ଇସଲାମାବାଦ,୨୫।୪ : ପାକିସ୍ତାନର ଆତଙ୍କବାଦ ନିରୋଧୀ କେନ୍ଦ୍ରରେ ଘଟିଥିବା ବିସ୍ଫୋରଣ ନେଇ ପୋଲିସ ପକ୍ଷରୁ ସୂଚନା ପ୍ରଦାନ କରାଯାଇଛି। ଏହି ଘଟଣା ପଛରେ ଆତଙ୍କବାଦୀଙ୍କ ହାତ ନାହିଁ ବୋଲି ପୋଲିସ ପକ୍ଷରୁ ମଙ୍ଗଳବାର କୁହାଯାଇଛି। ସୋମବାର ରାତି ୮ଟା ୨୦ରେ ଏହି ବିସ୍ଫୋରଣ ଘଟିଥିଲା। ଏହାପରେ ପୋଲିସ ପକ୍ଷରୁ ଏହାjର ତଦନ୍ତ ଆରମ୍ଭ ହୋଇଥିଲା।
ପ୍ରଥମେ ଏହା ଆତଙ୍କବାଦୀ ଆକ୍ରମଣ ବୋଲି ଅନୁମାନ କରାଯାଉଥିଲା। ତେବେ ପରେ ପୋଲିସ ପକ୍ଷରୁ ଏନେଇ ସୂଚନା ପ୍ରଦାନ କରାଯାଇଛି।
ଏହି ଘଟଣାରେ ୧୭ ଜଣଙ୍କ ମୃତ୍ୟୁ ଘଟିଥିବାବେଳେ ୭୦ରୁ ଅଧିକ ଆହତ ହୋଇଥିଲେ। ଡେପୁଟି ଇନ୍ସପେକ୍ଟର ଜେନେରାଲ (ଡିଜି) ସିଟିଡି ଖାଲିଦ ସୁହେଲ କହିଛନ୍ତି , ଏହି ବିସ୍ଫୋରଣରେ ମୃତ୍ୟ ଘଟିଥିବା ବ୍ୟକ୍ତିଙ୍କ ମଧ୍ୟରେ ଜଣେ ବାଳିକାୁ, 12 ପୋଲିସ କର୍ମଚାରୀ ଏବଂ ଚାରିଜଣ ବନ୍ଦୀ ଅଛନ୍ତି। ଆତ୍ମଘାତୀ ଆକ୍ରମଣର ପ୍ରାରମ୍ଭିକ ଦାବିକୁ ଖଣ୍ଡନ କରି ସୁହେଲ କହିଛନ୍ତି, ପୋଲିସ ଷ୍ଟେଶନରେ ଏକ ଷ୍ଟୋର ଅଛି, ଯେଉଁଠାରେ ଜବତ କରାଯାଇଥିବା ବିପୁଳ ପରିମାଣର ଅସ୍ତ୍ରଶସ୍ତ୍ର ଏବଂ ଗୁଳି ରହିଥିଲା। ପ୍ରାରମ୍ଭିକ ଅନୁସନ୍ଧାନରୁ ଜଣାପଡିଛି , ଅର୍ଡିନାନ୍ସ ଡିପୋରେ ଏକ ଶର୍ଟ ସର୍କିଟ ଯୋଗୁ ଏହି ବିସ୍ଫୋରଣ ଘଟିଛି।
ପୋଲିସ କହିଛି, ଆତଙ୍କବାଦୀମାନେ ଏହି ଆକ୍ରମଣ କରିଥିବା କୌଣସି ପ୍ରମାଣ ମିଳିନାହିଁ। ଅସ୍ତ୍ରଶସ୍ତ୍ରରେ ଅଗ୍ନିକାଣ୍ଡ ଏବଂ ଶର୍ଟ ସର୍କିଟ ଯୋଗୁଁ ବିସ୍ଫୋରଣ ହେବାର ସମ୍ଭାବନା ଅଧିକ। ଖାଇବର ପାସ୍ତୁନଖ୍ବାର ଇନ୍ସପେକ୍ଟର ଜେନେରାଲ ପୋଲିସ (ଆଇଜିପି) ଅଖତର ହୟାତ ମଧ୍ୟ ଏହି ଘଟଣାରେ ଆତଙ୍କବାଦୀଙ୍କ ହାତ ଅଛି ବୋଲି ଅସ୍ବୀକାର କରିଛନ୍ତି।
ଅନୁସନ୍ଧାନ ରିପୋର୍ଟରେ କୁହାଯାଇଛି ଯେ ବିସ୍ଫୋରଣ ଯୋଗୁଁ ମସଜିଦ, ଘର, ସ୍କୁଲ କାନ୍ଥ ଏବଂ ଛାତ ସମେତ ଆଖପାଖ ଅଟ୍ଟାଳିକା ମଧ୍ୟ ଭୁଶୁଡି ପଡିଛି।
