ଚଣ୍ଡିଗଡ଼, ୧୮।୧୨: ପଞ୍ଜାବର ଫେରୋଜପୁର ଅଞ୍ଚଳରେ ଅନ୍ତର୍ଜାତୀୟ ସୀମା ନିକଟରେ ପାକିସ୍ତାନୀ ଡ୍ରୋନକୁ ସୀମା ସୁରକ୍ଷା ବଳ (ବିଏସଏଫ) ଯବାନଙ୍କ ପକ୍ଷରୁ ଗୁଳି କରି ଖସାଇ ଦିଆଯାଇଛି। ବିଏସଏଫ ଅନୁଯାୟୀ, ଏହି ଡ୍ରୋନ ପାକିସ୍ତାନ ପଟୁ ଆସିଥିବାବେଳେ ଏହା ଉପରେ ମେଡ ଇନ ଚାଇନାରେ ଲେଖାଯାଇଛି। ଜଣେ ଅଧିକାରୀ କହିଛନ୍ତି ଯେ ସୂଚନା ପାଇବା ମାତ୍ରେ ବିଏସଏଫର ବରିଷ୍ଠ ଅଧିକାରୀମାନେ ଘଟଣାସ୍ଥଳରେ ପହଞ୍ଚି ସର୍ଚ୍ଚ ଅପରେଶନ ଆରମ୍ଭ କରିଥିଲେ।
ବିଏସଏଫ ପକ୍ଷରୁ କୁହାଯାଇଛି ଯେ, ଉମରକୋଟରେ ସୀମା ପୋଷ୍ଟରେ ପାଟ୍ରୋଲିଂ କରୁଥିବା ଏକ ଦଳ ରାତି ଶୁକ୍ରବାର ରାତି ପ୍ରାୟ ୧୧ଟା ୧୦ରେ ଶବ୍ଦ ଶୁଣିଥିଲେ। ଏହା ପରେ ସେମାନେ ଏକ ହେକ୍ସାକ୍ୟାପ୍ଟର ଡ୍ରୋନ କମ ଉଚ୍ଚତାରେ ଉଡୁଥିବା ଦେଖିବାକୁ ପାଇଥିଲେ। ଏହି ଡ୍ରୋନ ଅନ୍ତର୍ଜାତୀୟ ସୀମାଠାରୁ ପ୍ରାୟ ୩୦୦ ମିଟର ଏବଂ ବିଏସ୍ ଏଫ୍ ପୋଷ୍ଟଠାରୁ ୧୫୦ ମିଟର ଦୂରରେ ଥିଲା। ବିଏସଏଫ ଯବାନ ଏହାକୁ ଖସାଇ ଦେଇଥିଲେ।
ବିଏସଏଫ ପକ୍ଷରୁ ଜାରି ବିବୃତ୍ତିରେ କୁହାଯାଇଛି, ଡିସେମ୍ବର ୧୭ ରାତିରେ ବର୍ଡର ଆଉଟ ପୋଷ୍ଟର ଆଲର୍ଟ କର୍ମଚାରୀମାନେ ଏକ ଡ୍ରୋନକୁ ଚିହ୍ନଟ କରି ଗୁଳି ଚଳାଇଥିଲେ। ଏହି ଡ୍ରୋନ ସୀମା ସୁରକ୍ଷା ଏନକ୍ଲୋଜରରେ ଥିଲା। ଉଚ୍ଚ ପଦାଧିକାରୀଙ୍କ ଏକ ଟିମ ଘଟଣାସ୍ଥଳରେ ପହଞ୍ଚି ସର୍ଚ୍ଚ ଅପରେଶନ ଆରମ୍ଭ କରିଛନ୍ତି। ବିଏସଏଫ ଯବାନମାନେ ପୁଣି ଏକ ସୀମା ପାର ଅନୁପ୍ରବେଶକୁ ପଣ୍ଡ କରିଛନ୍ତି।
ଜଣେ ଅଧିକାରୀ କହିଛନ୍ତି ଯେ ଏହି ଡ୍ରୋନ୍ ନିଶା କିମ୍ବା ଅସ୍ତ୍ରଶସ୍ତ୍ର ପରିବହନ ପାଇଁ ଏହି ଡ୍ରୋନ ବ୍ୟବହୃତ କରାଯାଉଥିଲା କି ନାହିଁ ତାହା ଜାଣିବାକୁ ବିଏସଏଫ ପକ୍ଷରୁ ଅଧିକ ତଦନ୍ତ ଜାରି ରହିଛି।
