାନଙ୍କର ଫଟୋ ଏବଂ ଭିଡିଓ ଏବେ ଅନ୍ତର୍ଜାତୀୟ ମଞ୍ଚରେ ପାକିସ୍ତାନର ପ୍ରତିଛବିକୁ ଗଭୀର ଭାବରେ ପ୍ରଭାବିତ କରୁଛି।
ଆଶ୍ଚର୍ଯ୍ୟର କଥା ହେଉଛି ଯେ, ଏହି ନେତାମାନେ ନିଜେ ଆତଙ୍କବାଦୀଙ୍କ ଆଗମନ ପୂର୍ବରୁ ମଞ୍ଚରେ ପହଞ୍ଚି ସେମାନଙ୍କୁ ସ୍ବାଗତ କରିବାର ଦାୟିତ୍ୱ ନେଇଥିଲେ। ସେମାନେ ସୈଫୁଲ୍ଲା କସୁରୀ ଏବଂ ହାଫିଜ ସଇଦର ପୁଅ ତଲହା ସଇଦଙ୍କୁ ଆଲିଙ୍ଗନ କରି ଭାଷଣ ଦେଇଥିଲେ। ଏହି ଆତଙ୍କବାଦୀମାନଙ୍କୁ ପାକିସ୍ତାନର ରକ୍ଷାକର୍ତ୍ତା ଭାବରେ ଉପସ୍ଥାପନ କରିବାକୁ ଚେଷ୍ଟା କରାଯାଇଥିଲା।
ଲସ୍କର ମଞ୍ଚରେ ଯାହା ବି କୁହାଯାଇଥିଲା ତାହା କେବଳ ଭାରତ ବିରୋଧରେ ବିଷ ଓଗାଳିବା ନୁହେଁ, ବରଂ ବିଶ୍ୱ ଆତଙ୍କବାଦୀଙ୍କୁ ହିରୋ ଭାବରେ ଉପସ୍ଥାପନ କରିବାର ଏକ ଲଜ୍ଜାଜନକ ପ୍ରୟାସ ମଧ୍ୟ ଥିଲା। କେନ୍ଦ୍ର ମନ୍ତ୍ରୀ ମାଲିକ ରସିଦ ଖୋଲା ମଞ୍ଚରୁ ଘୋଷଣା କରିଥିଲେ, ପାକିସ୍ତାନର ୨୪ କୋଟି ଲୋକ ଆତଙ୍କବାଦୀ ସୈଫୁଲ୍ଲା କସୁରୀ ଏବଂ ହାଫିଜ ସଇଦର ରୂପ ନେଇଛନ୍ତି। କେବଳ ଏତିକି ନୁହେଁ, ମଞ୍ଚରୁ ଏହା ମଧ୍ୟ ଘୋଷଣା କରାଯାଇଥିଲା, ଶେହବାଜ ସରକାର ଲସ୍କର କମାଣ୍ଡର ମୁଦାସିରଙ୍କ ଭାଇକୁ ଚାକିରି ଦେବେ, ଯିଏ ମୁରିଦକେରେ ଲସ୍କର ମୁଖ୍ୟାଳୟରେ ଭାରତ ଦ୍ୱାରା କରାଯାଇଥିବା ଆକ୍ରମଣରେ ପ୍ରାଣ ହରାଇଥିଲେ।
ମଲିକ ମହମ୍ମଦ ଅହମ୍ମଦ ଖାନ ସୈଫୁଲ୍ଲା କସୁରୀଙ୍କୁ ‘ହିରୋ’ ଘୋଷଣା କରିଥିଲେ ଏବଂ ହାଫିଜ ସଇଦର ପରିବାର ସହିତ ତାଙ୍କର ବ୍ୟକ୍ତିଗତ ସମ୍ପର୍କକୁ ମଧ୍ୟ ଗର୍ବ କରିଥିଲେ। ଏହି ସମ୍ପୂର୍ଣ୍ଣ କାର୍ଯ୍ୟ କେବଳ ଆତଙ୍କବାଦର ମହିମା ଗାନ କରି ନ ଥିଲା ବରଂ ଏହା ମଧ୍ୟ ଦର୍ଶାଉଛି ଯେ, ପାକିସ୍ତାନ ସରକାର ଏବେ ଖୋଲାଖୋଲି ଭାବରେ ଆତଙ୍କବାଦକୁ ସମର୍ଥନ କରୁଛି।
କାର୍ଯ୍ୟକ୍ରମର ସବୁଠାରୁ ଗମ୍ଭୀର ଦିଗ ଥିଲା, ଲସ୍କରର ସହ-ପ୍ରତିଷ୍ଠାତା ଏବଂ ବିଶ୍ୱ ଆତଙ୍କବାଦୀ ଅମିର ହମଜା ମଞ୍ଚରୁ ଖଲିସ୍ତାନ ଜିନ୍ଦାବାଦର ସ୍ଲୋଗାନ ଦେଇଥିଲେ। ଏହି ଘଟଣା ପାକିସ୍ତାନର ଆଇଏସଆଇ ଏବଂ ଲସ୍କରର ଭାରତ ବିରୋଧୀ ଏଜେଣ୍ଡାକୁ ଆହୁରି ସ୍ପଷ୍ଟ କରିଥାଏ। କିଛି ଦିନ ପୂର୍ବରୁ ବାହାୱଲପୁରରେ ଆଇଏସଆଇର ସେଫ ହାଉସରେ ଲୁଚି ରହିଥିବା ସୈଫୁଲ୍ଲା କସୁରୀ ମଧ୍ୟ ଏହି କାର୍ଯ୍ୟକ୍ରମରେ ନଜର ଆସିଥିଲେ। ପହଲଗାମ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ବୋଲି କୁହାଯାଏ।
କାର୍ଯ୍ୟକ୍ରମ ଶେଷରେ, ସୈଫୁଲ୍ଲା ପାକିସ୍ତାନ ସରକାରଙ୍କ ନେତାମାନଙ୍କୁ ଧନ୍ୟବାଦ ଜଣାଇଥିଲେ। ମଞ୍ଚରେ ଉପସ୍ଥିତ ଅଙ୍ଗରକ୍ଷୀ ଭିଡିଓ ବନ୍ଦ କରିବାକୁ ଇଙ୍ଗିତ କଲେ। ଏହି ଇଙ୍ଗିତ ସ୍ପଷ୍ଟ ଭାବରେ ଦର୍ଶାଉଛି ଯେ, ପାକିସ୍ତାନ ସରକାର ଆତଙ୍କବାଦ ପ୍ରତି ସମର୍ଥନ ଦେଖାଇବାକୁ ଚାହୁଁନାହିଁ, କିନ୍ତୁ ଏହାକୁ ଲୁଚାଇବାକୁ ମଧ୍ୟ ଅସମର୍ଥ।
