ଭୁବନେଶ୍ୱର,୨୮।୧୧(କ୍ରୀଡ଼ା ପ୍ରତିନିଧି)- କଳିଙ୍ଗ ଷ୍ଟାଡିୟମରେ ଚାଲିଥିବା ଏଫ୍ଆଇଏଚ୍ ହକି ପୁରୁଷ ଜୁନିୟର ବିଶ୍ୱକପ୍ରୁ ବିଦାୟ ନେଇଛି ପାକିସ୍ତାନ। ରବିବାର ଅନୁଷ୍ଠିତ ପୁଲ୍ ‘ଡିି’ ମ୍ୟାଚରେ ଆର୍ଜେଣ୍ଟିନା ୪-୩ ଗୋଲରେ ପାକିସ୍ତାନକୁ ହରାଇ ଦେଇଛି। ବିଜୟ ସହ କ୍ବାର୍ଟର ଫାଇନାଲରେ ପ୍ରବେଶ କରିଛି ଆର୍ଜେଣ୍ଟିନା। ଆର୍ଜେଣ୍ଟିନା ୩ ମ୍ୟାଚରୁ ୨ ବିଜୟ ସହ ୬ ପଏଣ୍ଟ ପାଇଥିବାବେଳେ ପାକିସ୍ତାନ ୩ ମ୍ୟାଚରୁ ଦ୍ୱିତୀୟ ପରାଜୟ ସହ ବିଦାୟ ନେଇଛି। ଏଣିକି ପାକ୍ ଦଳ କ୍ଲାସିଫିକେଶନ ମ୍ୟାଚ ଖେଳିବ।
ଉଭୟ ଆର୍ଜେଣ୍ଟିନା ଓ ପାକିସ୍ତାନ ଆରମ୍ଭରୁ ଆକ୍ରମଣାତ୍ମକ ଖେଳିଥିଲେ। ୧୦ମ ମିନିଟରେ ବୌଟିଷ୍ଟା କାପୁରୋ ଫିଲ୍ଡ ଗୋଲ ଦେଇ ଆର୍ଜେଣ୍ଟିନାକୁ ଅଗ୍ରଣୀ କରାଇଥିଲେ। ପ୍ରଥମ କ୍ବାର୍ଟର ଶେଷ ସୁଦ୍ଧା ଆର୍ଜେଣ୍ଟିନା ୧-୦ରେ ଆଗୁଆ ରହିଥିଲା। ଦ୍ୱିତୀୟ କ୍ବାର୍ଟର ଆରମ୍ଭରେ ପେନାଲ୍ଟି କର୍ନରକୁ ଗୋଲରେ ପରିଣତ କରି ପାକିସ୍ତାନ ସଫଳ ପ୍ରତ୍ୟାବର୍ତ୍ତନ କରିଥିଲା। ଦଳ ପକ୍ଷରୁ ଅବଦୁଲ ରାଣା ଏହି ଗୋଲଟି ଦେଇଥିଲେ। ତେବେ ଏହାର ୩ ମିନିଟ ପରେ ଆର୍ଜେଣ୍ଟିନାର ଇଗ୍ନାସିଓ ନାର୍ଡୋଲିଲୋ ଏକ ଫିଲ୍ଡ ଗୋଲ ଦେଇ ପୁଣି ଦଳକୁ ଅଗ୍ରଣୀ କରାଇଥିଲେ। ଦ୍ୱିତୀୟ କ୍ବାର୍ଟର ଶେଷ ପର୍ଯ୍ୟାୟରେ ଆର୍ଜେଣ୍ଟିନା ଗୋଲପୋଷ୍ଟ ଡି’ ଏରିଆ ମଧ୍ୟରେ ବଲ୍ ପାଇଁ ସଂଘର୍ଷ ଚାଲିଥିବାବେଳେ ବିପଜ୍ଜନକ ଖେଳ ପାଇଁ ପାକିସ୍ତାନକୁ ପେନାଲ୍ଟି ଷ୍ଟ୍ରୋକ୍ ସୁଯୋଗ ଦିଆ ଯାଇଥିଲା। ଦଳର ୩ ନମ୍ବର ଖେଳାଳି ଅଲୀ ରିଜୱାନ କୌଣସି ତ୍ରୁଟି ନ କରି ପ୍ରତିପକ୍ଷ ଗୋଲକିିପର ନେହୁଏନ ହେର୍ନାଣ୍ଡୋଙ୍କୁ ଚକ୍ମା ଦେବାରେ ସକ୍ଷମ ହୋଇଥିଲେ। ୨୮ତମ ମିନିଟରେ ଏହି ଗୋଲ ହୋଇଥିଲା। ତେବେ ପାକିସ୍ତାନର ଏହି ଖୁସି ବେଶି ସମୟ ତିଷ୍ଠି ନ ଥିଲା। ୩୦ତମ ମିନିଟରେ ଫ୍ରାନ୍ସିସ୍କୋ ରୁଇଜ୍ ଏକ ଫିଲ୍ଡ ଗୋଲ ଦେଇ ପ୍ରଥମାର୍ଦ୍ଧ ଶେଷ ସୁଦ୍ଧା ଆର୍ଜେଣ୍ଟିନାକୁ ୩-୨ରେ ଅଗ୍ରଣୀ କରାଇଥିଲେ। ତୃତୀୟ କ୍ବାର୍ଟରରେ ଉଭୟ ଦଳ ଏକାଧିକଥର ସୁଯୋଗ ସୃଷ୍ଟି କରିଥିଲେ ହେଁ ତାହାକୁ ଗୋଲରେ ପରିଣତ କରିପାରି ନ ଥିଲେ। ବିଶେଷ କରିି ପାକିସ୍ତାନ ୪୪ ଓ ୪୫ତମ ମିନିଟରେ ୨ ଥର ପେନାଲ୍ଟି କର୍ନର ପାଇଥିଲେ ହେଁ ତା’ର ସଦୁପଯୋଗ କରିପାରି ନ ଥିଲା। ୪ର୍ଥ କ୍ବାର୍ଟର ଆରମ୍ଭରେ ଆର୍ଜେଣ୍ଟିନା ଆଉ ଏକ ଗୋଲ ଦେଇ ଚାପ ସୃଷ୍ଟି କରିଥିଲା। ୪୭ତମ ମିନିଟରେ ଇଗ୍ନାସିଓ ଇବାରା ଏହି ଫିଲ୍ଡ ଗୋଲଟି ଦେଇଥିଲେ। ୫୩ତମ ମିନିଟରେ ପାକିସ୍ତାନକୁ ପେନାଲ୍ଟି କର୍ନର ମିଳିଥିଲା। ବଲ୍ ଷ୍ଟପ୍ରେ ତ୍ରୁଟି ହୋଇଥିଲେ ହେଁ ଡି’ ଏରିଆ ମଧ୍ୟରେ ପାକିସ୍ତାନ ଖେଳାଳିମାନେ ବଲ୍କୁ ରଖିବାରେ ସକ୍ଷମ ହୋଇଥିଲେ ଏବଂ ଅହମଦ ଅକିଲ ଗୋଲ ଦେଇଥିଲେ। ଶେଷ ୭ ମିନିଟରେ ଖେଳ ବେଶ୍ ସଂଘର୍ଷପୂର୍ଣ୍ଣ ହୋଇଥିଲେ ହେଁ ପାକିସ୍ତାନ ଗୋଲ ପରିଶୋଧ କରିପାରି ନ ଥିଲା।
